រាជធានីភ្នំពេញ៖ នៅម៉ោងជាង ៩៖០០នាទីព្រឹកថ្ងៃទី២០ ខែឧសភា ឆ្នាំ២០១៧នេះ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ នឹង បានធ្វើសន្និសីទសារព័ត៌មាន ស្តីពីលទ្ធផលនៃប្រតិបត្តិការបង្ក្រាបបានគ្រឿងញៀនជាង៥០គីឡូក្រាម ដែលត្រូវបានគេអះអាងថាមានម្ចាស់ថៅកែផ្ទះសំណាក់ រតនសម្បត្តិ នៅខេត្តរតនគិរី ជនជាតិខ្មែរដើមកំណើតឡាវ ជាមេក្លោងដ៏ធំ។
បើតាមឯកឧត្ដម ម៉ក់ ជីតូ អគ្គស្នងការ នៃអគ្គស្នងការដ្ឋាននគរបាលជាតិបានឲ្យដឹងថា យុទ្ធនាការបង្ក្រាបការជួញដូរទ្រង់ទ្រាយធំនេះ កម្លាំងសមត្ថកិច្ចបាន ឃាត់ខ្លួនជងសង្ស័យពីរនាក់ ដោយម្នាក់ឈ្មោះ លួន សុផា ឃាត់ខ្លួនបាននៅភ្នំពេញកាលពីប៉ុន្មានថ្ងៃកន្លងទៅនេះ និងម្នាក់ទៀតឈ្មោះ ស៊ីរ៉ា ឡយ ហៅ ស៊ីខាំឡយ ឃាត់ខ្លួននៅខេត្តរតនគិរី ដោយដកហូតវត្ថុតាងរថយន្តទំនើបនិង របស់របរជាច្រើនទៀត។
ឯកឧត្ដម ម៉ក់ ជីតូ បន្ថែមថា ចំពោះគ្រឿងញៀនវិញ កម្លាំងជំនាញដកហូតបានគ្រឿងញៀន៣ ប្រភេទ សរុបទាំងសំបកវិចខ្ចប់ទទួលបាន មានទម្ងន់ ៦៧គីឡូក្រាម ដោយប្រភេទ មេតំហ្វេតាមីនគ្រាប់៤២ដុំ មេតំហ្វេតាមីនម្សៅ (ទឹកកក) ១២ដុំ និងហេរ៉ូអ៊ីន ៤៧ដុំ ដែលគ្រឿងញៀនទាំងនេះត្រូវបានចរាចរណ៍មកពីប្រទេសឡាវ។
ឯកឧត្ដម បានបញ្ជាក់ទៀតថា បើតាមការគ្រោងទុក កម្លាំងមន្ទីរគ្រឿងញៀន នឹងបញ្ជូន ជនសង្ស័យទាំងពីរ ទាំងមេក្លោងនឹងអ្នកចែកចាយទៅតុលាការដើម្បីចាត់វិធានការតាមផ្លូវច្បាប់នៅល្ងាចថ្ងៃសៅរ៍ ទី២០ ខែ ឧសភា ឆ្នាំ ២០១៧។
@Amapapa.News