√ អ្នកណាមិនអាណិត ថ្ងៃក្ដីស្រឡាញ់ តារាចម្រៀងម្នាក់ យំឱបម្ដាយមានជំងឺសរសៃប្រសាទ

សិល្បៈ ៖ ថ្ងៃ១៤កុម្ភៈម្សិលមិញនេះយុវវ័យ និងអ្នកសិល្បៈជាច្រើនបានសម្ដែងនូវក្ដីសប្បាយរីករាយ តាមរយៈការជូនផ្កាទៅមនុស្សជាទីស្រឡាញ់។ ដោយឡែកតារាចម្រៀង Original Song លោក ហេង ធារ៉ា បែរជាជួបទុក្ខ ព្រោះម្ដាយកើតជំងឺសរសៃប្រសាទ បាត់បង់ម្ចាស់ការ រហូតធ្វើឲ្យលោកបង្ហូរទឹកភ្នែកយំឱបម្ដាយបួងសួងក្នុងថ្ងៃក្ដីស្រឡាញ់សុំឲ្យម្ដាយបានជាពីជំងឺ។

លោក ហេង ធារ៉ា ប្រាប់ Kqube.net នៅព្រឹកនេះថា ម្ដាយលោកកើតជំងឺរលាកសរសៃប្រសាទមានរយៈពេលជាងបីឆ្នាំមកហើយ ប៉ុន្តែគាត់ធ្លាប់បានធូរស្រាលម្ដងពេលដែលលោកបានយកគាត់ទៅព្យាបាលនៅប្រទេសវៀតណាម ដែលបានចំណាយអស់ប្រាក់ជិតបួនម៉ឺនដុល្លារ។

ទើបតែប៉ុន្មានថ្ងៃនេះ ជំងឺរបស់គាត់បានរើឡើងវិញ និងមានសភាពធ្ងន់ធ្ងរ លេងស្គាល់កូនចៅ ដូចមនុស្សបាត់បង់ស្មារតីទាំងស្រុងតែម្ដង។ តារាចម្រៀងរូបនេះបន្តថា ប៉ុន្មានថ្ងៃនេះលោកមិនដែលបានចេញទៅណាទេ គឺនៅចាំមើលម្ដាយគ្រប់ពេល ព្រោះខ្លាចគាត់ដើរចេញពីផ្ទះ ហើយកាលពីថ្ងៃម្សិលមិញ ដែលជាថ្ងៃបុណ្យក្ដីស្រឡាញ់ ពេលឃើញគ្រួសារ ឪពុកម្ដាយគេសប្បាយរីករាយជូនផ្កា និងមានកម្មវិធីជប់លៀងជុំគ្រួសារ លោកពិតជាសង្វេគណាស់ ព្រោះម្ដាយលោកមិនស្គាល់កូនៗ ដូច្នេះហើយលោកគ្មានធ្វើអ្វីក្រៅពីបង្ហូរទឹកភ្នែកឱបម្ដាយទាំងក្ដីអាណិត និងបួងសួងសុំឲ្យលោកបានជាពីជំងឺនោះទេ៕