Tuesday, February 12, 2019

នារីជនជាតិចិន បើករថយន្ត RX300 បុក​​​បង្កាន់ដៃស្ពានបឹងសាឡាង​ លាន់ដូចរន្ទះ​ សំណាងមិនធ្លាក់ប្រឡាយលូទឹកស្អុយ​

ភ្នំពេញៈ រថយន្ត​ LEXUS RX300 មួយគ្រឿង​ បើ​កលឿនដូចហោះ​ បួងចង្កូតមិនទាន់​ ជ្រុលទៅបុកបង្កាន់ដៃស្ពានថ្ម លាន់ដូចរន្ទះ​ បណ្ដាលឲ្យរថយន្ត​រងការខូចខាតខ្ទេចយ៉ាងដំណំ​ និងផ្ទុះបែកកង់មុខខាងស្ដាំ បើ​កទៅមុខលែងរួច​ ផ្ទុះពោងសុវត្ថិភាពផងដែរ​ តែសំណាងល្អ​ មិនជ្រុលធ្លាក់ទឹកប្រឡាយលូទឹកស្អុយ​ ហើយក៏មិនមាននរណាម្នាក់​របួសនោះទេ​។

គ្រោះថ្នាក់ចរាចរណ៍នេះ​ បានកើតឡើងនៅវេលាម៉ោង៤៖​១៥នាទីទៀបភ្លឺ​ ឈានចូលថ្ងៃអង្គារ៍​ ទី១២​ ខែកុម្ភៈ​ ឆ្នាំ២០១៩នេះ នៅចំណុចគល់ស្ពាន​ថ្មបឹងសាឡាង លើ​កំណាត់ផ្លូវលេខ៣៣៦​ ស្ថិតក្នុងសង្កាត់បឹងសាឡាង​ ខណ្ឌទួលគោក​ រាជធានីភ្នំពេញ​ ។

ប្រភពព័ត៌មានពីកន្លែងកើតហេតុបានឲ្យដឹងថា​ មុនពេលកើតហេតុ​ គេឃើ​ញរថយន្ត​មួយគ្រឿង​ ម៉ាក LEXUS RX300 ពណ៌ស​ ពាក់ស្លាកលេខភ្នំពេញ​ 2AR-9457 បើ​កបរដោយនារីជនជាតិចិនម្នាក់​ តែងខ្លួនជាប្រុស​ រួមដំណើ​រដោយនារីរូបស្រស់ជនជាតិខ្មែរម្នាក់ទៀត ធ្វើដំណើ​រតាមបណ្ដោយផ្លូវលេខ៣៣៦​ ទិសដៅពីលិចទៅកើត ក្នុងល្បឿនលឿន​ លុះមកជិតដល់គល់ស្ពានថ្មបឹងសាឡាង ជាចំណុចកើតហេតុនោះ ស្រាប់តែជ្រុលចង្កូតទៅបុកបង្កាន់ដៃស្ពានថ្មនោះពេញមួយទំហឹង លាន់លឺដូចរន្ទះ​ បណ្ដាលឲ្យរថយន្ត​រងការខូចខាតខ្ទេចផ្នែកខាងមុខយ៉ាងដំណំ​ បែកកង់និងដាច់កាឡេកង់មុខខាងស្ដាំ បើ​កទៅមុខលែងរួច​ ហើ​យផ្ទុះពោងសុវត្ថិភាពចេញពីចង្កូតរថយន្តផងដែរ​ តែសំណាងមិនជ្រុលធ្លាក់ចូលទឹកស្អុយ និងមិនមាននរណាម្នាក់​ រងរបួសនោះទេ​ ។

ភ្លាមៗនោះគេឃើ​ញអ្នកបើ​កបររថយន្ត និងអ្នករួមដំណើ​រ បានប្រមូលយករបស់មានតម្លៃទុក​ រួចនាំគ្នា​ប្រញាប់ប្រញាល់​គេចចេញពីកន្លែងកើ​តហេតុបាត់អស់ទៅ ទើ​បប្រជាពលរដ្ឋ​នៅក្បែរកន្លែងកើ​តហេតុ​ ចេញមកចោមរោមមើល ហើ​យរាយការណ៍ប្រាប់ឲ្យសមត្ថកិច្ចមូលដ្ឋានបានដឹងដំណឹងនេះ​ភ្លាមផងដែរ។

ក្រោយកើតហេតុកម្លាំងល្បាតប៉ុស្តិ៍នគរបាលបឹងសាឡាង​បានចុះមកដល់កន្លែងកើតហេតុ ហើយទាក់ទងទៅសមត្ថកិច្ចផ្នែកវាស់វែង នៃអធិការដ្ឋាននគរបាលខណ្ឌទួលគោក​ ចុះមកពិនិត្យមើ​លជាក់ស្ដែង​សិន​ រួចទាក់ទងរាយការណ៍ទៅសមត្ថកិច្ចជំនាញចរាចរណ៍ក្រុង​ ចុះមកធ្វើការវាស់វែង និងស្ទូចយករថយន្តបង្កទៅរក្សាទុកបណ្ដោះអាសន្ន​ នៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ​ ដើម្បីរង់ចាំទាក់ទងម្ចាស់រថយន្តចូលខ្លួនដោះស្រាយតាមច្បាប់៕

Feature Ads