មន្ត្រីការទូតកូរ៉េខាងជើងមិនបញ្ចេញឈ្មោះម្នាក់ បានប្រាប់ទូរទស្សន៍ CNN ថា ដើម្បីបញ្ចប់វិបត្តិបច្ចុប្បន្ន គឺត្រូវបិទទ្វាររហូតទាល់តែទីក្រុងព្យុងយ៉ាង អាចមានសមត្ថភាពប្រឆាំងនឹងការឈ្លានពាន របស់សហរដ្ឋអាមេរិក ដោយការអភិវឌ្ឍមីស៊ីល ដែលអាចវាយប្រហារមកលើទីក្រុងវ៉ាស៊ីនតោន និង ញូវយ៉ក។ នេះបើយោងតាមគេហទំព័រសារព័ត៌មាន Sputnik បានចុះផ្សាយនាយប់ថ្ងៃអង្គារ ទី១៧ ខែតុលា ឆ្នាំ២០១៧។
មន្ត្រីការទូតរូបនេះ បាននិយាយថា “មុនពេលយើងអាចចូលរួមការទូតជាមួយរដ្ឋបាល ត្រំា យើងចង់ផ្ញើសារច្បាស់លាស់មួយថា កូរ៉េខាងជើងមានសមត្ថភាពការពារ និងវាយប្រហារប្រឆាំងនឹងការឈ្លានពានណាមួយពីសហរដ្ឋអាមេរិក”។
អនុរដ្ឋមន្ត្រីក្រសួងការបរទេសអាមេរិក លោក John Sullivan និងអ្នកការទូតជប៉ុន លោក Shinsuke Sugiyama បានយល់ព្រមកាលពីម្សិលមិញ ដើម្បីបន្តប្រើសម្ពាធសេដ្ឋកិច្ចប្រឆាំងនឹងកូរ៉េខាងជើង នៅក្នុងការប៉ុនប៉ងផលិតអាវុធនុយក្លេអ៊ែរ និងបន្តរកវិធីសាស្ត្រដោះស្រាយ ឲ្យ គីម ជុងអ៊ុន មកអង្គុយនៅតុចរចាជាមួយគ្នា។
ទន្ទឹមនឹងនេះ បណ្ដាលប្រទេសជុំវិញពិភពលោក បានបន្តរឹតបន្តឹងខាងសេដ្ឋកិច្ចរបស់កូរ៉េខាងជើងដោយសហភាពអឺរ៉ុប ប្រកាសការដាក់ទណ្ឌកម្មថ្មីមួយ កាលពីថ្ងៃចន្ទ ក្នុងការតវ៉ាចំពោះកម្មវិធីមីស៊ីលរបស់កូរ៉េខាងជើង និងហាមឃាត់លើការវិនិយោគទាំងអស់របស់អឺរ៉ុប ទៅលើវិស័យពាណិជ្ជកម្មកូរ៉េខាងជើង៕
