ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីបានបន្តបញ្ជាក់អំពីសេចក្តីស្នើវិសោធនកម្មមាត្រា៤៥ថ្មី នៃច្បាប់ស្តីពីគណបក្សនយោបាយចូលជាធរមានហើយ អ្នកនយោបាយដែលជាប់បម្រាម អាចធ្វើនយោបាយបាននោះទេ។
ការលើកឡើងរបស់ប្រមុខរាជរដ្ឋាភិបាលនេះ ខណៈដែលមានមតិមួយចំនួនបានធ្វើការ បកស្រាយខុសពីគោលការណ៍ ដែលច្បាប់បានកំណត់។
សម្តេចតេជោ ហ៊ុន សែន បានលើកឡើងក្នុងពិធីជួបសំណេះសំណាលជាមួយកម្មករនៅខេត្តកណ្តាល នាព្រឹកថ្ងៃទី២៦ ធ្នូ យ៉ាងដូច្នេះថា ខ្ញុំមិនចង់តបតជាមួយអ្នកណានោះទេ ប៉ុន្តែខ្ញុំមិនចង់ឲ្យខ្មែរយើងបន្តចាញ់បោកអ្នកណាទៀតទេ។ រឿងជម្លោះរបស់អ្នកដទៃ បក្សដទៃ ក្រុមដទៃ ទុកឲ្យគេទាស់គ្នាទៅ។ វាបានចេញច្បាប់មកហើយ កុំចាំបាច់មនុស្សម្នាក់ ឬពីរនាក់ ក្លាយជាមនុស្សម្នាក់នោះវាទៅមិនរួចទេ!។
សម្តេចបញ្ជាក់ថា «ប៉ុន្តែអ្វីដែលខ្ញុំសូមផ្តាំ នៅក្នុងពេលនេះ ច្បាប់ស្តីពីការផ្តល់សិទ្ធិឲ្យនាយករដ្ឋមន្ត្រីតាមសំណើរដ្ឋមន្ត្រីក្រសួងមហាផ្ទៃ ស្នើទៅព្រះមហាក្សត្រ ត្រូវបានព្រឹទ្ធសភាអនុម័តរួចហើយ បន្ទាប់ទៅត្រូវបញ្ជូនទៅក្រុមប្រឹក្សាធម្មនុញ្ញ ហើយពេលក្រុមប្រឹក្សាធម្មនុញ្ញពិនិត្យ នឹងដាក់ថ្វាយព្រះមហាក្សត្រឡាយព្រះហត្ថលេខា»។
សម្តេចបន្តថា “ខ្ញុំសូមបញ្ជាក់សារជាថ្មីចំពោះមនុស្សមួយចំនួន ដែលធ្វើមិនយល់ថា ច្បាប់នេះធ្វើសម្រាប់បណ្តាគណបក្សនយោបាយទាំងអស់ នៅពេលខាងមុខ មិនមែនតម្រូវមនុស្សមួយក្រុមណាជាក់លាក់នោះទេ។ ពិតហើយមនុស្សមួយចំនួនកំពុងជាប់បម្រាមនេះ! (មន្ត្រីបក្សប្រឆាំង) មិនមែនច្បាប់នេះ ចេញហើយរួចខ្លួននោះទេ អ្នកឯងត្រូវធ្វើការសុំម្តងម្នាក់ មិនមែនសុំមួយកញ្ចប់ទេ។ ផ្តាំឲ្យហើយ អ្នកឯងអាចជ្រើសរើសទៅ អ្នកឯងអាចស្នើសុំរដ្ឋមន្ត្រីក្រសួងមហាផ្ទៃផ្ទាល់។ រដ្ឋមន្ត្រីក្រសួងមហាផ្ទៃលើកសំណើទៅនាយករដ្ឋមន្ត្រី ហើយនាយករដ្ឋមន្ត្រីលើកសំណើថ្វាយទៅព្រះមហាក្សត្រ។ ព្រះមហាក្សត្រចេញព្រះរាជក្រឹត្យលើកលែងបម្រាមនោះ! នេះជាជម្រើសទី១»។
សម្តេចបន្តថា ជម្រើសទី២.អ្នកជាប់បម្រាមអាចលើកសំណើទៅផ្ទាល់នាយករដ្ឋមន្ត្រី ហើយនាយករដ្ឋមន្ត្រី បញ្ជូនទៅរដ្ឋមន្ត្រីក្រសួងមហាផ្ទៃ ដើម្បីពិនិត្យថា ត្រឹមត្រូវតាមលក្ខខណ្ឌឬអត់ រួចហើយរដ្ឋមន្ត្រីក្រសួងមហាផ្ទៃលើកសំណើមកនាយករដ្ឋមន្ត្រី ដើម្បីលើថ្វាយទៅព្រះមហាក្សត្រសុំលើបម្រាមនោះទេ។ ជម្រើសទី៣ អ្នកអាចថ្វាយលិខិតផ្ទាល់ទៅព្រះមហាក្សត្រ ដើម្បី ស្នើសុំលើកលែង។ តាមទម្លាប់ធម្មតាព្រះមហាក្សត្រ គឺបញ្ជូនមកនាយករដ្ឋមន្ត្រី មានយោបល់ ។ នាយករដ្ឋមន្ត្រី នឹងផ្តល់សំណើនោះទៅឲ្យរដ្ឋមន្ត្រីក្រសួងមហាផ្ទៃ ពិនិត្យថា ត្រឹមត្រូវហើ យបញ្ជូនមកនាយករដ្ឋមន្ត្រីវិញ ដើម្បីថ្វាយទៅព្រះមហាក្សក្រដើម្បីលើកលែងបម្រាមនោះ។
សម្តេចក៏បានលើកឡើងថា ការស្នើសុំដកបម្រាមនេះ ត្រូវធ្វើឡើងម្នាក់ម្តងៗ តាមលក្ខខណ្ឌសម្បត្តិរបស់មនុស្សម្នាក់ៗ។
សម្តេចក៏បានឆ្លើយតបចំពោះក្រុមមន្ត្រីប្រឆាំង ដែលជាប់បម្រាមថា មិនស្នើសុំយ៉ាងដូច្នេះ ថា «ពិតហើយយើងដឹងថាមានអ្នកមិនស្នើសុំ។ បាទ! មិនស្នើសុំខ្ញុំសូមអរគុណ ព្រោះអ្នកត្រូវដឹងថា អ្នកដែលមិនស្នើសុំក៏មិនត្រូវបានចូលរួមការបោះឆ្នោតឃុំសង្កាត់ នៅឆ្នាំ២០២២ ដែរ។ អ្នកជ្រើសរើសទៅ! រវាងអ្នកម្ខាងអ្នកសុំអ្នកនោះ នឹងទទួលបានសិទ្ធិធ្វើនយោបាយពីឥឡូវ ដើម្បី រៀបចំកម្លាំងចូលរួមការបោះឆ្នោតនៅឆ្នាំ២០២២។ ប៉ុន្តែប្រសិនបើអ្នកនៅជាប់បម្រាម ដែលធ្វើនយោបាយនោះនឹងត្រូវទទួលទោសបន្ថែមទៀត»។
សម្តេចសង្កត់ធ្ងន់ថា «អ្នកគិតមើលទៅ ចំណេញខាត នៅកន្លែងណាអ្នកគិតមើលទៅ ខ្ញុំអត់បង្ខំអ្នកទេ! តែច្បាប់បានបើកហើយ។ ពីមុននេះបានស្នើសុំ ប៉ុន្តែសាលាដីកាតុលាការកំពូលដែលចេញហើយបិទផ្លូវតវ៉ា។ ឥឡូវយើងបើកច្រកហើយ អ្នកចង់ចេញ ក៏ចេញ អ្នកចង់ចូលក៏ចូល។ ផ្ទុយទៅវិញមិនចូលខ្ញុំសូមអរគុណ។ ព្រោះជៀសវាងការរញ៉េរញ៉ៃ »។
សម្តេចក៏បានលើកឡើងថា ប្រសិនបើគ្មានការស្នើសុំរបស់ក្រុមមន្ត្រី របស់អតីតគណបក្ស ប្រឆាំងនេះ ក៏មានគណបក្សនយោបាយជាង២០ គណបក្ស ឬលើសពីនេះ ដែលកំពុងធ្វើនយោបាយនៅក្នុងប្រទេសដែរ។ សម្តេចថា «អត់ពួកអ្នកឯង ក៏មានគណបក្សនយោបាយជាង២០ កំពុងធ្វើនយោបាយ ហើយកំពុងរៀបចំសកម្មភាពពង្រឹងខ្លួនរបស់គេ ក្នុងការចូលរួមការ បោះឆ្នោតឃុំ សង្កាត់នៅឆ្នាំ២០២២ អ្នកគិតទៅ។ ខ្ញុំមិនបង្ខំអ្នកទេ ក៏ប៉ុន្តែ ខ្ញុំគ្រាន់តែចង់ប្រាប់ អ្នកថា បើអ្នកចប់ ហើយអ្នកត្រូវច្បាស់ថា អ្នកមិនអាចសម្លាប់រដ្ឋាភិបាលភ្នំពេញ តាមអ្វីដែលអ្នកចង់បាននោះទេ ! តាមអ្វីដែលហៅថាការគាប់សង្កត់ពីខាងក្រៅនោះទេ។ ខ្ញុំនិយាយថា ចាំសេះ ដុសស្នែង»។
ជាមួយគ្នានោះដែរ សម្តេច ក៏បានលើកឡើងថា កុំសង្ឃឹមថា ខ្មោចដែលស្លាប់ទៅហើយងើបឡើងវិញ (បក្សប្រឆាំងត្រូវរំលាយអាចរស់ឡើងវិញ) ដែលរយៈពេលចុងក្រោយនេះ មានការ រៀបចំប្រមូលផ្តុំ ហើយសូមផ្តាំលោក ហេង សាល ដែលប្រធានក្រុមការងារនៅខេត្តកំពតដែលកំពុងរៀបចំរចនាសម្ព័ន្ធតាមស្រុកឃុំ ហើយថា ឲ្យមកធ្វើឡើងវិញសូមកុំសង្ឃឹម៕
