សិល្បៈ ៖ កាលពីល្ងាចមិញនេះបទចម្រៀង "ស្រីអភ័ព្វ" របស់តារាកំប្លែងមេម៉ាយកូនមួយ ខ្ញុង បានចេញ MV នៅលើ Youtube ហើយ បន្ទាប់ពីបទមួយនេះផលិតរួចរាល់ជាច្រើនខែ។ រយៈពេលតែមួយយប់ទេ MV បទថ្មី ខ្ញុង ក៏ទទួលបានការចាប់អារម្មណ៍ខ្លាំង ព្រោះសាច់រឿងក្នុងបទចម្រៀងមួយនេះត្រូវបានមតិជាច្រើនយល់ថា ជាសាច់រឿងពីអតីតកាលរបស់នាងទាំងស្រុង។
លោក ងួន សុបិន អ្នកនិពន្ធបទ "ស្រីអភ័ព្វ" បានប្រាប់ Kqube.net តាមទូរស័ព្ទនៅមុននេះបន្តិចថា បទចម្រៀង "ស្រីអភ័ព្វ" គឺជារឿងពិតរបស់បងស្រី ខ្ញុង ព្រោះលោកនិពន្ធឡើងតាមការរៀបរាប់ប្រាប់ពីគាត់ផ្ទាល់ គ្រាន់តែពាក្យពេចន៍ខ្លះល្អៀងអត្ថន័យបន្តិចបន្តួចតែប៉ុណ្ណោះ។
លោកបន្តថា សាច់រឿងក្នុងបទចម្រៀងនេះ គឺរៀបរាប់ពីដំណើរជីវិតបែកបាក់គ្រួសារ និងការជួបបុរសថ្មីម្នាក់ទៀតរបស់គាត់ ប៉ុន្តែក្រោយមកទើបអ្នកនាង ខ្ញុង ដឹងថា បុរសក្រោយដែលគាត់បានស្គាល់ជាមនុស្សមានប្រពន្ធ និងកូន ហើយទីបំផុតគាត់(ខ្ញុង) ក៏សម្រេចចិត្តដើរចេញ ព្រោះមិនចង់ធ្វើខ្លួនជាអ្នកជ្រែកស្នេហ៍អ្នកដទៃ។ជុំវិញការបើកកកាយរឿងពិតរបស់ខ្លួននៅក្នុង MV បទចម្រៀង "ស្រីអភ័ព្វ" នេះដែរ តារាកំប្លែង ខ្ញុង ក៏បានផ្ដល់បទសម្ភាសន៍ជាមួយ Kqube.net នៅព្រឹកនេះថា រឿងរ៉ាវនៅក្នុង MV បទចម្រៀង "ស្រីអភ័ព្វ" ដែលផលិតកម្ម ថោន ចេញកាលពីថ្ងៃម្សិលមិញនេះ គឺជារឿងរបស់នាងពិតប្រាកដមែន ព្រោះនាងបានសុំឲ្យអ្នកនិពន្ធលោក ងួន សុបិន សរសេរពីដំណើររឿងរបស់ខ្លួន។
ខ្ញុង បញ្ជាក់ថា "រឿងខ្ញុំបែកបាក់គ្រួសារ គឺពិតជាដូចក្នុងសាច់រឿងក្នុង MV ទាំងស្រុង ព្រោះមុនពេលបែកពីប្ដី ខ្ញុំជាអ្នកចម្រៀងនៅភោជនីយដ្ឋានពិតមែន"។ខ្ញុង បន្ថែមថា "ពេលនោះប្ដីខ្ញុំគេមានស្រីថ្មីជាមួយអ្នករស់នៅទល់មុខបន្ទប់ខ្ញុំជួល ហើយពេលខ្ញុំទៅច្រៀងបាត់ពីផ្ទះ ប្ដីខ្ញុំគេយកនារីម្នាក់នោះមកដេកនៅក្នុងផ្ទះជួល ចៃដន្យថ្ងៃមួយខ្ញុំមកទាន់ឃើញគេកំពុងដេកជាមួយគ្នាតែម្ដង"។ តារាកំប្លែងរូបនេះបន្តថា "ព្រោះតែរឿងនេះទើបខ្ញុំសុខចិត្តនាំកូនប្រុសចាកចេញពីផ្ទះ ហើយក្រោយមកខ្ញុំក៏បានជួបបុរសម្នាក់ទៀត តែពីដំបូងឡើយខ្ញុំមិនបានដឹងថាគេមានប្រពន្ធ និងកូនទេ តែក្រោយមកខ្ញុំក៏បានដឹង ហើយក៏បានដើរចេញពីគេដែរ ព្រោះមិនចង់ធ្វើជាអ្នកជ្រែកក្តីសុខអ្នកដទៃ"។
ការដែលអ្នកមេម៉ាយស្ម័គ្រចិត្តបើកកកាយរឿងពិតរបស់ខ្លួនធ្វើជាបទចម្រៀង ខ្ញុង ក៏បានប្រាប់ថា សម្រាប់រូបនាងគឺគិតខុសគេ មិនថាពេលមុន ឬពេលនេះទេ គឺនាងមិនចូលចិត្តលាក់បាំងរឿងផ្ទាល់ខ្លួនឡើយ ព្រោះរឿងទាំងនេះ វាបានកន្លងហួសទៅហើយ ហើយក៏គ្មានមូលហេតុអ្វីត្រូវបិទបាំងដែរ មុននឹងក្រោយគង់គេដឹង និងគេនិយាយ ដូច្នេះហើយនាងត្រូវនិយាយឲ្យហើយ ដើម្បីឲ្យអ្នកថ្មីដែលគេចង់បាននាងជាគូគ្រងបានដឹងព័ត៌មានច្បាស់៕
ផ្ដល់សិទ្ធិដោយ៖KQUBE
