ភ្នំពេញៈ ក្មេងស្ទាវ ២នាក់ ត្រូវបានកម្លាំងសមត្ថកិច្ចប៉ុស្តិ៍ទំនប់ទឹក ឃាត់ខ្លួនបានភ្លាមៗ ខណៈកំពុងដេញតាមវាយយុវជនប្រុសស្រី៣នាក់ កាលពីវេលាម៉ោង១និង៣០នាទីយប់រំលងអធ្រាត្រឈានចូលថ្ងៃទី១៩ ខែវិច្ឆិកា ឆ្នាំ២០១៧ ស្ថិតក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ។
ជនសង្ស័យទី១ឈ្មោះ លី រិទ្ធី ភេទប្រុស អាយុ២២ឆ្នាំ ទី២ឈ្មោះ ផល រស្មី ភេទប្រុស អាយុឆ្នាំ អ្នកទាំងពីរ មុខរបរធ្វើការក្រុមហ៊ុន និងស្នាក់នៅសង្កាត់ចាក់អង្រែលើ ខណ្ឌមានជ័យដូចគ្នា។ ចំណែកជនរងគ្រោះទី១ឈ្មោះ លាង សេងឃាង ភេទប្រុស អាយុ១៨ឆ្នាំ មុខរបរនៅរៀន បច្ចុប្បន្នស្នាក់នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ជនរងគ្រោះទី២ឈ្មោះ សំ ស្រីលីន ភេទស្រី អាយុ២០ឆ្នាំ មុខរបរនៅផ្ទះ បច្ចុប្បន្នស្នាក់នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។ ទី៣ ឈ្មោះ ពេជ្រ ចំរើន ភេទប្រុស អាយុ២០ឆ្នាំ មុខរបរនៅផ្ទះ បច្ចុប្បន្នស្នាក់នៅសង្កាត់ទំនប់ទឹក ខណ្ឌចំការមន រាជធានីភ្នំពេញ។
ជនរងគ្រោះ បានឲ្យដឹងថា មុនពេលកើតហេតុ ពួកគេមានគ្នា៣នាក់ ប្រុស២ ស្រីម្នាក់ ជិះម៉ូតូមួយគ្រឿងម៉ាកឡែត ពណ៌ស ពាក់ស្លាកលេខ ភ្នំពេញ1FM- 8553 ទើបតែចេញពីញុំាអី នៅមុខក្លីប ប្លូឡាញ ហើយបានត្រឡប់មកវិញ ដោយធ្វើដំណើរតាមបណ្តោយផ្លូវលេខ២៧១ ស្រាប់តែមានក្មេងស្ទាវមួយក្រុម ជិះម៉ូតូជាច្រើនគ្រឿង បានស៊ីប្លេពីចម្ងាយរហូត ធ្វើឲ្យគាត់ងាកមើលក្រោយ ពេលនោះក៏មានជនសង្ស័យមាឌធំម្នាក់ ដែលជិះម៉ូតូម៉ាក PCX ពណ៌ស ពាក់ស្លាកលេខភ្នំពេញ1FM- 5218 បានជិះមកជិត ហើយនិយាយមកកាន់ពួកគាត់ថា ពួកហែកមើលមុខអញធ្វើអី ពួកគាត់ក៏ឆ្លើយថា ខ្ញុំអត់បានមើលមុខបងឯងណា គ្រាន់តែនិយាយប៉ុនហ្នឹងសោះ ជនសង្ស័យមាឌធំនោះ ក៏បានយកជើងមកធាត់ដៃចង្កូតម៉ូតូរបស់គាត់ ហើយបានជិះម៉ូតូមកកាក់ពីមុខម៉ូតូគាត់ឲ្យឈប់ ហើយឲ្យគាត់ចុះពីលើម៉ូតូ ប៉ុន្តែពួកគាត់មិនព្រមចុះ ជនង្ស័យបានចុះពីលើម៉ូតូមកទាត់១ជើង និងវាយពួកគាត់ បណ្តាលឲ្យរងរបួស។
ជនរងគ្រោះ បន្តថា ភ្លាមៗនោះ ពួកគាត់ក៏ស្រែកថា ជួយផង និងចោរៗ ទើបភ្ញាក់ផ្អើលដល់សមត្ថកិច្ចប៉ុស្តិ៍ទំនប់ទឹក ចុះមកអន្តរាគមន៍ភ្លាមៗនៅកន្លែងកើតហេតុតែម្តង បន្ទាប់ពីសមត្ថកិច្ចចុះទៅដល់ ស្រាប់តែមានជនសង្ស័យម្នាក់ ក្នុងចំណោមបក្ខពួកជនសង្ស័យខាងលើ ជិះម៉ូតូម៉ាកស្តុបពី ពណ៌ស ពាក់ស្លាកលេខភ្នំពេញ1GQ- 6431 បានដើរមករកវាយសមត្ថកិច្ចដែលចុះទៅអន្តរាគមន៍ទៀតផង ហើយថែមទាំងចង់យកទូរស័ព្ទរបស់អ្នកសារព័ត៌មាន មកកម្ទេចចោលទៀត ភ្លាមៗនោះក៏ត្រូវកម្លាំងសមត្ថកិច្ចក្របួចជាប់ហើយ បានបញ្ជូនយកមកប៉ុស្តិ៍នគរបាលរដ្នបាលទំនប់ទឹកដើម្បីសាកសួរផងដែរ។
បច្ចុប្បន្នជនសង្ស័យ ត្រូវបានសមត្ថកិច្ចចប៉ុស្តិ៍ទំនប់ទឹក ឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមន ដើម្បីចាត់ការតាមនីតិវិធី៕
