ដោយមានការចូលរួមពិភាក្សាពីសំណាក់យុវវ័យជាច្រើន ដែលកំពុងមានជំងឺធ្លាក់ទឹកចិត្ត ហើយភាគច្រើននៃយុវវ័យទាំងនោះ តែងតែបានប្រាប់បញ្ហារបស់គាត់ទៅ ឪពុកម្ដាយរបស់ពួកគេជាច្រើនដងដែរ តែចម្លើយរបស់ឪពុកម្ដាយមួយចំនួនតបទៅពួកគេវិញថា ពួកគេជាក្មេងខូច ឬ ក្មេងចូលចិត្តធ្វើពើ ឬចូលចិត្តរំអួយ។ យុវវ័យទាំងនោះបាននិយាយប្រាប់លោកបណ្ឌិត ឈឹម សុធារ៉ា វេជ្ជបណ្ឌិតជំនាញរោគផ្លូវចិត្តថា គេសឹងតែសម្លាប់ខ្លួនបាត់ទៅហើយ ព្រោះគ្មាននរណាយល់ចិត្តរបស់ខ្លួនបាន។
ដូច្នេះដើម្បីជាព័ត៌មាន សម្រាប់ឪពុកម្ដាយក្នុងការតាមដានបញ្ហាផ្លូវចិត្តរបស់កូន និងដើម្បីកុំអោយមានការស្ដាយក្រោយនោះ លោកវេជ្ជបណ្ឌិតណែនាំពីវិធីសាស្ត្រ ក្នុងការស្វែងយល់ និងដំណោះស្រាយ ទៅកាន់ឪពុកម្តាយគ្រប់រូបដូចនេះថា៖
"ជំងឺធ្លាក់ទឹកចិត្តលើយុវវ័យ គឺមិនខុសពីជំងឺធ្លាក់ទឹកចិត្តរបស់មនុស្សវ័យកណ្ដាលទេ ប៉ុន្តែរោគសញ្ញាវា អាចវិវត្តន៍ខុសពីមនុស្សពេញវ័យដោយសារភាពខុសគ្នានៃបញ្ហាសង្គម និងការលូតលាស់របស់គេ។ យុវវ័យបានជួបបញ្ហាច្រើន ជាពិសេសទាក់ទងនិងសម្ពាធពីមិត្តភក្តិ ការផ្លាស់ប្ដូរអ័រម៉ូន(វ័យគ្រប់ការ) ការលូតលាស់នៃរាងកាយ វិបត្តិដែលទាក់ទងនិងការឆ្លងពីយុវវ័យទៅមជ្ឈិមវ័យ (adolescent crisis)”
"ការកសាងជីវិតថ្មីក្នុងសង្គម ការជ្រើសរើសមុខវិជ្ជាសិក្សា ការមិនអាចសម្រេចបានរវាងការធ្វើតាមអ្វីដែលខ្លួនចូលចិត្ត និងការចូលចិត្តរបស់ឪពុកម្ដាយ ការព្យាយាមរស់នៅក្នុងភាពឯករាជ្យ ដោយមិនពឹងពាក់លើឪពុកម្ដាយ ។ល។ ដែលនាំអោយគេមានការ ផ្ដាច់ខ្លួនពីសង្គម និង មានបញ្ហាផ្សេងទៀត"។
• តើលោក លោកស្រីអាចសំគាល់សញ្ញានៃជំងឺធ្លាក់ទឹកចិត្តលើកូនៗដូចម្ដេចខ្លះ?
"ជួនកាលជំងឺធ្លាក់ទឹកចិត្តអាចច្រឡំជាមួយអារម្មណ៍ដែលកើតមាន របស់យុវវ័យក្នុងវ័យគ្រប់ការ ឧទាហរណ៍ អារម្មណ៍ឆាប់ខឹង អារម្មណ៍ឆាប់ប្រែប្រួល ថយចុះនូវការគោរពខ្លួនឯង និង ក្រៀមក្រំដែរ។ ជំងឺធ្លាក់ទឹកចិត្តលើយុវវ័យ មានអាការៈលើសពីការធុញទ្រាន់ ឬការមិនចង់រៀនសូត្រ"។
"សញ្ញាទាំងនោះរួមមាន លក្ខណៈក្រៀមក្រំ ឆាប់ខឹង ឆាប់យំហៀរទឹកភ្នែក អត់ឃ្លានបាយ ស្រកទម្ងន់ បាត់បង់ចំណង់ក្នុងសកម្មភាពដែលគេធ្លាប់តែសប្បាយពីមុនមក អស់កម្លាំងកំហែង ពិបាកក្នុងការផ្ចង់អារម្មណ៍ មានអារម្មណ៍អស់សង្ឃឹម យល់ថាខ្លួនឯងមានកំហុស គេងមិនលក់ ឬ គេងលក់ច្រើនពេក តែងតែត្អូញត្អែរថាធុញទ្រាន់ជាញឹកញាប់ មិនចង់ជួបមិត្តភក្តិ និងការសិក្សាចុះខ្សោយខ្លាំង។ លើសពីនេះទៅទៀត គេអាចមានសញ្ញាឆាប់ខឹងក្រេវក្រោធ មានចរិកកាច មានកំហឹងជាប់ជាប្រចាំ និង ចង់សម្លាប់ខ្លួនជាដើម"។
• មូលហេតុនៃជំងឺធ្លាក់ទឹកចិត្តលើយុវវ័យ៖
"មិនមានមូលហេតុណាមួយពិតប្រាកដដែលនាំអោយមានជំងឺធ្លាក់ទឹកចិត្តលើយុវវ័យទេ។ បញ្ហាដែលនាំ អោយមានជំងឺធ្លាក់ទឹកចិត្តលើមនុស្សវ័យនេះរួមមាន បញ្ហាខួរក្បាល (បញ្ហាដែលទាក់ទងនិងអ័រម៉ូន ជាតិគីមីក្នុងខួរក្បាល បញ្ហាដែលទាក់ទងនឹងព្រឹត្តិការណ៍ភ័យរន្ធត់ដែលគេជួបប្រទះ ការបាត់បង់ឪពុកម្ដាយ ជម្លោះក្នុងគ្រួសារ ការរំលោភបំពានលើផ្លូវភេទ) អាចមានបញ្ហាតំណរពូជ (សមាជិកក្នុងគ្រួសារមានជំងឺធ្លាក់ទឹកចិត្ត) និងបញ្ហាដែលចូលចិត្តគិតអវិជ្ជមាន (ពិសេសប្រសិនបើគេរស់ នៅក្នុងគ្រួសារ ឬសង្គមដែលចូលចិត្តគិតបែបនេះ)"។
ចំណាំ៖ "ជំងឺធ្លាក់ទឹកចិត្តគឺមិនអាចជាសះស្បើយដោយគ្រាន់តែធ្វើអ្វីៗអោយអ្នកជំងឺសប្បាយនោះទេ។ វាគឺជាជំងឺវេជ្ជសាស្ត្រដែលទាមទារនូវការព្យាបាលពីវេជ្ជបណ្ឌិត ជំនាញច្បាស់លាស់។ ដូច្នេះប្រសិនបើកូន លោក លោកស្រីមានរោគសញ្ញាទាំងឡាយដូចខាងលើ សូមប្រញាប់យកគេមកពិគ្រោះជាមួយវេជ្ជបណ្ឌិត ឯកទេសជំងឺផ្លូវចិត្តកុំខានឡើយ"៕
