ទីភ្នាក់ងារស៊ើបការណ៍សម្ងាត់របស់កូរ៉េខាងត្បូង មិនជឿថា កូរ៉េខាងជើងមានលទ្ធភាពអភិវឌ្ឍន៍បច្ចេកវិទ្យាមីស៊ីលអន្តរទ្វីប (ICBM) ទទួលបានជោគជ័យនោះទេ។ នេះបើយោងតាមគេហទំព័រសារព័ត៌មាន reuters បានចុះផ្សាយនៅថ្ងៃអង្គារ ទី១១ ខែកក្កដា ឆ្នាំ២០១៧។
សមាជិកគណៈកម្មាធិការចារកម្មរបស់សភាកូរ៉េខាងត្បូង លោក Yi Wan-young បានប្រាប់ឲ្យដឹងថា
ការបាញ់សាកល្បងទទួលបានជោគជ័យនោះ មិនមែនជា ICBM នោះទេ វាជាការបន្លំភ្នែករបស់ទីក្រុងព្យុងយ៉ាង ធាតុពិតវាជាមីស៊ីល KN-17 តែប៉ុណ្ណោះ។ លោកបានអះអាងថា "តើកូរ៉េខាងជើង អាចនឹងធ្វើតេស្ត ICBM បានដោយរបៀបណា... យើងជឿជាក់ថា ទីក្រុងព្យុងយ៉ាង ពុំទាន់មានលទ្ធភាពក្នុងការអភិវឌ្ឍន៍បច្ចេកវិទ្យានេះឡើយ"។
គួរបញ្ជាក់ផងដែរថា ប្រទេសកូរ៉េខាងជើង បានបាញ់សាកល្បងមីស៊ីល ដែលមានសមត្ថភាពផ្ទុកក្បាលគ្រាប់នុយក្លេអ៊ែរ កាលពីសប្ដាហ៍មុន ខណៈដែលអង្គការសហប្រជាជាតិ កំពុងដាក់ទណ្ឌកម្មប្រឆាំងនឹងការអនុវត្តកម្មវិធីនុយក្លេអ៊ែរ និងមីស៊ីលរបស់ទីក្រុងព្យុងយ៉ាង៕
