រាជធានីភ្នំពេញ៖ ប្រាក់ឧបត្ថម្ភប្រចាំខែរបស់ សមាជិកក្រុមប្រឹក្សា មេឃុំ ចៅសង្កាត់ នៃគណបក្សសង្គ្រោះជាតិ អាចនឹងមិនមានតទៅទៀតទេចាប់ពីថ្ងៃទី១៦ ខែវិច្ឆិកា ឆ្នាំ២០១៧នេះតទៅ បន្ទាប់ពី លិខិតផ្លូវការមួយរបស់អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ បានផ្ញើជូនទៅអគ្គនាយកដ្ឋានរតនាគារជាតិ។
លិខិតរបស់ឯកឧត្តម ប្រាក់ សំអឿន អគ្គនាយករដ្ឋបាលខាងលើដែលចុះថ្ងៃទី១៧ វិច្ឆិកានេះ គឺមានកម្មវត្ថុស្នើសុំបង្កកប្រាក់ឧបត្ថម្ភប្រចាំខែសមាជិកក្រុមប្រឹក្សាឃុំសង្កាត់ ដែលមកពីបក្សសង្គ្រោះជាតិ បន្ទាប់ពីគណបក្សជំទាស់ធំជាងគេមួយនេះ ត្រូវបានតុលាការកំពូលបានចេញដីការសម្រេចរំលាយចោល និងដកសិទ្ធិនយោបាយរបស់មន្ត្រីជាន់ខ្ពស់ចំនួន១១៨នាក់របស់បក្សមួយនេះរយៈពេល៥ឆ្នាំ កាលពីម៉ោងប្រមាណ៥ល្ងាចថ្ងៃទី១៦ ម្សិលមិញ តបតាមបណ្តឹងរបស់ក្រសួងមហាផ្ទៃ ដែលទទួលបានពាក្យបណ្តឹងចំនួន២ផ្សេងគ្នា ដោយមួយរបស់គណបក្សហ្វុនស៊ិនប៉ិច និងមួយទៀតរបស់បក្សយុវជនកម្ពុជា។
បើតាមអនុក្រឹត្យលេខ ៤០ អនប្រក ចុះថ្ងៃទី ១៦ មីនា ឆ្នាំ២០១៧ ឲ្យដឹងថាប្រាក់ឧបត្ថម្ភមេឃុំ-ចៅសង្កាត់ដែលបងប្អូនមួយចំនួនតែងហៅថា ប្រាក់ខែ មេឃុំនោះ ដើមឆ្នាំ ២០១៧នេះ រាជរដ្ឋាភិបាលកម្ពុជា ដំឡើងដល់ ៨៨ ម៉ឺនរៀល ខណៈ ជំទប់ទី១ និង ជំទប់ទី២ ឬចៅសង្កាត់ទី១ និងទី២ ទទួលបាន ប្រាក់ឧបត្ថម្ភ ៦៥ ម៉ឺនរៀល ហើយសមាជិកក្រុមប្រឹក្សាឃុំ-សង្កាត់ ៥៧ម៉ឺនរៀល។ ចំណែកឯ ប្រាក់ឧបត្ថម្ភ មេភូមិ វិញ ទទួលបាន ២២ម៉ឺន៥ពាន់រៀល អនុភូមិ ១៨ម៉ឺនរៀល និងសមាជិកភូមិ ១៦ម៉ឺនរៀល។
សូមបញ្ជាក់ផងដែរថា កាលពី២០១៦ មេឃុំ ចៅសង្កាត់ ទទួលបានប្រាក់ឧបត្ថម្ភចំនួន៧៥ម៉ឺនរៀល ជំទប់ និងចៅសង្កាត់ ទទួលបាន៥៥ម៉ឺនរៀលនិងសមាជិកក្រុមប្រឹក្សាឃុំ សង្កាត់ ទទួលបាន ៤៨ម៉ឺនរៀល ហើយមេភូមិ ទទួលបានប្រាក់ឧបត្ថម្ភ ២០ ម៉ឺនរៀល អនុប្រធានភូមិ ១៦ ម៉ឺនរៀល និងសមាជិកភូមិបាន ១៤ ម៉ឺនរៀល៕
