Monday, August 27, 2018

ក្មេងឃ្វាលគោ៤នាក់ រើសគ្រាប់បែកមកដំលេង ផ្ទុះស្លាប់១ របួសធ្ងន់៣​

អាម៉ាប៉ាប៉ាញ៉ូស

កំពង់ស្ពឺៈ ក្មេងឃ្វាលគោមួយក្រុមមានគ្នា៤នាក់ រើសគ្រាប់បែក M79មួយគ្រាប់ ដែលបន្សល់នៅតាំពីសម័យសង្គ្រាម យកមកលេង បណ្តាលឲ្យផ្ទុះស្លាប់ម្នាក់ និងរងរបួសធ្ងន់៣នាក់។

ករណី​ផ្ទុះគ្រាប់នេះ កើតឡើងនៅវេលាម៉ោង៣រសៀល​ថ្ងៃទី២៦ ខែសីហា ឆ្នាំ២០១៨ នៅចំណុចបរិវេណបន្ទាយACO ស្ថិតក្នុងភូមិក្អែកពង ឃុំតាំងស្យា ស្រុកភ្នំស្រួច ខេត្តកំពង់ស្ពឺ។

មេបញ្ជាការមូលដ្ឋានអាវុធហត្ថ ស្រុកភ្នំស្រួច លោក យស់ ឌីណា បានឲ្យដឹងថា ក្មេងរងគ្រោះទាំង៤នាក់ ទី១ឈ្មោះ ​ងោល​ តាំង​ហេង​ ភេទប្រុស ​អាយុ១០ឆ្នាំ​ ទី២, ឈ្មោះ​ សូន​ រ័ត្ន​ ភេទ​ប្រុស ​អាយុ១២ឆ្នាំ ទី៣,​ឈ្មោះ​ យ៉ែម ស្វិត​ ភេទ​ប្រុស​ អាយុ​៩ឆ្នាំ​ រងរបួស​ធ្ងន់​ ទី៤,ឈ្មោះ​ យ៉ែម​ ខ្មៅ​ ភេទ​ប្រុស​ អាយុ៦ឆ្នាំ អ្នក​ទាំងបួននាក់ រស់នៅភូមិ ក្អែក​ពង​ ឃុំតាំងស្យា​ស្រុកភ្នំស្រួច ខេត្តកំពង់ស្ពឺ។

លោកបន្តថា មុនពេលកើតហេតុ ក្មេងឃ្វាលគោទាំង៤នាក់ បានរើសបានគ្រាប់បែកមួយគ្រាប់ប្រភេទM79 យកទៅដំលេងរួច បណ្តាលឲ្យ​ផ្ទុះ ធ្វើឲ្យ​ក្មេងប្រុសឈ្មោះ ងោល តាំងហេង ស្លាប់នៅនិងកន្លែងកើតហេតុ និងក្មេង៣នាក់ទៀត រងរបួសធ្ងន់ធ្ងរ ត្រូវបានក្រុមគ្រួសារដឹកបញ្ជូនទៅសង្គ្រោះនៅមន្ទីរពេទ្យបង្អែក ខេត្តកំពង់ស្ពឺ។ ចំណែសពក្មេងរងគ្រោះ ត្រូវបានមន្ត្រីជំនាញប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

@Amapapa.News

Feature Ads