កញ្ញា Sandra Romdul តែងតែបង្ហោះ Status ក៏ដូចជាលេងពាក្យសំដីជាច្រើន ធ្វើឲ្យមានអ្នកគាំទ្រ និងសំបូរអ្នកនិយមចូលចិត្តអានការ Post របស់កញ្ញា។ ពេលនេះពិតជាប្លែកទៀតហើយដោយសារកញ្ញាបានចេញ បទយកការណ៍ពីសេះ “កំពឹសលោត” ត្រូវបានក្លាយជាប្រធានបទ ដ៏ក្តៅគគុក នាចុងខែកញ្ញានេះ ធ្វើឲ្យបងប្អូនជាច្រើនសើចចុកពោះទៀតហើយ។ សូមប្រិយមិត្តទាំងអស់ចុចអានទាំងអស់គ្នា៖
<
បើតាមសម្តីរបស់ម្ចាស់ភោជនីយដ្ឋាន brand brand មួយកន្លែង បានបញ្ជាក់ថា ហាងរបស់អ្នកស្រី គឺជាហាងរបៀប ហ្វេនស៊ី (Fancy) គឺសម្រាប់ឲ្យអ្នកមានស៊ី ព្រោះជាទូទៅគ្រឿងផ្សំស្ទើរតែទាំងអស់រួមទាំងកំពឹសផង បានដឹកយកមកពីបរទេស ហើយជាក់ស្តែង គ្រាន់តែកំពឹសមួយក្បាលៗ ក៏ត្រូវបានបំពាក់អុកស៊ីសែន ដោយវេជ្ជបណ្ឌិតជំនាញឯកទេស ពីមន្ទីរពេទ្យបំរុងរ៉ាត់ យ៉ាងល្អិតល្អន់ និងធ្វើដំណើរតាមរយៈជើងហោះហើរ Bangkok Airway ក្នុងគោលបំណង បំពេញសេចក្តីរីករាយរបស់កំពឹស ដើម្បីធ្វើឲ្យកំពឹស មានសុខភាពល្អ ទាំងផ្លូវកាយ&ផ្លូវចិត្ត មុននឹងយកមកក្រឡុក ជូនអតិថិជនពិសារ។ ហេតុដូច្នេះ គ្រាន់តែតម្លៃត្រឹមប៉ុណ្ណឹង អ្នកស្រីយល់ថាវាមិនថ្លៃពេកនោះទេ។
ទោះជាមានការបកស្រាយពីម្ចាស់ហាងយ៉ាងណា ក៏អតិថិជនមួយចំនួន របស់ហាងខាងលើនេះ បានធ្វើការស្រែកតវ៉ា ដើម្បីឲ្យម្ចាស់ហាង បញ្ចុះតម្លៃលើមុខម្ហូបមួយចំនួន ព្រោះវាមានលក្ខណៈថ្លៃហួសពីទីផ្សារជ្រុលពេក។
ប្អូនស្រីម្នាក់ សុំមិនបញ្ចេញឈ្មោះ បាននិយាយប្រាប់ក្រុមការងារយើង ទាំងអួលដើម.កថា៖ “មុនដំបូង ខ្ញុំឃើញគេផុសក្នុងហ្វេសប៊ុក ថាហាងហ្នឹងមានតម្លៃសមរម្យ ដូច្នេះខ្ញុំក៏នាំមិត្តភក្តិទៅហូប ហើយហៅម្ហូបឡើងច្រើនមុខ ព្រោះខ្ញុំអត់ដែលគិតថាវាថ្លៃចឹងទេ ដល់ពេលគេយកវិក័យបត្រចេញមក ពួកខ្ញុំម្នាក់ៗស្មានតែកម្មវិធីទូរទស្សន៍ គេលេងល្បែង ពញ្ញាក់អារម្មណ៍ភ្ញៀវ ខំងាកមើលក្រែងមានកាម៉េរ៉ា តែមានឯណា ចុងក្រោយនាំគ្នារៃអង្គាសលុយគ្នាទំរាំគ្រប់ ហើយមកដល់ឥលូវ ខ្ញុំនៅជំពាក់លុយ មិត្តភក្តិខ្ញុំនៅឡើយទេ។
ជាមួយគ្នានោះដែរ អ្នកមីងសយ ដែលជាអាជីវករលក់ កំពឹសចៀននៅផ្សារបឹងត្របែក បានស្រែកប្រាប់ក្រុមការងារ ទាំងកំពុងចៀនកំពឹសថា “អូនអើយអូន ! កំពឹសអ៊ុំទិញនៅផ្សារ តែ1ម៉ឺនរៀល យើងញ៉ាំចាក់ឆ្អេះ បានទាំងពូជ អាហ្នឹងហើយ នៅមិននៅ ទៅចង់ស្គាល់ហាងល្អ វាសមហើយបួនប្រាំម៉ឺនហ្នឹង”។
យ៉ាងណាមិញ ក៏មានអតិថិជនមួយភាគ មិនបានជំទាស់ពីតម្លៃកំពឹសលោតនោះទេ ព្រោះពួកគេយល់ថា វាជាសិទ្ធិរបស់ម្ចាស់ហាង ក្នុងការកំណត់តម្លៃរបស់គេ។
និស្សិតមួយរូប ដែលកំពុងដើរទាត់ខ្យល់ បានបញ្ចេញមតិ ប្រាប់ក្រុមការងារយើងថា “គេចង់លក់ប៉ុន្មាន វាស្រេចតែចិត្តគេ សំខាន់បើយើង មានលុយចាំយើងញ៉ាំទៅ គេមិនបានបង្ខំយើងឯណា? ហេតុអីចាំបាច់ ជំទាស់តវ៉ារឿងតម្លៃ របស់ហាងគេ?”។
ជាមួយគ្នានោះដែរ មហាសេដ្ឋីក្នុងfacebookម្នាក់ ដែលល្បីខាងចូលចិត្តផឹកស៊ី បានបញ្ចេញមតិ ដោយគាំទ្រម្ចាស់ហាងថា “ងាប់ហើយ តម្លៃត្រឹមប៉ុណ្ណឹងថាថ្លៃ? ឯងក៏ធ្លាប់ផឹកស៊ីអស់រាប់រយ មិនថាថ្លៃផង។ បើហាងគេល្អ វាថ្លៃចឹងហើយ។ បើយើងចង់រកថោក ទៅស៊ីនៅហាងអន់ៗ ក្បែរសាលា ក្បែរវត្តអីទៅ ទើបវាសមនឹងចិត្ត”។
ទាក់ទងនឹងមតិរបស់មហាសេដ្ឋីរូបនេះ បានធ្វើឲ្យលោកតាស៊ីក្លូ នៅម្តុំផ្លូវត្រឡោកបែក ចាត់ទុកមតិនោះ ជាការប្រមាថដល់រូបគាត់ ដែលជាប្រជាពលរដ្ឋក្រីក្រម្នាក់។ គាត់បាននិយាយមួយៗ ដោយទឹកមុខស្រពោនថា៖ “តាមិនចង់និយាយទេចៅ ធ្វើម៉េចយើងកើតមកក្រមែន តែបើយើងមិនមាត់ គឺគេកាន់តែមើលងាយ។ ពេលខ្លះ ពួកអ្នកមានហ្នឹងល្ងង់ណាស់ ឲ្យគេកោរទាំងសប្បាយចិត្ត ហើយគិតថាខ្លួនឯងមានមោទនភាព ការពិតទៅម្ហូបវា មិនជាឆ្ងាញ់អីដល់ សម្លរម្ជូរកំពឹស នៅក្បែរវត្តនេះផង អស់តែ3000អីហ្នឹងចៅអើយ”។ ក្រៅពីនោះ ក៏មានមតិជាច្រើនទៀត ទាក់ទងពីរឿងកំពឹសលោតនេះ ដែលក្រុមការងារយើងខ្ញុំ មិនអាចដកស្រង់យកមកផ្សាយអស់។
យ៉ាងណាមិញ ក្នុងនាមនាងខ្ញុំជាអ្នកសារព័ត៌មានអព្យាក្រឹត្យ និងអាណាធិបតយ្យ នាងខ្ញុំយល់ឃើញថា ម្ចាស់ហាងពិតជាមានសិទ្ធិ ក្នុងការកំណត់តម្លៃ លើមុខម្ហូបរបស់ហាងខ្លួនមែន ព្រោះនេះជាទីផ្សារសេរី គឺជាការលក់ដូរ ដោយគ្មានការបង្ខិតបង្ខំ។ ប៉ុន្តែនាងខ្ញុំទទួលស្គាល់ថា តម្លៃកំពឹសលោតនេះ ក៏មានតម្លៃថ្លៃខ្ពស់ ពីតម្លៃទីផ្សារឆ្ងាយមែនហើយ ហេតុដូច្នេះ អ្នកទិញក៏មានសិទ្ធិក្នុងការ រិះគន់ នឹងអំពាវនាវ ឲ្យម្ចាស់ហាងពិចារណា រឿងតម្លៃនេះដែរ ទោះជាពួកគេគ្មានសិទ្ធិ បង្ខំឲ្យម្ចាស់ហាងបញ្ចុះតម្លៃក៏ដោយ។
នាងខ្ញុំ Sandra Romdul រាយការណ៍ជូន ពីម្តុំចម្ការមីន
*នាងខ្ញុំសូមរក្សាសិទ្ធិ ក្នុងការលុបStatusនេះចោល ប្រសិនបើម្ចាស់ហាង ចេញមុខផ្តល់ឱកាស ឲ្យនាងខ្ញុំបានហូបកំពឹសលោត Free ពីរកែវ 
👌
ដកស្រង់ពី កញ្ញា៖ Sandra Romdul
