ភ្នំពេញៈ បុរសម្នាក់ជាមន្ត្រីនគរបាលផ្នែកខាងមន្ទីរប្រយុទ្ធប្រឆាំងគ្រឿងញៀន បានដកកាំភ្លើងខ្លីមួយដើមវាយទៅលើបុរសម្នាក់ទៀត បណ្តាលឲ្យបែកក្បាលហូរឈាមស្រោចខ្លួន បន្ទាប់ពីជិះម៉ូតូប៉ះគ្នាបន្តិចបន្តួច បង្កជាការភ្ញាក់ផ្អើល កើតមានឡើងកាលពីវេលាម៉ោង៩និង៤០នាទីយប់ ថ្ងៃទី២៣ ខែតុលា ឆ្នាំ២០១៨ ត្រង់ចំណុចខាងកើងផ្សារ ហេងលី ប្រមាណ២០០ម៉ែត្រ តាមបណ្ដោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ។
ជនរងគ្រោះឈ្មោះ ហេង ទិក ភេទប្រុស អាយុ៤៨ឆ្នាំ ជាអ្នករត់ម៉ូតូឌុប ស្នាក់នៅភូមិត្រពាំងឈូក សង្កាត់អូបែកក្អម ខណ្ឌសែនសុខ។ ចំណែកជនបង្កមានវ័យជាង៥០ឆ្នាំ មិនបានស្គាល់ឈ្មោះនោះទេ គ្រាន់តែដឹងថា ជាមន្ត្រីនគរបាលខាងមន្ទីរប្រយុទ្ធប្រឆាំងគ្រឿងញៀន។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់ជាជនបង្កបានជិះម៉ូតូមួយគ្រឿងម៉ាក ហុងដាភីស៊ីអ៊ិច ពណ៌ខ្មៅ មិនចាំស្លាកលេខ និងមានម៉ូតូបើកដេញតាមពីក្រោយមួយគ្រឿងទៀតម៉ាក ហុងដាហុងដា ស៊េរី២០១០ ពណ៌ខ្មៅ ពាក់ស្លាកលេខ ភ្នំពេញ1FI-3685 បើកបរដោយបុរសជាជនរងគ្រោះ និងម៉ូតូមានសភាពបែកកាបាំងផ្នែកខាងស្តាំ។ ដោយម៉ូតូទាំងពីរគ្រឿង បានបើកប្រដេញគ្នា តាមបណ្ដោយផ្លូវ២៧១ ក្នុងទិសដៅមកពីស្ពានអាកាស៧មករា ឆ្ពោះឡើងទៅស្តុបណូគា លុះមកដល់ចំណុចកើតហេតុ ម៉ូតូទាំង២គ្រឿង ក៏បានឈប់ ចុះនិយាយគ្នាយ៉ាងតឹងសរសៃករៀងៗខ្លួន។
បន្ទាប់មកស្រាប់តែជនបង្កបានដកកាំភ្លើងខ្លីមួយដើមម៉ាក K54 ចេញពីចង្កេះ យកវាយទៅលើក្បាលរបស់ជនរងគ្រោះ បណ្តាលឲ្យបែកឈាមហូរស្រោចខ្លួន ហើយក៏កើតជាការប្រតាយប្រតប់គ្នាឡើង។ មួយសន្ទុះក្រោយមក ក៏ស្រាប់តែជនបង្កបានដកលុយចំនួន២០០ដុល្លារអោយទៅជនរងគ្រោះ រួចក៏ឡើងម៉ូតូជិះចេញទៅផ្ទះរបស់ខ្លួន នៅត្រង់ចំណុចផ្ទះអត់លេខ ផ្លូវ៣៧១សឡា ស្ថិតក្នុងសង្កាត់អូរបែកក្អម ខណ្ឌសែនសុខ។ ខណៈអ្នកដែលឃើញហេតុការណ៍បានរាយការណ៍ជូនទៅសមត្ថកិច្ចមូលដ្ឋាន ហើយកម្លាំងសមត្ថកិច្ចមូលដ្ឋាន ក៏បានចុះទៅធ្វើការឃាត់ខ្លួនជនបង្កដល់ផ្ទះរបស់ភ្លាមៗ រួចនាំយកទៅសាកសួរនាំនៅឯអធិការដ្ឋាននគរបាលខណ្ឌសែនសុខតែម្តង។
បើតាមសម្តីជនរងគ្រោះ បានរៀបរាប់ប្រាប់ឲ្យដឹងថា មុនពេលកើតហេតុ គាត់បានជិះម៉ូតូតាមបណ្ដោយផ្លូវ៥៩៨ ក្នុងទិសដៅពីជើងទៅត្បូង លុះមកដល់ចំណុចខាងក្រោម ស្ពានអាកាស៧មករា ស្ថិតក្នុងសង្កាត់ទឹកថ្លា ខណ្ឌសែនសុខ ស្រាប់តែជនបង្កបានជិះម៉ូតូមួយគ្រឿងទៀតមកបុកម៉ូតូរបស់គាត់ បណ្តាលឲ្យដួលរងការខូចខាតបែកកាបាំង។ ភ្លាមៗនោះជនបង្កខាងលើមិនបានឈប់ ដើម្បីធ្វើការដោះស្រាយគ្នានោះទេ គឺបានព្យាយាមបើកម៉ូតូរត់គេចខ្លួន ហើយគាត់ក៏បានលើម៉ូតូជិះដេញតាមពីក្រោយរហូតមកចំណុចកើតហេតុខាងលើ ទើបជនបង្ករូបនោះព្រមឈប់ម៉ូតូ។ បន្ទាប់មកគាត់ ក៏បាននិយាយសម្របសម្រួលគ្នា ដើម្បីឲ្យជនបង្កចេញសំណងថ្លៃការខូចខាតមកឲ្យរូបគាត់ តែពេលនោះស្រាប់តែជនបង្កបានដកកាំភ្លើងខ្លីមកវាយក្បាលរូបគាត់បណ្តាលឲ្យបែក និងបម្រុងនឹងបាញ់រូបគាត់ទៀតផង ភ្លាមនោះគាត់ក៏ស្រវេស្រវាចាប់កាំភ្លើង រួចមួយសន្ទុះក្រោយមកជនបង្កក៏បានដកលុយចំនួន២០០ដុល្លារមកអោយគាត់ ហើយក៏ជិះម៉ូតូចេញទៅបាត់។
បច្ចុប្បន្នជនរងគ្រោះនិងជនបង្កត្រូវរួមទាំងវត្ថុតាង ត្រូវបានសមត្ថកិច្ចនាំខ្លួនយកទៅសាកសួរនាំ និងឃុំខ្លួនបណ្ដោះអាសន្ននៅឯអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើដោះស្រាយនិងចាត់វិធានការទៅតាមផ្លូវច្បាប់នៅពេលក្រោយ៕
