កងកម្លាំងរបស់ប្រទេសតួកគី នៅស៊ីរី និងអ៊ីរ៉ាក់ បានបើកការបាញ់ប្រហារតាមអាកាសយ៉ាងកក្រើក បណ្ដាលឲ្យក្រុមសកម្មប្រយុទ្ធ ISIS និងអង្គភាព YPG របស់ខ្លួនប្រមាណជា ៧០នាក់បានស្លាប់។ នេះបើតាមការចុះផ្សាយរបស់ទីភ្នាក់ងារព័ត៌មានចិន ស៊ិនហួ នាព្រឹកថ្ងៃពុធ ទី២៦ ខែមេសា ឆ្នាំ២០១៧។
បើតាមការបញ្ជាក់ពីទ័ពតួកគីបានឲ្យដឹងថា យន្តហោះប្រយុទ្ធតួកគី កាលពីម្សិលមិញបានបើកការវាយប្រហារតាមអាកាសទ្រង់ទ្រាយធំមួយ កម្ទេចទីតាំងរបស់ក្រុមឧទ្ទាម PKK និង Y PG ដែលស្ថិតនៅក្នុងតំបន់ Sinja ប្រទេសអ៊ីរ៉ាក់ និងភាគខាងជើង នៃប្រទេសស៊ីរី ដោយក្នុងអំឡុងពេលនៃការវាយប្រហារនេះមានមនុស្សស្លាប់ប្រមាណជា ៧០នាក់ និងជាច្រើននាក់ផ្សេងទៀតរងរបួស និងថែមបានបំផ្លាញជុំរុំការពារខ្លួន និងមជ្ឈមណ្ឌលទំនាក់ទំនងរបស់ពួកសកម្មប្រយុទ្ធទាំងចំនួន ២កន្លែងទៀតផង។
គួរបញ្ជាក់ផងដែរថា ក្រុម PKK ដែលរងការវាយប្រហារខាងលើនេះបានបង្កើតឡើងក្នុងឆ្នាំ១៩៧៨ និងត្រូវបានតួកគី និងសហរដ្ឋអាមេរិកដាក់បញ្ចូលឈ្មោះទៅក្នុងបញ្ជីក្រុមភេរវកម្មអន្តរជាតិ ក្រោយមកពួកភេរវករនេះបានចាប់ផ្ដើមបង្កើនឥទ្ធិពលឡើងសាជាថ្មី កាលពីឆ្នាំ ២០១៥ រីឯ Y PG គឺជាកងជីវពល Kurdish នៅក្នុងប្រទេសស៊ីរី និងជាសមាសភាគចម្បង នៃកងកម្លាំងសហព័ន្ធប្រជាធិបតេយ្យភាគខាងជើង នៃប្រទេសស៊ីរី (Rojava)៕
