បណ្ឌិត ឈ​ត ប៊ុន​ថង ៖ ត្រូវតែជឿថា កូវីដ១៩គឺជាជំងឺឆ្លងដ៏កាចសាហាវដែលត្រូវប្រុងប្រយ័ត្ន

បណ្ឌិត ឈ​ត ប៊ុន​ថង សាស្ត្រាចារ្យ​ទស្សនវិជ្ជា​នៃ​រាជបណ្ឌិត្យសភាកម្ពុជាបានលើកឡើងនូវទស្សនៈដូចខាងក្រោមថា៖

១.សូមមិត្តភក្ដិ បងប្អូនជនរួមជាតិទាំងអស់ ត្រួវតែជឿថា
កូវីដ១៩ ពិតជាជំងឺឆ្លងជាសាកលនិងកាចសាហាវដូចដែលអង្គការសុខភាពពិភពលោកបានប្រកាស។

២.សូមស្តាប់និងអនុវត្តតាមការណែនាំរបស់ក្រសួងសុខាភិបាលកម្ពុជា, ការណែនាំរបស់អង្គការសុខភាពពិភពលោក, បទពិសោធនរបស់ប្រទេសដែលបានឆ្លងជំងឺនេះមុនប្រទេសរបស់យើង និងពិចារណាបន្ថែមដោយខ្លួនឯង។

៣.កុំស្លន់ស្លោពេក តែកុំប្រមាទ កុំមើលងាយ កុំបោះបង់ការប្រុងប្រយ័ត្ន កុំធ្វេសប្រហែស និងកុំជឿលើព័ត៌មានមិនពិតឬព័ត៌មានមិនសមហេតុផល ព្រមទាំងត្រូវចេះយកអ្វីដែលយើងបានឃើញ អ្វីដែលបានឮ មកផ្ទៀងផ្ទាត់ ពិចារណា និងវាយ
តម្លៃដោយខ្លួនឯង មុននឹងជឿ សម្រេចចិត្ត និងអនុវត្ដតាម។

៤.សូមកុំយក កូរីដ១៩ ទៅភ្ជាប់នឹងរឿងកំប្លែង រឿងនយោបាយ ឬរឿងរើសអើង ដែលអាចធ្វើឱ្យប្រជាជនរបស់យើងភ្លេចប្រុងប្រយ័ត្ន មានការបែកបាក់ និងមហន្តរាយកាន់តែធំ៕