header ads

Sponsor

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) និងជាតំណាងរាស្រ្តមណ្ឌលខេត្តកំពង់ស្ពឺបានសរសេរលើបណ្តាញសង្គម Facebook ថា៖ យើងទាំងអស់គ្នាពិតជាដឹងហេីយថា ពិភពលោកទាំងមូល​ បាន​ និងកំពុងតែជួបប្រទះនូវវិបត្តិដ៏ធ្ងន់ធ្ងរមួយ​ ដែលបង្កឡេីងដោយ​ជំងឺ Covid-19។

ក្នុងនោះ​ កម្ពុជាយេីង​ ក៏កំពុងតែទទួលរងនូវឥទ្ធិពលដោយផ្ទាល់ពីវិបត្តិនេះផងដែរ។ ប៉ុន្តែទោះជាយ៉ាងនេះក្តី​ ជឿចុះ​ថា​ ស្ថានភាពនេះ​ នឹងមិនអាចបំផ្លាញបានទាំងស្រុងនូវកិច្ចប្រឹងប្រែង​ ក៏ដូចជាសេចក្តីសុខរបស់សង្គមយេីងឡេីយ។ ស្មារតីយកចិត្តទុកដាក់ខ្ពស់ពីប្រមុខរាជរដ្ឋាភិបាល​ ការរៀបចំផែនការគ្រប់ជ្រុងជ្រោយដេីម្បីឆ្លេីយតប​ទៅនឹងស្ថានការណ៍ ការចូលយ៉ាងសកម្មពីសំណាក់សមាជិក​ នៃគ្រួសារកម្ពុជា​យេីង​ បានបង្ហាញយ៉ាងច្បាស់ពីភាពក្លៀវក្លា​ និងភាពរ៉ឹងប៉ឹងដោយមិនចុះញ៉មជាមួយនឹងស្ថានការណ៍ ដែលនេះជាក្តីសង្ឃឹមមួយរបស់យេីង​។ 

ជាមួយគ្នានោះ ការចូលរួមយ៉ាងគត់ហ្មត់ពីសំណាក់ប្រជាពលរដ្ឋគ្រប់រូបក្នុងការការពារខ្លួន​ និងក្រុមគ្រួសារ​ និងការបន្តតាមដាន​ និងអនុវត្តនូវលក្ខខណ្ឌចាំបាច់នានា​ ដែលដាក់ចេញដោយអាជ្ញាធរមានសមត្ថកិច្ច​ បាននឹងកំពុងក្លាយទៅជាក្តីសង្ឃឹមថ្មីមួយទៀត ដែលថា​ យេីងទាំងអស់គ្នាពិតជានឹងអាចឆ្លងផុតពីគ្រាលំបាកនេះជាក់ជាមិនខាន។ ទន្ទឹមនឹងក្តីសង្ឃឹមទាំងនេះ ក៏តោងយេីងទាំងអស់គ្នាយល់ផងដែរថា​ ក្នុងកាល:ទេស:ណាមួយនោះ​ យេីង​ ឬសមាជិកណាម្នាក់នៃគ្រួសារយេីង​ ក៏អាចនឹងត្រូវបានដាក់ឲ្យរស់នៅដោយឡែក​ ឬព្យាបាលដោយឡែក​ដោយសារជំងឺនេះដែរ។

ក្នុងស្ថានភាពនោះ​ សេចក្តីសុខរបស់យេីង​ និងក្រុមគ្រួសារយេីង​ អាចនឹងបាត់បង់មួយផ្នែក​ ប៉ុន្តែទោះក្នុងកាល:ទេស:នោះក្តី​ ក៏យេីងមិនត្រូវអស់សង្ឃឹមឡេីយ។ ត្រូវយល់ថា​ ចុងក្រោយ​ ចំណែកនៃការបាត់បង់នោះ​ នឹងក្លាយទៅជាការចូលរួមយ៉ាងសំខាន់សម្រាប់សេចក្តីសុខរបស់សង្គមយេីងទាំងមូល។ នេះមិនមែនជាពេលវេលាដែលយេីងត្រូវភ្លេចខ្លួនឡេីយ​ ហេីយនេះ​ ក៏មិនមែនជាពេលវេលាដែលយេីងត្រូវរេីសអេីងដែរ។ ផ្ទុយទៅវិញ​ វាជាពេលវេលាដែលត្រូវរួបរួមគ្នា​ ជាពេលវេលាដែលត្រូវផ្តល់ការលេីកទឹកចិត្ត​ និងជាពេលវេលាដែលត្រូវបង្ហាញពីការយកចិត្តទុកដាក់​ និងសេចក្តីស្រលាញ់។

Feature Ads

Previous Post Next Post
Sponsor