ភ្នំពេញៈ នារីវ័យក្មេងម្នាក់ សង្ស័យមានវិបត្តិ បានជិះម៉ូតូឌុបមកពីផ្ទះ រួចដើរឡើងស្ពានព្រះមុនីវង្ស ត្រើយខាងកើត បម្រុងលោតទឹកសម្លាប់ខ្លួន តែត្រូវបានក្រុមអ្នកសារព័ត៌មានឃើញទាន់ នាំគ្នាជួយឃាត់លួងលោមយកទៅសួរនាំនៅគល់ស្ពាលព្រះមុនីវង្ស។
ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង១ និង១០នាទីរំលងអធ្រាត្រ ឈានចូលថ្ងៃអង្គារ ១៤កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣០ ខែមករា ឆ្នាំ២០១៨នេះ។
បើតាមសេចក្តីរាយការណ៍ពីភ្នាក់ងារ CAM POST ឲ្យដឹងថា នារីគិតខ្លីខាងលើ មិនត្រូវបានគេស្គាល់ឈ្មោះនោះឡើយ មានអាយុ២៨ឆ្នាំ ហើយពេលក្រុមអ្នកសារព័ត៌មានសួរនាំ នាងមិននិយាយអ្វីនោះទេ គិតតែពីយំ និងព្យាយាមដើរគេចចេញម្តងជាពីរដង។ លុះក្រោយមកទើប រហូតនាងនិយាយថា មានបញ្ហាជាមួយប្ដី និងក្រុមគ្រួសារខាងប្ដី រហូតនាងទ្រាំមិនបាន ក៏សម្រេចចិត្តគិតខ្លីបម្រុងលោតទឹកតែម្ដង។
នារីរងគ្រោះរៀបរាប់ប្រាប់ក្រុមអ្នកសារព័ត៌មានដឹងថា នាងរស់នៅជាមួយម្ដាយ និងកូននៅម្ដុំព្រៃព្រេង ជិតវត្តសំរោងអណ្ដែត ខណ្ឌសែនសុខ ។ នាងថា នៅថ្ងៃកើតហេតុ នាងនិងប្ដី បានឈ្លោះប្រកែកគ្នា ដោយបុរសជាប្ដីហាមនាងមិនឲ្យប្រើទូរស័ព្ទ ព្រោះតែប្រច័ណ្ឌខ្លាំងពេក រហូតបិទសិទ្ធនាងស្ទើរគ្រប់ជំហាន ទើបយប់ថ្ងៃកើតហេតុខាងលើ នាងបានសម្រេចចិត្តជិះម៉ូតូឌុបចេញពីផ្ទះ បំណងមកលោតទឹកលើស្ពានព្រះមុនីវង្ស តែសំណាងត្រូវក្រុមអ្នកសារព័ត៌មានមួយក្រុម ធ្វើដំណើរឆ្លងកាត់ប្រទះឃើញនាង ឈរយំឱបបង្កាន់ដៃស្ពាន រួចក៏នាំគ្នាចុះមកជួយឃាត់ទាន់។
បច្ចុប្បន្ននារីរូបស្រស់ស្អាតខាងលើ ត្រូវបានក្រុមអ្នកសារព័ត៌មាននាំគ្នាជូនត្រលប់ទៅផ្ទះវិញហើយ នៅម្ដុំព្រៃព្រេង ជិតវត្តសំរោងអណ្ដែត ខណ្ឌសែនសុខ៕
