តើតារាចម្រៀង ថោន ម្នាក់ៗ ប្រើពាក្យសម្ដីអ្វីខ្លះពេលលោក ករុណា ពេជ្រ ទទួលបានតំណែងធំកាលពីថ្ងៃម្សិលមិញ ? ខាងក្រោមនេះ គឺជាបទសម្ភាសន៍រវាងលោក តាន់ ចន្ថា អ្នកផលិតព័ត៌មាន គេហទំព័រ Kqube.net ជាមួយតារាចម្រៀង ថោន ។
ខេម ៖ តារាចម្រៀងជួរមុខរបស់ ថោន ខេម បានប្រាប់ថា ការឡើងកាន់តំណែងជាអ្នកគ្រប់គ្រងផលិតកម្ម របស់លោក ករុណា ពេជ្រ សម្រាប់រូបលោកមិនមានអ្វី ដែលមិនពេញចិត្តទេ ព្រោះគាត់ក៏មានបទពិសោធន៍ច្រើនក្នុងការងារសិល្បៈដែរ ។ ដោយឡែកព័ត៌មានខ្លះនិយាយថា គាត់ក៏ជាតារាចម្រៀង ពេលកាន់តំណែងធំអាចគិតពីខ្លួនឯងនោះ គ្រាន់តែជាពាក្យមហាជនទេ ចំណុចនេះលោកជឿថា គាត់មិនធ្វើអ៊ីចឹងទេ គឺគាត់មានតែខិតខំរកវិធីសាស្ត្រថ្មីៗជួយជ្រោងតារាចម្រៀងក្នុងផលិតកម្មឲ្យជោគជ័យទាំងអស់គ្នា ដើម្បីហុចផលដល់ក្រុមហ៊ុនផងដែរ ។
សុគន្ធ ថេរ៉ាយុ ៖ តារាចម្រៀងយុវវ័យ សុគន្ធ ថេរ៉ាយុ បានប្រាប់ Kqube.net ដែរថា សម្រាប់រូបលោក គាំទ្រចំពោះការឡើងកាន់តំណែងរបស់លោក ករុណា ពេជ្រ ព្រោះគាត់ជាមនុស្សមានទេពកោសល្យខ្លាំង និងម៉ត់ចត់ការងារ ហើយរយៈពេលប៉ុន្មានថ្ងៃនេះគាត់ក៏បានធ្វើការងារជោគជ័យច្រើនហើយដែរ នេះហើយជាការបង្ហាញឲ្យឃើញពីសមត្ថភាពរបស់គាត់។
កែវ វាសនា ៖ តារាចម្រៀងសំឡេងរាជសី កែវ វាសនា បានប្រាប់ដែរថា មុខតំណែងលោក ករុណា ពេជ្រ ទទួលបានលោក គាំទ្រទាំងស្រុង ព្រោះក្រោយពេលគេបានស្គាល់លោក ករុណាពេជ្រ ក៏បានឃើញស្នាដៃការងាររបស់គាត់ធ្វើបានជោគជ័យច្រើន ដោយសារមនុស្សគាត់ពេលធ្វើការអ្វីមួយមានការតាំងចិត្តខ្ពស់។ រីឯចំណុចមួយទៀតគាត់ក៏ជាមនុស្សម្នាក់រួសរាយមិនប្រកាន់ឫកពាផងដែរ។
រ៉ាប៊ី ៖ សម្រាប់ស្រីស្រស់សំឡេងស្រួយកញ្ញា រ៉ាប៊ី បានលើកឡើងថា តំណែងដែលលោក ករុណា ពេជ្រ ទើបតែទទួលបានថ្មីៗនេះ គឺសមស្របណាស់ ព្រោះគាត់ជាមនុស្សម្នាក់ម៉ត់ចត់ ហើយការងារគាត់ធ្វើជាច្រើនគឺទទួលបានជោគជ័យ។ ជាក់ស្ដែងដូចជាជំនួញខាងដឺគ័ររបស់គាត់ គឺជោគជ័យខ្លាំង ព្រោះគាត់ឆ្លាត និងមានវិធីសាស្ត្រច្រើនកៀរគរយកអ្នកគាំទ្រ។
លី អ៊ីវ៉ាធីណា ៖ សម្រាប់តារាចម្រៀងកូនចៅចិន លី អ៊ីវ៉ាធីណា បានប្រាប់ថា ការកាន់តំណែងអ្នកគ្រប់គ្រងទូទៅរបស់លោក ករុណា ពេជ្រ គ្មានរឿងអ្វីដែលថា មិនស័ក្ដិសមនោះទេ ព្រោះគាត់ក៏ជាអ្នកសិល្បៈធ្លាប់មានបទពិសោធន៍ជោកជាំលើការងារនេះច្រើនឆ្នាំមកហើយ ម្យ៉ាងទៀតនាងក៏គ្មានអារម្មណ៍ថា គាត់ធ្លាប់មានតួនាទីដូចគ្នាពេលឡើងធំ ធ្វើឲ្យការងារមួយចំនួនពិបាកនោះទេ ព្រោះ ថោន មានគោលការស្មើសិទ្ធទាំងអស់គ្រប់តារាចម្រៀង។
អេនីហ្សាម៖ បាននិយាយដែរថា នាងក៏គាំទ្រចំពោះតួនាទីថ្មីរបស់លោក ករុណា ពេជ្រ ផងដែរ ព្រោះនាងជឿជាក់លើសមត្ថភាពគាត់នឹងធ្វើបានល្អ ព្រោះការងារច្រើនមកហើយដែលគាត់កាន់ គឺទទួលបានជោគជ័យតែរហូត ហើយគាត់ក៏ជាមនុស្សចិត្តល្អ និងមានភាពច្បាស់លាស់នឹងការងារ ដូច្នេះហើយការងារថ្មីដែលគាត់ទើបទទួលនេះប្រាកដជាជោគជ័យខ្លាំងជាមិនខាន។
គួរបញ្ជាក់ដែរថា ការស្ទង់មតិពីតារាចម្រៀង ថោន ចំពោះការឡើងកាន់តំណែងធំរបស់លោក ករុណា ពេជ្រ ទោះជា Kqube.net មិនបានសម្ភាសន៍គ្រប់តារារបស់ ថោន ក្ដី ប៉ុន្តែតាមការបញ្ជាក់ពីតារាចម្រៀងដែលមានវត្តមានខាងលើនេះម្នាក់ៗ បានគាំទ្រទាំងស្រុង ហើយការបោះពាក្យសម្ដីលើកទឹកចិត្តពីក្រុមតារារបស់ ថោន ខាងលើនេះប្រាកដជាធ្វើឲ្យលោក ករុណា ពេជ្រ មិនអាចប្រកែមិនទទួលការងារនេះឡើយ តែអ្វីដែលលោកត្រូវហាក់រៀន នឹងធ្វើឲ្យបានឃើញជាក់ច្បាស់នឹងភ្នែក ដើម្បីជម្រះមន្ទិលរបស់ទស្សនិកជន គឺការចេញបទឲ្យតារាចម្រៀងម្នាក់ៗ មានភាពស្មើគ្នាកម្រិតណា៕
ផ្តល់សិទ្ធិដោយ៖KQUBE
