ខេត្តព្រះសីហនុ៖ មានមតិមួយចំនួនបានលើកឡើង ដោយស្នើសុំឲ្យភាគីពាក់ព័ន្ធ គិតគួររឿងសាងសង់សួនសត្វសមុទ្រ ដែលជាញឹកញយគេឃើញសត្វសមុទ្រជាច្រើនត្រូវបានប្រជានេសាទចាប់បានរួចយកទៅធ្វើអាជីវកម្មផ្សេងៗ ហើយភាគតិចបំផុត នៃសត្វសមុទ្រកម្រទាំងនោះ ដែលត្រូវបានជួយសង្រ្គោះមកវិញ ពីសំណាក់មន្ត្រីពាក់ព័ន្ធ ជាពិសេសគេតែងតែឃើញមានការយកចិត្តទុកដាក់ពីសំណាក់ លោកឧកញ៉ា ទាវិចិត្រ។
តួយ៉ាង ដូចជាសត្វអណ្ដើកសមុទ្រមួយក្បាលនេះ ទម្ងន់រហូតដល់៥៣គីឡូក្រាម ដែលប្រជានេសាទ រកបានមកពីក្នុងសមុទ្របម្រុងយកទៅលក់នៅលើទីផ្សារ តែដោយសំណាងល្អត្រូវបានលោក ឧកញ៉ា ទា វិចិត្រ ជួយសង្គ្រោះទាន់ពេល។ លោកបានបង្ហោះសារមួយក្នុងទំព័រហ្វេសប៊ុក អមជាមួយនឹងរូបភាព "ខ្ញុំនឹងយកសត្វអណ្ដើកសមុទ្រ ទម្ងន់53 kg មួយក្បាលនេះ ដែលខ្ញុំទើបតែបានពីប្រជានេសាទមុននេះបន្តិច ហើយខ្ញុំនឹងយកវាទៅលែងឲ្យទៅរស់នៅក្នុងសមុទ្រធម្មជាតិវិញនាព្រឹកស្អែកនេះ"។
ទោះបីជាសមុទ្រធំល្វឹងល្វើយបែបណាក៏ដោយ គេមិនប្រាកដថា សត្វអណ្ដើកសមុទ្រមួយក្បាលនេះអាចនឹងមិនត្រូវបានអ្នកនេសាទផ្សេងទៀត ចាប់បានទៀតនោះទេ។ មានពលរដ្ឋអ្នកលេងហ្វេសប៊ុកមួយចំនួន ស្នើសុំអោយភាគីណាមួយ ឬលោកឧកញ៉ា ទា វិចិត្រ តែម្តង បង្កើតសួនសត្វសមុទ្រ ដូចប្រទេសគេដទៃទៀត ម្យ៉ាងក៏ជាការទាក់ទាញភ្ញៀវទេសចរណ៍បានកាន់តែច្រើនផងដែរ មួយវិញទៀតក៏អាចអោយបងប្អូនក្នុងស្រុក ដែលមិនធ្លាប់ស្គាល់ប្រភេទសត្វសមុទ្រទាំងនេះ មានឱកាសបានឃើញនិងបានស្គាល់ផងដែរ៕
ផ្ដល់សិទ្ធិដោយ៖KQUBE
