លោក យ៉ែម ប៉ុញ្ញឫទ្ធិ អតីតមន្ត្រីជាន់ខ្ពស់របស់បក្សប្រឆាំងដែលកំពុងរស់នៅបរទេសបានលើកឡើងថា៖ ក្រោយការចាប់ខ្លួនលោក កឹម សុខា ប្រធានអតីតគណបក្សសង្គ្រោះជាតិ ទាំងកណ្ដាលអធ្រាត្រ យប់ថ្ងៃទី២ឆ្លងចូលថ្ងៃទី៣ ខែកញ្ញា ឆ្នាំ២០១៧ រួចនាំខ្លួនទៅឃុំឃាំងនៅត្រពាំងផ្លុង "ម៣" ហើយត្រូវបានប្ដូរកន្លែង មកឃុំខ្លួនក្នុងផ្ទះរបស់គាត់នៅទួលគោក ភ្នំពេញ នាព្រឹកព្រលឹមម៉ោងជាង៣ ពីថ្ងៃទី១០ ខែកញ្ញា ឆ្នាំ២០១៨ និងក្រោយពីការរំលាយគណបក្សសង្គ្រោះជាតិ កន្លងមក នាំឱ្យកើតមានបញ្ហាអវិជ្ជមានជាច្រើនទាំងមតិជាតិ និងអន្តរជាតិ ស្ដីពីការគោរពសិទ្ធិមនុស្ស ពីដំណើរការប្រជាធិបតេយ្យសេរីពហុបក្ស ដូចជាការបោះឆ្នោតមិនសេរី និងមិនត្រឹមត្រូវ ដែលមិនឆ្លុះបញ្ចាំងពីឆន្ទៈ រាស្ត្រ។ ការលើកឡើងបែបនេះតាមរយៈហ្វេសប៊ុកនៅថ្ងៃទី២២ ខែតុលា ឆ្នាំ២០១៨។
ជាងនេះទៅទៀត លោក យ៉ែម ប៉ុញ្ញឫទ្ធិ ទាមទារឱ្យមានការដោះលែង ផ្ដល់យុត្តិធម៌ ផ្ដល់សិទ្ធិសេរីភាព ជូនលោកវិញ ដោយផ្ដើមចេញពីគ្រឹះនៃការផ្សះផ្សាជាតិ ការគោរពមតិប្រជាពលរដ្ឋ នៃសង្គមជាតិទាំងមូល ដោយមតិភាគច្រើនផ្ដល់ឱកាសស្មើគ្នាដល់មតិភាគតិច ក្នុងការនិយាយស្តី ឬការរិះគន់ស្ថាបនា ដោយមិនត្រូវធ្វើឱ្យណាមួយ ភាគីណាមួយរងនូវការឈឺចាប់ ដោយអំពើអយុត្តិធម៌ពីក្រុមម្ខាងទៀត គឺជាការប្រកួតគ្នាបម្រើជាតិ។
មុនខួបមួយថ្ងៃនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ស្ដីពីកម្ពុជាដោយតម្កល់ផលប្រយោជន៍ជាតិជាធំ ប្រយោជន៍ជាតិខ្មែរដែលខ្មែរគ្រប់រូបខិតខំរហូតដល់ទទួលបានកិច្ចព្រមព្រៀងនេះ លោក យ៉ែម ប៉ុញ្ញឫទ្ធិ អះអាងថាពុំត្រូវបានអនុវត្តបានពេញលេញ ថែមទាំងបានដើរថយក្រោយយ៉ាងខ្លាំងក្នុងរយ:ពេលប៉ុន្មានឆ្នាំចុងក្រោយនេះ។ កិច្ចការជាច្រើនទៀតដែលយើងត្រូវពុះពាររាល់ឧបសគ្គដើម្បីការផ្សះផ្សាជាតិ សិទ្ធិសេរីភាព ប្រជាធិបតេយ្យ យុត្តិធម៌ សម្រាប់ប្រជាជាតិខ្មែរយើង។