អាជីវកម្មរបស់ចិន បានត្រៀមខ្លួនរួចជាស្រេចក្នុងការចូលរួមចំណែកទីផ្សាររីកចម្រើន ដោយគេបានកត់សម្គាល់ថា ការវិនិយោគរបស់ទីក្រុងប៉េកាំង នៅក្នុងប្រទេសកម្ពុជាបានកើនចំនួន ២០០លានដុល្លារ រហូតដល់ ៤.៨ពាន់លានដុល្លារ នៅឆ្នាំ 2016 និងបង្ហាញថា ប្រទេសចិន គឺជាអ្នកវិនិយោគដ៏ធំបំផុតក្នុងប្រទេសកម្ពុជា។ នេះបើយោងតាមគេហទំព័រសារព័ត៌មាន Sputnik បានចេញផ្សាយនាយប់ថ្ងៃអាទិត្យ ទី១៥ ខែតុលា ឆ្នាំ ២០១៧។
អាជីវកម្មចិន កំពុងទាញយកអត្ថប្រយោជន៍ពីបរិយាកាសនយោបាយនៅកម្ពុជា ដែលកំពុងឡើងកម្ដៅ ខណៈរាជរដ្ឋាភិបាល រិះគន់យ៉ាងខ្លាំងទៅលើក្រុងវ៉ាស៊ីនតោន ថាបានលូកដៃជួយជ្រោមជ្រែងគណបក្សប្រឆាំង និងលូកដៃចូលកិច្ចការផ្ទៃក្នុងរបស់កម្ពុជា។ ក្រសួងពាណិជ្ជកម្មកម្ពុជា បានប្រកាសថា អ្វីគ្រប់យ៉ាងជារឿងធម្មតាជាមួយក្រុងវ៉ាស៊ីនតោន ហើយវោហារសាស្ត្រ ដែលកាន់តែក្ដៅក្រហាយរបស់នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ត្រូវបានគេមើលឃើញថា បានបន្ថែមកិច្ចសហប្រតិបត្តិការ កាន់តែខ្លាំងឡើងរវាងក្រុងប៉េកាំង និងរាជធានីភ្នំពេញ។
សំណង់ចិន គឺមានគ្រប់ទីកន្លែង ខណៈពេលដែលនៅតាមតំបន់ភ្នំ និងជនបទ ត្រូវបានចាក់ឫសយ៉ាងជ្រៅ ទៅលើឧស្សាហកម្ម អភិវឌ្ឍន៍វារីអគ្គិសនី និងហេដ្ឋារចនាសម្ព័ន្ធទ្រង់ទ្រាយធំៗជាច្រើនទៀតផង។
គួរបញ្ជាក់ផងដែរថា សហរដ្ឋអាមេរិក បានបដិសេធចំពោះការចោទប្រកាន់ថា អាមេរិក បានចូលរួមក្នុងសកម្មភាពផ្ដួលរំលំរដ្ឋាភិបាលដឹកនាំដោយសម្ដេចតេជោ ហ៊ុន សែន ឬគណបក្សប្រជាជនកម្ពុជា ហើយជាមួយគ្នានេះ ក្រុមអ្នកសង្កេតការណ៍ក្នុងតំបន់ បានកត់សម្គាល់ឃើញថា ការវិនិយោគរបស់អាមេរិក បានធ្លាក់ចុះប្រមាណ ១៦លានដុល្លារ នៅក្នុងប្រទេសកម្ពុជា៕
