
ភ្នំពេញ៖ បន្ទាប់ពីផ្ទុះប្រតិកម្មថា យុវជនស្ទាវមួយក្រុមបានបើករថយន្តកាមេរី ដេញបុករថយន្តព្រួសបើកបរដោយបុរសម្នាក់ដែលសុីផ្លេរសុំផ្លូវ, ធ្វើឲ្យក្រុមយុវជនទាំងនោះផ្ទុះកំហឹងដេញបុកហើយចុះដកកាំភ្លើងវាយបំបែកក្បាលរួចរត់គេចខ្លួនបាត់អស់។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី១១វិច្ឆិកា២០១៦ ដែលស្ថិតនៅជិតក្លោងទ្វារវត្តទឹកថ្លា តាមបណ្ដោយផ្លូវ សហព័ន្ធរុស្សី ភ្នំពេញ។
ប្រភពឲ្យដឹងថា រហូតមកដល់ថ្ងៃទី១២វិច្ឆិកា២០១៦ម្សិលមិញនេះ មានអ្នកលេងបណ្ដាញសង្គម ហ្វេសប៊ុកជាច្រើនបាន Share បន្តគ្នារហូតស្គាល់អត្តសញ្ញាណរបស់យុវជនបង្ក ស្គាល់ទាំង អាសយដ្ឋាន ទៀតផង។
ប្រភពបានបន្តថា ម្សិលមិញនេះផងដែរមានប្រតិកម្មដល់កូនប្រុសសម្ដេចតេជោ ហ៊ុន សែន ដល់ទៅ ២នាក់គឺ ឯកឧត្តម ហ៊ុន ម៉ានិត និង ឯកឧត្ដម ហ៊ុន ម៉ានី បានសំណូមពរអោយសមត្ថកិច្ចតាមចាប់ជនបង្ករករណីយុវជនមួយក្រុមមានកាំភ្លើងបើកឡានតាមវាយបុរសម្នាក់នៅខណ្ឌពោធិ៍សែនជ័យកាលពីយប់ថ្ងៃទី១១វិច្ឆិកា២០១៦នោះផងដែរ ។
យោងតាម គណនី Facebook របស់ឯកឧត្តម ហ៊ុន ម៉ានិត បានសរសេរថា «សូមសមត្ថកិច្ចចាប់ពួកជនដៃដល់អោយបានផង» «មិនអាចឬមិនគួរសម្រួលទេ»ត្រូវពង្រឹងច្បាប់អោយបានជាមួយពួកនេះជាដាច់ខាត»។
ដោយឡែឯកឧត្តម ហ៊ុន ម៉ានី ក៏បានសរសេរនៅលើ Facebook របស់ឯកឧត្ដមថា «យើងមិនទាន់ដឹងមូលហេតុពិតប្រាកដដែលនាំអោយមានអំពើនេះទេ តែយ៉ាងណាក៏ដោយនេះជាសកម្មភាពមួយដែលមិនគួរកើតឡើង ក្នុងសង្គមទាំងមូលមិនអាចទទួលយកបានទេ សង្ឃឹមថាសមត្ថកិច្ចពាក់ព័ន្ធនឹងយកចិត្តទុកដាក់ដោះស្រាយ និងនាំអ្នកបង្ករហេតុមកទទួលខុសត្រូវតាមផ្លូវច្បាប់អោយបានយ៉ាងឆាប់រហ័សបំផុត»។
ប្រសាសន៍ឯកឧត្ដមទាំង២ គឺធ្វើយ៉ាងណាក៏ដោយត្រូវតែចាប់ឲ្យខាងតែបាន ដោយមិនមានការសម្របសម្រួលក្រៅសំណាញ់ច្បាប់ឬ ជាប់ខ្សែ,ជាប់ខ្នងនោះទេ។
ទាំងនេះផងដែរធ្វើឲ្យអ្នកលេង បណ្ដាញសង្គមហ្វេសប៊ុក ចាំមើលមើល៍ថា តើជនល្មើសមានខ្នងបង្អែកធំប៉ុនណា ? ហើយអ្នកណាចេញមុខរត់ការឲ្យក្រុមទាំងនេះ៕ ដោយ៖ សហការី






វីដេអូ៖ សកម្មភាព
ផ្ដល់សិទ្ធិដោយ៖VD7News.com