សិល្បៈ ៖ ទីបំផុតលោក ជា វិបុល បានក្លាយជាឪពុកគេហើយ បន្ទាប់ពីលោកបានរៀបការ ជាមួយពិធីការិនី គង់ សុជាតិ អស់រយៈពេលច្រើនឆ្នាំ និងតែងបង្ហាញអារម្មណ៍ចង់បានកូនទុកជាចំណងដៃ។ ពេលនេះបំណងរបស់លោកបានដូចប្រាថ្នាហើយ ពីព្រោះកាលពីវេលាម៉ោង ១១:២៥នាទីព្រឹកថ្ងៃទី ០៤ ខែ មករា ឆ្នាំ២០១៧ម្សិលមិញនេះ គង់ សុជាតិ បានសម្រាលកូនស្រីដ៏គួរឲ្យស្រឡាញ់ម្នាក់ ទម្ងន់២,៨០គីឡូក្រាម ប្រកបដោយសុខភាពល្អបរិបូរណ៍។
កូនស្រីម្នាក់នេះ គង់ សុជាតិ និងលោក ជា វិបុល បានដាក់ឈ្មោះ ជា សុជាតិនារី។ ជាមួយគ្នានេះ ក្រៅពីបង្ហាញក្តីសប្បាយរីករាយ ព្រោះទទួលមានកូនស្រីដូចក្តីបំណង គង់ សុជាតិ ក៏បានចេញសារក្នុងហ្វេសប៊ុករបស់ខ្លួនថា "ម្ដាយរំភើបណាស់ដែរកូនស្រីម្ដាយកើតមកដោយសុវត្ថិភាពដោយមានប៉ាប៉ានៅជិតរហូត " សារខាងលើនេះបង្ហាញឲ្យឃើញថា អ្នកនាងពិតជារំជួលចិត្ត និងមានភាពកក់ក្តៅខ្លាំងណាស់ពេលដែលលោក ជា វិបុល បង្ហាញតួនាទីជាប្ដីដ៏ល្អ និងជាឪពុកដ៏មានគុណធម៌៕
ផ្តល់សិទ្ធិដោយ៖KQUBE
