បុរសម្នាក់ដែលគេសង្ស័យស្រវឹងស្រា បានបើករថយន្តពាក់ផ្លាកលេខនគរបាលមួយគ្រឿងក្នុងល្បឿនលឿន ក៏ជ្រុលទៅបុករះបង្គោលដែកដាក់ច្រវ៉ាក់ ហើយបន្តទៅបុកកង់បីឥណ្ឌាមួយគ្រឿងទៀតបណ្ដាលឲ្យបុរសម្នាក់រងរបួសធ្ងន់ ហើយមិនឈប់រថយន្តនោះទេ ក៏បន្តទៅបុករបងផ្ទះប្រជាពលរដ្ឋថែមទៀត រហូតធ្វើឲ្យរថយន្តដាច់កាឡេកង់មុខម្ខាងទៅមុខលែងរួច ទើបរត់គេចខ្លួនបាត់ស្រមោលទៅ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១១ និង ៣០នាទីយប់ថ្ងៃទី ៧ ខែវិច្ឆិកា ឆ្នាំ ២០២២ ស្ថិតនៅតាមបណ្ដោយផ្លូវជាតិលេខ ២ ត្រង់ចំណុចរង្វង់មូលតាខ្មៅ ក្រុងតាខ្មៅ ខេត្តកណ្ដាល។
ជុំវិញហេតុការណ៍នេះបើតាមប្រភពព័ត៌មានពីកន្លែងកើតហេតុ បានឲ្យដឹងថាមុនពេលកើតហេតុគេឃើញរថយន្តមួយគ្រឿងម៉ាក Lexus RX330 ពណ៌ស ពាក់ផ្លាកលេខនគរបាល 2-8768 បើកដោយបុរសម្នាក់ សង្ស័យស្រវឹងស្រា បានធ្វើដំណើរក្នុងទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុខាងលើ បានបុករះបង្គោលដាក់ច្រវ៉ាក់នៅចិញ្ចើមផ្លូវបាក់អស់ ៥ដើម និងបន្តទៅបុកកង់បីឥណ្ឌា ដែលចតលើចិញ្ចើមផ្លូវប៉ើងទៅផ្ទប់នឹងរបងសាលាដំបូងខេត្តកណ្ដាល បណ្ដាលឲ្យម្ចាស់កង់បីរងរបួសធ្ងន់ទៀត។
ទោះបីជាបែបនេះក្ដីក៏អ្នកបើកបររូបនេះមិនព្រមឈប់ទទួលខុសត្រូវនោះទេ គឺបានបើកថយក្រោយ រួចបន្តដំណើររហូតដល់ភូមិស្ទឹងជ្រៅ សង្កាត់ដើមមៀន ក្រុងតាខ្មៅ ក៏ជ្រុលទៅបុករបងផ្ទះប្រជាពលរដ្ឋរងការខូចខាត ហើយរថយន្តដាច់កង់មុខម្ខាងទៅលែងរួច ទើបតៃកុងរថយន្តបង្កបានចុះរត់គេចខ្លួនបាត់ស្រមោលទៅ។
ក្រោយកើតហេតុ សមត្ថកិច្ចជំនាញចរាចរណ៍ក្រុងតាខ្មៅ បានចុះមកធ្វើការវាស់វែងស្ទួចយករថយន្តបង្ក និងកង់បីដែលរងការខូចខាតទៅរក្សាទុក រង់ចាំឲ្យម្ចាស់រថយន្តបង្កចូលខ្លួនមកដោះស្រាយតាមច្បាប់៕