កំពង់ចាមៈ ថ្វីត្បិតតែល្បិចទម្លាក់យោង ដែលជាល្បិចកលចាស់គំរិលក៏ពិតមែន តែវានៅតែមានប្រសិទ្ធភាពដដែល ក្នុងការរៀបចំផែនការយកសំណទៅប្ដូរយកមាសសុទ្ធ ព្រោះអ្នកដែលចាញ់ល្បិចកលនេះ សុទ្ធសឹងតែជាអ្នកចង់បានទ្រព្យសម្បត្តិអ្នកដទៃផងដែរ។
ជាក់ស្តែង មានករណីឆបោកមួយ ដោយ២នាក់ប្ដីប្រពន្ធ បានចាញ់បោកល្បិចកលមួយនេះ អស់មាសជិត១តម្លឹង និងទូរស័ព្ទដៃ១គ្រឿង កាលពីវេលាម៉ោង៨៖៣០នាទី ព្រឹកថ្ងៃទី៣ ខែវិច្ឆិកា ឆ្នាំ២០១៧នេះ នៅចំណុចជិតស្ពានអូរដា ស្ថិតក្នុងភូមិខ្លុយ ឃុំមៀន ស្រុកពៃឈរ ខេត្តកំពង់ចាម។
នគរបាលមូលដ្ឋាន បានឲ្យដឹងថា ជនរងគ្រោះខាងលើ ប្ដីមានឈ្មោះ ហួន ប៊ុនធឿន អាយុ៤០ឆ្នាំ ប្រពន្ធឈ្មោះ អ៊ិន ចាន់ថន អាយុ៤២ឆ្នាំ មុខរបរលក់ថ្នាំជក់ រស់នៅភូមិគគរ ឃុំគគរ ស្រុកកំពង់សៀម ខេត្តកំពង់ចាម។
ជនរងគ្រោះបានប្រាប់សមត្ថកិច្ចថា ទ្រព្យសម្បត្តិដែលត្រូវជនឆបោកយកទៅនោះ រួមមាន ខ្សែក និងបន្តោងមាស ទម្ងន់៥ជី ចិញ្ចៀន២ជី ក្រវិល១ជី និងទូរស័ព្ទដៃ១គ្រឿងផងដែរ។ ពួកគាត់បន្តថា នៅមុនពេលកើតហេតុ គឺក្រុមជនសង្ស័យមានគ្នីគ្នាចំនួន៣នាក់ បានរៀបចំផែនការនាំជនរងគ្រោះ ចេញពីផ្សារព្រៃទទឹង ទៅរកកន្លែងស្ងាត់នៅចំណុចខាងលើ ហើយធ្វើសកម្មភាពដោះដូរតែម្តង។
ក្រោយពីកើតហេតុ សមត្ថកិច្ចបានធ្វើការសាកសួរ និងណែនាំជនរងគ្រោះឲ្យដាក់ពាក្យបណ្ដឹង ដើម្បីឈានទៅកំណត់មុខសញ្ញា ហើយចាប់យកមកផ្តន្ទាទោសតាមច្បាប់៕
