ខេត្តប៉ៃលិន៖ រយៈពេលប៉ុន្មានថ្ងៃនេះ ក្នុង១ថ្ងៃៗមានប្រជាពលរដ្ឋទាំងក្នុងខេត្ត និងក្រៅខេត្ត ជាពិសេសយុវវ័យ ចំនួនរាប់រយនាក់ បានផ្អើលនាំគ្នាមកលេងកំសាន្ត និងថតសែលហ្វី នៅចំការផ្កាស្បៃរឿង ០១កន្លែង ដែលស្ថិតនៅក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ខេត្តប៉ៃលិន ជិតព្រំដែនកម្ពុជា+ថៃ ដើម្បីថតរូបទេសភាពដ៏ស្អាតនេះទុក្ខជាអនុស្សាវរីយ៍ និងផុសក្នុងបង្អួតគ្នាលើបណ្តាញទំនាក់ទំនងសង្គមផងដែរ។
បើតាមយុវវ័យដែលបានមានលេងកំសាន្តនៅក្នុងចំការផ្កាស្បៃរឿងនេះបានឱ្យដឹងថា៖ ពួកគាត់មកលេងនៅទីនេះគឺដោយសារតែ ឃើញគេបង្ហោះនៅលើ ហ្វេសប៊ុក មើលទៅទេសភាពស្អាត លាយឡំនឹងខ្នងភ្នំ ក៍នាំគ្នាមកលេងកំសាន្ត ពិសេសចង់ថតរូបទុកជាអនុស្សាវរីយ៍ និងចង់ផុសនៅលើបណ្តាញទំនាក់ទំនងសង្គមដើម្បីបង្អួតមិត្តភ័ក្រ ហើយក្នុងនោះក៍មានគូស្នេហ៍ ដែលជិតនឹងរៀបអាពាហ៍ពិពាហ៍ក៍នាំគ្នាមកថត Pre-Wedding នៅក្នុងចំការផ្កាស្បៃរឿងនេះដែរ។
គួរបញ្ចាក់ថា៖ ចំការផ្កាស្បៃរឿងនេះ គឺមានចំនួន ០២ហិចតា ដាំដុះនៅលើខ្នងភ្នំតូចៗ ដែលដាំដោយលោក សំភុង អាយុ ៤៨ឆ្នាំ ជាជនជាតិថៃ មានភរិយាជាជនជាតិខ្មែរ ហើយគាត់មានស្រុកកំណើតនៅ ខេត្តរៈយ៉ង ប្រទេសថៃ ចំណែកផ្កាស្បៃរឿងដែលគាត់ដាំនេះ គឺកាត់យកទៅលក់នៅទីក្រុងបាងកក ប្រទេសថៃ។ដោយលោក ញ៉ឹប បូរី ប៉ៃលិន 05-12-2016
