មនុស្សយ៉ាងហោចណាស់ ១៤១នាក់បានស្លាប់ កាលពីម្សិលមិញ បន្ទាប់ពីមានការប៉ះទង្គិចគ្នាមួយ នៅក្នុងតំបន់មូលដ្ឋានទ័ពអាកាសខាងត្បូងប្រទេសលីប៊ី រវាងក្រុមឧទ្ទាម និងកងកម្លាំងយោធារដ្ឋាភិបាល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិន ស៊ិនហួ នាព្រឹកថ្ងៃសៅរ៍ ទី២០ ខែឧសភា ឆ្នាំ២០១៧។
អ្នកនាំពាក្យរបស់កម្លាំងយោធាលោក Ahmad Al-Mimari បានឲ្យដឹងថា មនុស្សយ៉ាងហោចណាស់ ១៤១នាក់បាត់បង់ជីវិត និងរាប់រយនាក់ផ្សេងទៀតរងរបួស ក្នុងហេតុការណ៍ប៉ះទង្គិចគ្នាយ៉ាងកក្រើកមួយរវាងក្រុមឧទ្ទាម និងកងកម្លាំងយោធារដ្ឋាភិបាល ដែលបានកើតឡើង នៅមូលដ្ឋានទ័ពអាកាសភាគខាងត្បូងប្រទេស លីប៊ី។
គួរបញ្ជក់ផងដែរថា ការប្រយុទ្ធប្រហារគ្នាខាងលើនេះ ពុំទាន់មានប្រភពណាមួយបញ្ជាក់ពីមូលហេតុច្បាស់លាស់នៅឡើយទេ ដោយហេតុថា តំបន់ភាគខាងត្បូងនៃប្រទេសលីប៊ី តែងតែកើតមាននូវអំពើហិង្សា ដែលបណ្ដាលឲ្យមានមនុស្សស្លាប់ជារៀងរាល់ថ្ងៃ។ យ៉ាងណាមិញនាយករដ្ឋមន្ត្រីលីប៊ី លោក Fayez Serraj និងមេបញ្ជាការទ័ពលោក Khalifa Haftar បានរៀបចំប្រជុំជាបន្ទាន់ជាមួយ យូអិន ដើម្បីលប់បំបាត់អំពើអសន្តិសុខនេះ៕
