ភ្នំពេញៈ កម្លាំងសមត្ថកិច្ចខណ្ឌដូនពេញ ធ្វើការឃាត់ជនបរទេសម្នាក់ ជាជនជាតិវៀតណាម ដែលបានបង្ហោះដ្រូន Drone នៅតំបន់ហាមឃាត់ បន្ទាប់ពីជនជាតិវៀតណាមរូបនេះ បានឈរក្នុងវត្តលង្កាបង្ហោះដ្រូន មកលើភូមិគ្រឹះសម្ដេចតេជោ និងបាននាំទៅប៉ុស្តិ៍រដ្ឋបាលសង្កាត់ចតុមុខ ដើម្បីសាកសួរបន្ត។ ការឃាត់ខ្លួននេះ ធ្វើឡើងកាលពីវេលាម៉ោង១៖៤១នាទីរសៀល ថ្ងៃអាទិត្យ ៥កើត ខែផល្គុន ឆ្នាំច សំរឹទិ្ធស័ក ព.ស ២៥៦២ ត្រូវនឹងថ្ងៃទី១០ ខែមីនា ឆ្នាំ២០១៩នេះ។
សមត្ថកិច្ចខណ្ឌដូនពេញ បានឲ្យដឹងថា បច្ចុប្បន្នបុរសជនជាតិវៀតណាមរូបនេះ ត្រូវបានបញ្ជូនទៅនាយកដ្ឋានសន្តិសុខ ក្រសួងមហាផ្ទៃ ដើម្បីបន្តនីតិវិធី។
គួរបញ្ជាក់ថា កន្លងមក រដ្ឋបាលរាជធានីភ្នំពេញ ធ្លាប់ចេញសេចក្តីជូនដំណឹង ដោយហាមឃាត់ការបង្ហោះ Drone នៅតំបន់ហាមឃាត់មួយចំនួន ក្រោមហេតុផលប៉ះពាល់សន្តិសុខ និងសិទ្ធិឯកជន របស់ប្រជាពលរដ្ឋ ប៉ុន្តែជារឿយៗឃើញថា នៅតែមានអ្នកបំពាន លួចបង្ហោះ Drone នៅតាមតំបន់ហាមឃាត់ ក្នុងរាជធានីភ្នំពេញ ហើយត្រូវបានឃាត់ខ្លួនជាបន្តបន្ទាប់៕
