ភ្នំពេញៈ រហូតមកទល់នឹងល្ងាចថ្ងៃទី១៧ ខែវិចិ្ឆកានេះ អតីតបុគ្គលិកវិទ្យុអាស៊ីសេរី២រូប មិនទាន់ត្រូវបានបញ្ចប់ការសាកសួរដោយតំណាងអយ្យការនៅឡើយ ពោលគឺនឹងត្រូវបន្តសាកសួរជាលើកទី៣ នៅព្រឹកថ្ងៃទី១៨ វិចិ្ឆកាស្អែកនេះ។
អតីតបុគ្គលិកវិទ្យុអាស៊ីសេរី២រូប គឺលោក យាង សុជាមេត្តា និងលោក អ៊ួន ឈិន ត្រូវសមត្ថកិច្ចបញ្ជូនខ្លួនតាមរថយន្តកាមរីឆ្លាម ពណ៌ស្ករ ចាកចេញពីតុលាការក្រុងភ្នំពេញ នៅម៉ោងជាង៥ល្ងាចនេះ ដើម្បីយកទៅឃុំខ្លួនបណ្តោះអាសន្ន នៅស្នងការដ្ឋាននគរបាលរាជធានីភ្នំពេញ។
ព្រះរាជអាជ្ញាអមសាលាដំបូងរាជធានីភ្នំពេញ លោក សេង ហៀង បានឲ្យដឹងថា រយៈពេលពេញកន្លះថ្ងៃ ចាប់តាំងពីរសៀលរហូតមកទល់នឹងល្ងាចនេះ បានផ្អាកការសាកសួរទៅលើអតីតបុគ្គលិកវិទ្យុអាសុីសេរី ហើយពួកគេនឹងត្រូវចៅក្រមស៊ើបសួរបន្តនីតិវិធីនៅព្រឹកស្អែកទៀត។
គួរំឮកថា លោក អ៊ួន ឈិន ដែលជាអតីតអ្នកផលិតវីដេអូរបស់វិទ្យុអាស៊ីសេរី ត្រូវបានសមត្ថកិច្ចឃាត់ខ្លួននៅផ្ទះសំណាក់ ម៉ារឌី ហើយអតីតបុគ្គលិកផ្នែកព័ត៌មានម្នាក់ទៀត គឺលោក យាង សុជាមេត្តា ដែលត្រូវបានលោក ឈិន ទូរស័ព្ទហៅឲ្យទៅជួយធ្វើជាសាក្សី ក៏ត្រូវសមត្ថកិច្ចឃាត់ខ្លួនជាមួយគ្នាផងដែរ កាលពីម៉ោងប្រមាណ៧ យប់ថ្ងៃអង្គារ ទី១៤ ខែវិចិ្ឆកា។
លោក ស៊ឹម វុទ្ធី ស្នងការរងនគរបាលរាជធានីភ្នំពេញ បានឲ្យដឹងថា អតីតបុគ្គលិកវិទ្យុអាស៊ីសេរីទាំង២រូបនេះ បានរៀបចំស្ទូឌីយោ និងសម្ភារផ្សេងៗ ដើម្បីផ្សាយបន្តឲ្យវិទ្យុអាស៊ីសេរីនៅក្រុងវ៉ាស៊ីនតោនសហរដ្ឋអាមេរិក ហើយកម្លាំងអាជ្ញាធរកំពុងតែពិនិត្យសម្ភារទាំងអស់នោះ។
លោកបញ្ជាក់ដូច្នេះថា “យើងកំពុងពិនិត្យ ពីព្រោះយើងឃើញសម្ភារ និងស្ទូឌីយោ ដែលបានរៀបចំ គឺបានផ្សាយបន្តឲ្យវិទ្យុអាស៊ីសេរី ។ ឥឡូវនេះ យើងកំពុងពិនិត្យឯកសារ និងសម្ភារ ទាំង laptop និងស្ទូឌីយោ និងបើក (email and laptop) ដោយសារពីថ្ងៃទី១៦ ខែវិច្ឆកា ម្សិលមិញ យើងមិនទាន់បើក ឥឡូវយើងមានតុលាការ ហើយសុំយកទៅឆែកនៅក្រសួង “ ។
លោក ស៊ឹម វុទ្ធី បានឲ្យដឹងទៀតថា អាចមានអ្នកជាប់ពាក់ព័ន្ធ ផ្សេងទៀតក្នុងរឿងនេះក៏ប៉ុន្តែលោកមិនបានប្រាប់ឲ្យដឹងពីអត្តសញ្ញាណរបស់អ្នកទាំងនោះទេ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា ការឃាត់ខ្លួននេះ គឺធ្វើឡើង ដោយសារពួកគេទាំង២នាក់នេះ បានរៀបចំស្ថានីយផ្សាយព័ត៌មានឲ្យទីក្រុងវ៉ាស៊ីនតោន គឺផ្តល់ព័ត៌មានពីក្នុងប្រទេសទៅបរទេស ដោយមិនមានការអនុញ្ញាត។
គួរំឮកផងដែរថា ជនសង្ស័យ យាង សុធារិន ដែលប្រើឈ្មោះ យាង សុជាមេត្តា កាលពីពេលនគរបាលបណ្តើរចេញពីផ្ទះសំណាក់ ម៉ារឌី នៅក្នុងខណ្ឌមានជ័យដែលជាកន្លែងឃាត់ខ្លួនបានប្រាប់អ្នកកាសែតថា លោកពុំបានបញ្ជូនព័ត៌មានទៅវិទ្យុអាស៊ីសេរីនៅអាមេរិកដូចការចោទប្រកាន់របស់អាជ្ញាធរនោះទេ។
ជាមួយគ្នានោះ លោក អ៊ួន ឈិន ក៏បានបដិសេធការចោទប្រកាន់របស់អាជ្ញាធរផងដែរ ដោយថ្លែងថា លោកមិនបានបម្រើការងារឲ្យវិទ្យុអាស៊ីសេរីទៀតនោះទេ ហើយលោកបានជួលបន្ទប់ផ្ទះសំណាក់នោះ គឺដើម្បីបើកអាជីវកមុ្ម ជាស្ទូឌីយោ សម្រាប់ច្រៀងខារ៉ាអូខេ ថតវីដេអូ ក្នុងកម្មវិធី រៀបអាពាហ៍ពិពាហ៍ ឬពិធីបុណ្យផ្សេងៗតែប៉ុណ្ណោះ។
ទោះជាយ៉ាងណា លោក អ៊ុ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ បានដឹកនាំកងកម្លាំង និងនាំខ្លួនជនត្រូវចោទទាំង២នាក់ ពីស្នងការរាជធានីទៅកាន់ផ្ទះសំណាក់ ម៉ារឌី ដើម្បីឆែកឆេរបន្ទប់ជួលរបស់ពួកគេ និងបានកសាងសំណុំរឿងបញ្ជូនមកតុលាការ៕
