ថ្ងៃនេះពលរដ្ឋស្រស់ទឹកភ្នែកដើម្បីពួកខ្ញុំ..! 🌷 🌷 🌷 🌷 🌷 ខ្ញុំពិតជាមិនស្តាយស្រណោះតំណែងតួនាទី បុណ្យសក្តិ ប្រាក់បៀរវត្សក្នុងនាមចៅសង្កាត់អូរចារនេះទេ ប៉ុន្តែអ្វីដែលខ្ញុំស្តាយស្រណោះ ខ្ញុំរន្ធត់ ខ្ញុំស្រស់ទឹកភ្នែកថ្ងៃនេះក៏ព្រោះតែខ្ញុំនឹកស្រណោះបេះដូង ឧត្តមគតិ និងសេចក្តីគោរព ស្រលាញ់របស់ពលរដ្ឋនៅក្នុងសង្កាត់អូរចារចំពោះរូបខ្ញុំក៏ដូចជាគណបក្ស សង្គ្រោះជាតិ ទាំងមូល។
តើបងប្អូនជនរួមជាតិបានដឹងទេថាថ្ងៃនេះទាំងប្រជាពលរដ្ឋដែលឈរនៅខាងស្តាំដៃខ្ញុំនិងទាំងពលរដ្ឋនៅក្នុងភូមិគាត់បានអង្គុយក្នុងផ្ទះគ្រប់ៗគ្នា ហើយសំរស់ទឹកភ្នែកសំដែងនូវការសោកស្តាយនូវការបាត់បង់មន្ត្រីជាទីស្រលាញ់និងគណបក្សជាទីគោរពរបស់ពួកគាត់គ្រប់ៗគ្នា ។
ម៉ោងនេះថ្ងៃនេះខ្ញុំបានចេញពីសាលាសង្កាត់មកអង្គុយជុំគ្នាជាមួយសហការីរបស់ខ្ញុំនៅក្នុងផ្ទះរបស់ខ្ញុំ ប៉ុន្តែមិនមានតែពួកខ្ញុំដែលកំពុងអង្គុយជជែកគ្នានេះ គឺមានពលរដ្ឋមកពីបណ្តាលគ្រប់ភូមិក្នុងសង្កាត់អូរចារបន្តជួរគ្នាមកសួរសុខទុក្ខ និងលើកទឹកចិត្តយើងខ្ញុំជាមួយនិងការប្តេជ្ញាចិត្តថា “ ពួកយើងជាពលរដ្ឋនៅអូរចារនៅជាមួយរ៉ូហ្ស៊េតជារៀងរហូត ទោះរ៉ូហ្ស៊េតមានដំណែងជាចៅសង្កាត់ ឬគ្មានដំណែងជាចៅសង្កាត់ តែសុំតែមួយម៉្យាងគត់ គឺកុំឲ្យរ៉ូហ៊្សេតទៅណា គឺយើងខ្ញុំក្នុងនាមប្រជាពលរដ្ឋអូរចារទាំងមូលសុខចិត្តធ្វើស្រែ ធ្វើចំការ ធ្វើកម្មករ និងធ្វើកិច្ចការ ស្របច្បាប់ទាំងឡាយណាដើម្បីស្វែងរកថវិកា ចិញ្ចឹមរ៉ូហ្ស៊េតនិងសហការីរបស់រ៉ូហ្ស៊េត ៕
“ ជយោ!ប្រជាពលរដ្ឋអូរចារដ៏អង់អាចក្លាហាន! “ 🌷 🌷 🌷 🌷 🌷 បាត់ដំបងថ្ងៃទី១៧ ខែវិច្ឆិកា ឆ្នាំ២០១៧
