Tuesday, January 8, 2019

ប៉ូលិស​ខណ្ឌដង្កោ ចេញពីខារ៉ាអូខេ បើ​ក Highlander បុកទ្រូងផ្លូវក្រឡាប់ផ្ងារជើង មុខវត្តស្ទឹងមានជ័យ

ភ្នំពេញៈ បុរសម្នាក់ ដែលគេស្គាល់ថា ជានគរបាលផ្នែកចរាចរណ៍ខណ្ឌដង្កោ បានចេញពីខារ៉ាអូខេ សង្ស័យស្រវឹងបើ​ករថយន្តក្នុងល្បឿនលឿនរេចង្កូតទៅបុករបាំងថ្មពុះចែកទ្រូងផ្លូវក្រឡាប់ផ្ងារជើង។

គ្រោះថ្នាក់ចរាចរណ៍នេះ បានកើតឡើ​ងកាលពីវេលាម៉ោង១រំលងអធ្រាត្រឈានចូលថ្ងៃទី៨ ខែមករា ឆ្នាំ២០១៩ នៅចំណុចគល់ស្ពានអាកាសស្ទឹងមានជ័យ តាមបណ្តោយផ្លូវមុនីរ៉េត ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ​។

តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើ​ញរថយន្តមួយគ្រឿងម៉ាក Highlander ពណ៌ទឹកប្រាក់ ពាក់ស្លាកលេខភ្នំពេញ 2AN-5082 បើ​កបរដោយបុរសម្នាក់ ដែលគេស្គាល់ច្បាស់ថា​ ជាមន្ត្រីនគរបាល​ចរាចរណ៍​ សង្ស័យស្រវឹង ធ្វើដំណើរតាមបណ្តោយផ្លូវមុនីរ៉េត ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែរេចង្កូតទៅបុករបាំងថ្មពុះចែកក្រឡាប់ផ្ងារជើង ភ្លាមៗនោះម្ចាស់រថយន្តបានលូនចេញមកក្រៅហើ​យត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ។

ចំណែករថយន្តត្រូវបានសមត្ថកិច្ចមូលដ្ឋាន​រាយការណ៍​ប្រាប់សមត្ថកិច្ចជំនាញ ចុះមកធ្វើការវាស់វែង​ និងស្ទូចយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមច្បាប់៕

Feature Ads