ភ្នំពេញ៖ ក្រុមហ៊ុនChina Good Cars Holding Ltd គ្រោងចំណាយប្រាក់១៦០លានដុល្លារ វិនិយោគលើស្ថានីយ៍ចំណតយានយន្តធុនធំនៅកម្ពុជា ដើម្បីចូលរួមចំណែកកាត់បន្ថយការកកស្ទះចរាចរណ៍នៅរាជធានីភ្នំពេញ។ ក្រុមហ៊ុន បានបង្ហាញគម្រោងវិនិយោគនេះ ទៅលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន នៅក្នុងជំនួបពិភាក្សា នាព្រឹកថ្ងៃទី៥ ឧសភា។
តំណាងក្រុមហ៊ុន China Good Cars Holding Ltd បានស្នើសុំវិនិយោគសាងសង់ស្ថានីយ៍ចំណតយានយន្តធុនធំ និងទំនើប នៅជាយរាជធានីភ្នំពេញ ដើម្បីរំដោះចរាចរណ៍ដ៏មមាញឹកពីចំណុចកណ្តាលរាជធានី ព្រមទាំងចង់វិនិយោគលើគម្រោងដឹកជញ្ជូនសាធារណៈ តាមរថយន្តក្រុងលើបណ្តាញផ្លូវជាតិ ដើម្បីតភ្ជាប់ទៅតំបន់ក្រៅក្រុង និងទៅបណ្តាខេត្តនានា នៅជិតរាជធានីភ្នំពេញទៀតផង។
លោក ស៊ុន ចាន់ថុល មិនបដិសេធបំណងរបស់ក្រុមហ៊ុនចិននេះឡើយ។ រដ្ឋមន្រ្តីសាធារណការ ប្រាប់ឱ្យក្រុមហ៊ុនសហការជាមួយអគ្គនាយកដ្ឋានដឹកជញ្ជូនផ្លូវគោក សិក្សាលើលក្ខណៈបច្ចេកទេសឱ្យបានល្អិតល្អន់ និងសុំឱ្យក្រុមហ៊ុនដាក់ពាក្យស្នើសុំវិនិយោគ ទៅច្រកចេញចូលតែមួយ នៃក្រុមប្រឹក្សាអភិវឌ្ឍន៍កម្ពុជា ដើម្បីអាចទទួលបានភាពអនុគ្រោះ ស្របទៅតាមច្បាប់វិនិយោគនៃកម្ពុជា។
ការកកស្ទះចរាចរណ៍ បានបង្កការលំបាកយ៉ាងច្រើនដល់ពលរដ្ឋ ខាតពេលវេលា ប៉ះពាល់អារម្មណ៍ សុខភាព និងខាតបង់ផ្នែកសេដ្ឋកិច្ចជាដើម។ ការកកស្ទះចរាចរណ៍ បានធ្វើឲ្យកម្ពុជាខាតបង់ថវិកាចំនួន៦លានដុល្លារក្នុងមួយខែ។ នេះនៅមិនទាន់រាប់បញ្ចូលនូវគ្រោះថ្នាក់ ចរាចរណ៍ដែលធ្វើឲ្យខាតបង់ដល់ផលទុនជាតិ និងប្រជាជនសរុបប្រមាណ ៣០០ លានដុល្លារក្នុងមួយឆ្នាំៗនោះទេ។ នេះបើតាមការលើកឡើងរបស់អាជ្ញាធរក្រុងភ្នំពេញកន្លងមក៕
ផ្ដល់សិទ្ធិដោយ៖ Khmernas