នៅថ្ងៃអង្គារនេះ របបយោធា ថៃ បានដកចេញនូវបម្រាមមិនឲ្យចេញចូលវត្តធម្មកាយដែលជាវត្តធំបំផុតក្នុងប្រទេស ថៃ បញ្ចប់ការឡោមព័ទ្ធបរិវេណវត្តក្រោមប្រតិបត្តិការតាមចាប់ខ្លួនចៅអធិការដែលត្រូវបានអាជ្ញាធរចោទពីបទលាងលុយក្រខ្វក់ ។
បញ្ហាវត្តធម្មកាយ នាំទៅរកការប្រឈមមុខដាក់គ្នាធ្ងន់ធ្ងរបំផុតរវាងពុទ្ធសាសនិកនិងប៉ូលិស៣ពាន់នាក់ និងការប្រឈមធំបំផុតមួយរបស់រដ្ឋាភិបាលយោធាដឹកនាំដោយលោកឧត្ដមសេនីយ៍ប្រយុទ្ធ ចាន់អ៊ូចា ក្រោយរដ្ឋប្រហារឆ្នាំ ២០១៤ ប៉ុន្តែប៉ូលិសបរាជ័យមិនអាចចាប់ខ្លួនចៅអធិការព្រះនាមព្រះធម្មជយោ ។
លោកនាយករដ្ឋមន្ត្រី ប្រាយុទ្ធ ចាន់អ៊ូចា និយាយថា បម្រាមមិនឲ្យចេញចូលវត្តធម្មកាយត្រូវបានបញ្ចប់ ក្រោយកិច្ចប្រជុំរវាងរបបយោធា និងគណៈរដ្ឋមន្ត្រី ។ របបយោធា ថៃ បានប្រើប្រាស់ច្បាប់គ្រាអាសន្នមាត្រា ៤៤ ដើម្បីប្រកាសហាមប្រាមមិនឲ្យមនុស្សចេញចូលវត្តធម្មកាយ និងបញ្ជូនកងកម្លាំងសន្តិសុខ ៣ ពាន់នាក់ធ្វើការឡោមព័ទ្ធវត្តនោះ ដើម្បីតាមចាប់ខ្លួនចៅអធិការព្រះធម្មជយោ ពីបទលាងលុយក្រខ្វក់ និងកាន់កាប់ដីខុសច្បាប់ ។ ប៉ូលិសនិយាយថា វត្តធម្មកាយស្ថិតក្រោមការចោទប្រកាន់ជាង ៣៥០ ករណី និងកំពុងបន្តស៊ើបអង្កេត ៣ ករណីបន្ថែមទៀត ពាក់ព័ន្ធនឹងឧក្រិដ្ឋកម្មហិរញ្ញវត្ថុ ។
ទោះយ៉ាងណា មនុស្សមួយចំនួនជឿថា បញ្ហានេះ គឺជារឿងនយោបាយ ព្រោះថាវត្ត ធម្មកាយ ជាវត្តគាំទ្រអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលត្រូវបានគេទម្លាក់ពីដំណែងក្នុងរដ្ឋប្រហារឆ្នាំ ២០០៦ និងជាសត្រូវរបស់នាយករដ្ឋមន្ត្រីបច្ចុប្បន្នលោក ប្រាយុទ្ធ ចាន់អ៊ូចា ។ ប៉ូលិស ថៃ អនុវត្តប្រតិបត្តិការក្រោមបទបញ្ជាគ្រាមានអាសន្នរបស់លោកនាយករដ្ឋមន្ត្រី ប្រាយុទ្ធ ចាន់អ៊ូចា ដែលអនុញ្ញាតដល់កងកម្លាំងសន្តិសុខឲ្យធ្វើការឆែកឆេរ និងចាប់ខ្លួនមនុស្ស ។
ប្រភពៈ reuters
