ទស្សនៈយុវជន៖ តើដឹងទេថា យុវជននៅកម្ពុជាសព្វថ្ងៃនេះ កំពុងប្រើប្រាស់បណ្ដាញសង្គមហ្វេសប៊ុក (Facebook) ដើម្បីធ្វើអ្វីខ្លះ? ច្បាស់ជាពិបាកឆ្លើយហើយមើលទៅ ព្រោះម្នាក់ៗមានការយល់ឃើញខុសៗគ្នា ហើយអ្នកប្រើប្រាស់ក៏មានលក្ខណៈទីទៃៗពីគ្នាដែរ ប៉ុន្តែយ៉ាងណាមិញមានទស្សនៈយុវជនខ្លះបានលើកឡើងថា «Facebook គ្រាន់តែជាកន្លែងបង្ហាញនូវអារម្មណ៍តែប៉ុណ្ណោះ» តើពិតទេ?
ជុំវិញចំណោទបញ្ហានេះ គេហទំព័រព័ត៌មាន Kqube.net បានលើកយកនូវទស្សនៈរបស់យុវជនចំនួន៤នាក់ ដែលមកពីប្រភពផ្សេងគ្នា ស្ថិតក្នុងចំណោមយុវជនផ្សេងៗជាច្រើននាក់ទៀត ដើម្បីបង្ហាញនូវការយល់ឃើញផ្ទាល់ខ្លួនរបស់ពួកគេ តបទៅនឹងប្រធានបទខាងលើនោះផងដែរ។
ទី១-លោក អ៊ាម វន្នី តារាចម្រៀងបទភ្លេងថ្មី
ទី២លោក រិន ចាន់រិទ្ធ អ្នកសម្របសម្រួលយុវជនឯករាជ្យ
ទី៣-កញ្ញា យ៉ាន់ លីណា និពន្ធនាយកវិទ្យុវាយោ
ទី៤-កញ្ញា គីម លីខេង និស្សិតឆ្នាំទី២ នៃវិទ្យាស្ថានវាន់ដា។
លោក អ៊ាម វន្នី ៖ ចំពោះការលើកឡើងថា ហ្វេសប៊ុកគ្រាន់តែជាកន្លែងបញ្ចេញនូវអារម្មណ៍នោះ គឺជាការត្រឹមត្រូវមួយផ្នែកផងដែរ ព្រោះលោកបានសង្កេតឃើញថា អ្នកលេងបណ្ដាញសង្គមនេះប្រមាណជាង ៥០ភាគរយ គឺនៅមានកម្រិតនៃការចេះប្រើប្រាស់ហ្វេសប៊ុកឲ្យមានប្រយោជន៍នៅឡើយទេ។ ប៉ុន្តែចំពោះលោកផ្ទាល់លោកថា ហ្វេសប៊ុកមិនបានជះឥទ្ធិពលដល់ការងារផ្សេងទៀតរបស់លោកឡើយ។ ប្រភពដដែលនេះបានបញ្ជាក់ថា ហ្វេសប៊ុកលោកបានចាប់ផ្ដើមលេងតាំងឆ្នាំ២០១០មកម្ល៉េះ។ សព្វថ្ងៃហ្វេសប៊ុកបានជួយដល់ការងារអាជីពរបស់លោកបានច្រើនណាស់ ទាំងការយល់ដឹងនៅព័ត៌មានផ្សេងៗ រួមទាំងការទំនាក់ទំនងជាមួយសង្គមមនុស្សទូទៅផងដែរ។ ជាក់ស្ដែងរាល់ការទំនាក់ទំនងជាមួយនឹងអាជីពចម្រៀងរបស់លោក គឺត្រូវបានគេហៅតាមរយៈហ្វេសប៊ុកនេះតែម្ដង ព្រោះវាទំនើប និងមិនចាំបាច់ស្គាល់លេខទូរស័ព្ទនោះទេ។ " សម្រាប់ខ្ញុំហ្វេសប៊ុកគឺប្រើសម្រាប់ជាស្ថានីយផ្សព្វផ្សាយពីកិច្ចការងារអាជីពជាតារាចម្រៀង ជាកន្លែងទំនាក់ទំនងជាមួយមនុស្សក្នុងសង្គម និងជាកន្លែងចែករំលែករឿងល្អៗ"។
នេះជាការបញ្ជាក់បន្ថែមផ្សេងទៀត ដែលតារាចម្រៀងរូបនេះបានផ្ដល់ឲ្យKqube.net ប៉ុន្តែយ៉ាងណាក៏ដោយលោកបានសំណូមពរថា សូមឲ្យអ្នកលេងហ្វេសប៊ុកទាំងអស់ រក្សាភាពថ្លៃថ្នូរឲ្យសក្ដិសមនិងភាពថ្លៃថ្នូររបស់ខ្លួនឯងផង។
លោក រិន ចាន់រិទ្ធ ៖ បានបកស្រាយយ៉ាងដូច្នេះថា ហ្វេសប៊ុកគឺជាសហគមន៍មួយ ដែលមនុស្សអាចលើកឡើងអំពីបញ្ហាជាអាទិភាពរបស់ពួកគេ ដើម្បីឱ្យដឹងឮដល់មនុស្សទូទៅ។ ជាពិសេសហ្វេសប៊ុក គឺជាមជ្ឈមណ្ឌលនៃការចែករំលែក និងទទួលបាននូវព័ត៌មាន បទពិសោធន៍ និងចំណេះដឹងនានាទូទាំងសាកលលោកថែមទៀត។ ប៉ុន្តែទោះជាយ៉ាងនេះក្តី ប្រភពដដែលនេះបានបញ្ជាក់ថា ការប្រើប្រាស់ហ្វេសប៊ុកមួយចំនួននៅកម្ពុជាមិនមែនសុទ្ធតែផ្ដល់ផលវិជ្ជមាននោះទេ។
បណ្ដាញសង្គមនេះបានធ្វើឱ្យខាតពេលវេលាដល់អ្នកប្រើប្រាស់មួយចំនួន និងធ្វើឱ្យជះឥទ្ធិពលមិនល្អដល់សង្គមខ្មែរ តាមរយៈការផ្សព្វផ្សាយខ្លឹមសារហិង្សា អំពើអសីលធម៌ ព័ត៌មានមិនពិត និងអំពើជ្រុលនិយមផ្សេងៗទៀតផង។
ចំពោះយុវតី គីម លីខេង ៖ បានឲ្យដឹងថា ហ្វេសប៊ុកបានធ្វើឲ្យនាងប៉ះពាល់ដល់ការសិក្សាមួយចំនួនផងដែរ ដោយសារអារម្មណ៍ពេលខ្លះថាទៅយកសៀវភៅមេរៀនមកអាន ប៉ុន្តែពេលខ្លះខួរក្បាលបញ្ជាឲ្យទាញទូរស័ព្ទមកបើកហ្វេសប៊ុកលេងទៅវិញ។ នេះជាអ្វីដែលនាងធ្លាប់មានបទពិសោធន៍នាពេលកន្លងមកក្នុងការប្រើប្រាស់បណ្ដាញសង្គមនេះ។ នាងបានបន្តថា សព្វថ្ងៃនាងបានប្រើប្រាស់បណ្ដាញសង្គមនេះ ដើម្បីរាប់អានមិត្ត តាមដានព្រឹត្តិការណ៍នានាក្នុងសង្គម និងពិភពលោកជាដើម។ ហើយក្នុងនោះ នាងក៏បានយកហ្វេសប៊ុក មកលេងកម្សាន្តតាមអារម្មណ៍ផងដែរ ប៉ុន្តែនាងបញ្ជាក់ថា នាងមិនដែលបានយកបណ្ដាញសង្គមនេះ ប្រើប្រាស់ឲ្យជះឥទ្ធិពលអាក្រក់ដល់សង្គមជាតិឡើយ។
យ៉ាន់ លីណា ៖ កញ្ញាបានយល់ស្រប់ចំពោះទស្សនថា «Facebook គ្រាន់តែជាកន្លែងបង្ហាញនូវអារម្មណ៍» ប៉ុន្តែទស្សនៈនេះនាងបានបញ្ជាក់ថា វាគ្រាន់តែជាចំណុចត្រឹមត្រូវតែមួយជ្រុងតូចតែប៉ុណ្ណោះ ដែលអ្នកប្រើប្រាស់មួយចំនួនតូច ពួកគេបានយកហ្វេសប៊ុក មកបញ្ចេញអារម្មណ៍សប្បាយចិត្ត អារម្មណ៍ពិបាកចិត្ត និងការមិនចូលចិត្តបុគ្គលដទៃជាដើម ប៉ុន្តែបណ្ដាញសង្គមហ្វេសប៊ុកបច្ចុប្បន្ននេះ មិនដើម្បីតែប្រើប្រាស់ប៉ុណ្ណឹងនោះទេ។
កញ្ញា លីណា បានបញ្ជាក់ថា ហ្វេសប៊ុកត្រូវបានគេប្រើប្រាស់សម្រាប់ចែកចាយព័ត៌មានជាផ្លូវការ សម្រាប់តាមដានព្រឹត្តិការណ៍សង្គមទូទៅ សម្រាប់ការធ្វើអាជីវកម្ម និងសម្រាប់ទំនាក់ទំនងគ្នាជាមួយក្រុមគ្រួសារ មិត្តភ័ក្ដិ ក្នុងពិភពលោកតែម្ដង មិនមែនយកហ្វេសប៊ុកមកប្រើប្រាស់ត្រឹមតែសម្រាប់បញ្ចេញនៅអារម្មណ៍ប៉ុណ្ណោះនោះទេ។
គួររម្លឹកថា ការលើកឡើងក្នុងប្រធានបទនេះ វាគ្រាន់តែជាជ្រុងមួយ ដើម្បីបញ្ញាក់នូវអារម្មណ៍ ក៏ដូចជាការដាស់តឿនដល់អ្នកលេងបណ្ដាញសង្គមនេះខ្លះ ឲ្យងាកមកប្រើប្រាស់ឲ្យបានត្រឹមត្រូវតែប៉ុណ្ណោះ ព្រោះហ្វេសប៊ុកវាអាចជាអាវុធមុខពីរសម្រាប់អ្នកប្រើប្រាស់ផងដែរ។ ដូច្នេះដូចការលើកឡើងរបស់លោក អ៊ាម វន្នី និងប្រភពខាងលើនេះដទៃទៀតដែរ សូមឲ្យអ្នកលេងហ្វេសប៊ុកទាំងអស់ រក្សាភាពថ្លៃថ្នូរឲ្យសក្ដិសមនិងភាពថ្លៃថ្នូររបស់ខ្លួនឯងផង៕
ផ្តល់សិទ្ធិដោយ៖KQUBE
