Sponsor
Pisey

​ទៅ​ដល់​ស្រុក​កំណើត​ កុំ​ភ្លេច​នាំ​គ្នា​លេង​ល្បែង​​ប្រជាប្រិយ​ទាំង​នេះ​ ដើម្បី​ឲ្យ​ភូមិ​អ្នក​កាន់​តែ​អ៊ូអរ​ឡើង​

​ក្រោម​ការ​ប្រកាស​ជូន​ដំណឹង​របស់​ក្រសួង​ការងារ​ និង​បណ្ដុះបណ្ដាល​វិជ្ជាជីវៈ ​ឱកាស​ឈប់​សម្រាប់​ពី​ការ​រងារ​របស់​បង​ប្អូន​ ដើម្បី​ទៅ​ចូល​រួម​​ពិធី​បុណ្យ​ចូល​ឆ្នាំ​ខ្មែរ​​ ឆ្នាំ​រកា​នេះ​ គឺ​មាន​រយៈ​ពេល​រហូត​ចំនួន​បួន​ថ្ងៃ​ គឺ​ចាប់​ពី​ថ្ងៃ​ទី​១៣ ខែ​មេសា រហូត​ដល់​ថ្ងៃ​ទី​១៧ ខែ​មេសា ឆ្នាំ​២០១៧ ដូច្នេះ​បងប្អូន​មាន​ពេល​ច្រើន​ណាស់​សម្រាប់​ជួប​ជុំ​ក្រុម​គ្រួសារ ​និង​បង​ប្អូន​សាច់​ញាតិ​ ឆ្លៀត​ក្នុង​ឱកាស​នោះ​ អ្នក​ដែល​បាន​ទៅ​លេង​ស្រុក​កំណើត​ កុំ​ភ្លេច​នាំ​គ្នា​បង្កើត​កម្មវិធី​លេង​ល្បែង​ប្រជាប្រិយ​ខ្មែរ​ខាង​ក្រោម​នេះ ដើម្បី​ឲ្យ​ភូមិ​ស្រុក​របស់​អ្នក​កាន់​តែ​សប្បាយ​រីករាយ​​ឡើង​បន្ថែម​ទៀត​ក្នុង​ឱកាស​ចូល​ឆ្នាំ​ថ្មី​។

​ល្បែង​ប្រជាប្រិយ​ខ្មែរ​ សម្រាប់​លេង​តាម​​ភូមិ​ស្រុក​ និង​ទី​វត្ត​អារាម​ ទាំង​នោះ​រួម​៖

​បូម​ទឹក​ដាក់​ដប​៖ ​​ការ​បូម​ទឹក​ដាក់​ដប​ គឺ​សុំ​រក​ទី​ធ្លា​សម​ល្មម​ ដែល​អាច​ផ្តល់​ភាព​ងាយ​ស្រួល​​ដល់​ការ​រត់​របស់​អ្នក​ចូល​រួម​លេង​ ដោយ​មាន​ទំហំ​២ ទៅ​៤​ម៉ែត្រ​ គឺ​គ្រាប់​គ្រាន់​ហើយ ​ចំពោះ​ការ​រៀប​ចំ​លេង​កម្សាន្ត​នៅ​ល្បែង​ប្រជាប្រិយ​នេះ ​​ត្រូវ​ដាក់​តុ​មួយ​ទ្រវែង​ ឲ្យ​នៅ​ម្ខាង​ពី​អ្នក​លេង​សម្រាប់​ដាក់​ដប​ ឬ​កំប៉ុង​ទទេ រួច​នៅ​ម្ខាង​ទៀត​​​មាន​តុ​​កាន់​តែ​ល្អ​សម្រាប់​ដាក់​ទឹក​ទុក​បូម​ដោយ​មាត់​ផ្ទាល់​យក​ទៅ​បំពេញ​ក្នុង​ដប​ទទេ​នោះ​។​ ចំពោះ​អ្នក​ចូល​រួម​លេង​ គឺ​ត្រូវ​កំណត់​ចាប់​ពី​ពីរ​នាក់​ឡើង​ទៅ ហើយ​អ្នក​ដែល​បាន​បូម​ទឹក​ពេញ​ដប​មុន​គេ​ អ្នក​នោះ​គឺ​ជា​អ្នក​ឈ្នះ​ក្នុង​ល្បែង​នេះ​។​​ 

លោត​ប៉ាវ៖ ល្បែង​លោត​ប៉ាវ​ ជាការ​ចាំ​បាច់​ គឺ​ត្រូវ​មាន​ប៉ាវ ឬ​ការ៉ុង​ បន្ទាប់​មក​កំណត់​ទីតាំង​លោត​ ដោយ​យើង​អាច​កំណត់​តាម​កាលៈទេសៈ​ភូមិ​ស្រុក​របស់​អ្នក​ ខ្លី​បំផុត​ឲ្យ​បាន​ ២​ម៉ែត្រ​ឡើង​ សម្រាប់​ទីធ្លា​លោត​។ អ្នក​លេង​ត្រូវ​កំណត់​ចាប់​ពីរ​នាក់​ឡើង​ដូច​គ្នា ​កីឡាករ​ត្រូវ​ដាក់​ជើង​ចូល​ក្នុង​ប៉ាវ​ទាំង​គូរ​ រួច​យក​ដៃ​កាន់​មាត់​ប៉ាវ ដើម្បី​ងាយ​ស្រួល​ក្នុង​ការ​លោត​ បន្ទាប់​មក​ឈរ​ក្នុង​ទីតាំង​ស្មើ​គ្នា និង​លោត​ក្នុង​ពេល​ដំណាល់​គ្នា អ្នក​ដែល​ដល់​ទី​មុន​ គឺជា​អ្នក​ឈ្នះ​។

​ដណ្ដើម​ស្លឹកឈើ៖ ល្បែង​ដណ្ដើម​ស្លឹក​ឈើ​ លោក​អ្នក​គ្រាន់​តែ​រក​មែក​ឈើ​មួយ​សម្រាប់​លេង ​អ្នក​លេង​ចូល​ដណ្ដើម​ស្លឹក​ឈើ​ម្ដង​ទាំង​គូរ ​បើ​សិន​គូរ​ទី​១ ហាក់​មាន​ស្ថាន​ភាព​តឹងតែង​គ្មាន​អ្នក​ហ៊ាន​លូក​ដៃ​ចាប់​យក​ស្លឹក​ឈើ​ទៅ​កាន់​ទី​របស់​ខ្លួន​ទេ​ អ្នក​ជា​មេ​សី​លេន​(​អ្នក​ហៅ​គេ​មក​ដណ្ដើម​ស្លឹក​ឈើ​)​ ត្រូវ​ហៅ​គូរ​ផ្សេង​ទៀត​ឲ្យ​ជួយ​បាន​ ខណៈ​មាន​ពីរ​គូរ​ដូច្នេះ​ ត្រូវ​កំណត់​គូរ​យក​ស្លឹក​ឈើ​ ត្រូវ​ឲ្យ​ដេញ​ចាប់​គូរ​នោះ ខណៈ​ចាប់​មិន​បាន​ គឺ​អ្នក​ដណ្ដើម​នោះ​បាន​ន័យ​ថា​ឈ្នះ​ហើយ ​តែ​ការ​លេង​នេះ​អាច​ស៊ី​សង​គ្នា​វិញ​បាន​ ដូច្នេះ​អ្នក​រៀប​ចំ​ត្រូវ​កំណត់​​ចំនួន​ការ​ដណ្ដើម​ស្លឹក​ឈើ​ រវាង​អ្នក​លេង​ទាំង​សង្ខាង​នោះ​។

​លាក់​កន្លែង​៖ ​ការ​លេង​ល្បែង​លាក់​កន្សែង​​ គឺ​កាន់​តែ​ងាយ​ស្រួល ​ដោយ​គ្រាន់​តែ​មូល​កន្សែង​ឲ្យ​ណែន​ល្មម​សម្រាប់​ទុក​ដេញ​វាយ​ពេល​គេ​លាក់​ក្រោយ​ខ្នង​ ប៉ុន្តែ​ល្បែង​នេះ​ត្រូវ​ការ​មនុស្ស​ច្រើន​បន្តិច​សម្រាប់​ព័ទ្ធ​វង់​លេង​ ទើប​ធ្វើ​ឲ្យ​កាន់​តែ​សប្បាយ​ ព្រោះ​បើ​គ្នា​តិច​ពេក​ ការ​លាក់​កន្សែង​នៅ​ក្រោយ​ខ្នង​ ឆាប់​ដឹង ឬ​ឆាប់​មើល​ទាន់​ ដូច្នេះ​ល្បែង​នេះ​ យ៉ាង​តិច​ក៏​មាន​គ្នា​លេង​ ចាប់​ពី​៤​នាក់​ឡើង​ទៅ​ដែរ ​ហើយ​បើ​បាន​អ្នក​ចូល​រួម​លេង​កាន់​តែ​ច្រើន​ គឺ​កាន់​តែ​ល្អ ​ល្បែង​នេះ​បើ​លេង​តាម​វត្ត​គឺ​ល្អ​បំផុត ​ចំពោះ​អ្នក​ដែល​យក​កន្សែង​ដើរ​ដាក់​ក្រោយ​ខ្នង​គេ ត្រូវ​ពោល​ពាក្យ​ថា លាក់​កន្សែង​ ឆ្មា​ខាំ​កែង អូស​លោង​ៗ រួច​ក៏​ទម្លាក់​កន្លែង​នោះ​ក្រោយ​ខ្នង​អ្នក​ណា​ម្នាក់​ក្នុង​ចំណោម​អ្នក​លេង​ទាំង​អស់​ រីឯ​អ្នក​ដែល​ឃើញ​កន្សែង​ ត្រូវ​ប្រញាប់​ចាប់​យក ទៅ​វាយ​អ្នក​ដែល​អង្គុយ​នៅ​បន្ទាប់​ខ្លួន​ភ្លាម​ លុះ​គេ​រត់​ដល់​កន្លែង​ដើម​វិញ​ហើយ គឺ​ត្រូវ​យក​កន្សែង​នោះ​ទៅ​ដាក់​ក្រោយ​ខ្នង​អ្នក​ផ្សេង​វិញ​ម្ដង ដែល​ខ្លួន​ពេញ​ចិត្ត​។

ចំពោះ​​ល្បែង​ប្រជាប្រិយ​ខ្មែរ​ខាង​លើ​នេះ​ បើ​បងប្អូន​​យក​ទៅ​លេង​​កម្សាន្ត​តាម​ទី​វត្ត​អារាម​ នា​ភូមិ​ស្រុក​របស់​ខ្លួន​នោះ​ គឺ​កាន់​តែ​បង្កើន​ភាព​សប្បាយ​រីករាយ​បន្ថែម​ទៀត ព្រោះ​នៅ​ក្នុង​ពិធី​បុណ្យ​ចូល​ឆ្នាំ​បែប​នេះ​ វត្ត​អារាម​គឺ​មាន​ពុទ្ធបរិស័ទ​គ្រប់​ទី​កន្លែង​​ ដែល​បាន​អញ្ជើញ​ទៅ​ធ្វើ​បុណ្យ​ ហើយ​ទី​អារាម​ខ្លះ​ ក៏​មាន​កម្ម​សប្បាយ​ពេល​យប់​ៗ​ឡើង​ សម្រាប់​ឲ្យ​បរិស័ទ​ជើង​វត្ត​មក​ជុំ​គ្នា​ទៀត​ផង ដូច្នេះ​បើ​នាំ​គ្នា​លេង​ល្បែង​កម្សាន្ត​ទាំង​នោះ គឺ​ភូមិ​ស្រុក​របស់​អ្នក​ក្នុង​រដូវ​ចូល​ឆ្នាំ ​មិន​ស្ងប់​ស្ងាត់​នោះ​ទេ ​ហើយ​នេះ​ក៏​ជា​ការ​អភិរក្ស​នៅ​ល្បែង​កម្សាន្ត​ខ្មែរ ​សម្រាប់​មនុស្ស​​​ជំនាន់​ក្រោយ​ផង​ដែរ​។

សូម​បញ្ជាក់​ថា ​ល្បែង​ប្រជាប្រិយ​ខ្មែរ​ សម្រាប់​លេង​តាម​​ភូមិស្រុក និង​ទី​វត្ត​អារាម​របស់​អ្នក​ក្នុង​ឱកាស​ចូល​ឆ្នាំ​ខ្មែរ​ខាង​មុខ​នេះ គឺ​នៅ​មាន​ច្រើន​ទៀត មិន​មាន​បាន​ន័យ​ថា មាន​ត្រឹម​តែ​៤ល្បែង​ ខាង​លើ​នោះ​ទេ​ គឺ​មាន​ដូច​ជា​ ល្បែង​ចោល​ឈូង ​បោះ​អង្គុញ​ ​​ទាញព្រ័ត្រ ​ចាប់​កូន​ខ្លែង និង​ល្បែង​កម្សាន្ត​វាយ​ក្អម​ ជាដើម​។ល។ ដូច្នេះ​សង្ឃឹម​ថា ពិធី​បុណ្យ​ចូល​ឆ្នាំ​ខ្មែរ​ខាង​មុខ​នេះ បងប្អូន​ប្រជាជន​ខ្មែរ​គ្រប់​រូប​ នឹង​បង្កើត​ភាព​សប្បាយ​រីករាយ​គ្រប់​ភូមិ​ស្រុក លះបង់​នៅ​ការ​ប្រកាន់​ច្រើន ហើយ​រូប​រួម​គ្នា ដើម្បី​អបអរ​សាទរ​ពិធី​បុណ្យ​ជាតិ​យើង​គ្រប់​ៗ​គ្នា​៕​

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor