មនុស្សកើនឡើងជាង៣០នាក់បានស្លាប់ដោយសារភ្លើងឆេះព្រៃ ដែលកំពុងកើនឡើងនៅតាមបណ្ដាររដ្ឋនៅភាគខាងលិចសហរដ្ឋអាមេរិក ខណៈមនុស្សរាប់សិបនាក់ផ្សេងទៀតកំពុងបាត់ខ្លួននៅក្នុងរដ្ឋ Oregon ហើយមន្រ្តីរដ្ឋនេះនិយាយថា រដ្ឋគួរតែត្រៀមសម្រាប់ឧប្បត្តិហេតុនៃការស្លាប់ដ៏ធំមួយ។
សារព័ត៌មាន BBC បានចុះផ្សាយនៅថ្ងៃទី១៣កញ្ញាថា អគ្គិភ័យកំពុងឆាបឆេះនៅរដ្ឋ Oregon រដ្ឋCalifornia និងរដ្ឋ Washington អស់រយៈពេល៣សប្តាហ៍មកហើយ ដោយបានដុតបំផ្លាញដីរាប់លានហិចតា ឆេះបំផ្លាញផ្ទះសម្បែងពលរដ្ឋរាប់ពាន់ខ្នង និងធ្វើឱ្យមនុស្សរាប់ម៉ឺននាក់ត្រូវបង្ខំចិត្តរត់ចេញពីផ្ទះ។
លោកប្រធានាធិបតី ដូណាល់ ត្រាំ ដែលគ្រោងនឹងធ្វើទស្សនកិច្ចនៅរដ្ឋCaliforniaនៅថ្ងៃច័ន្ទនេះ ដើម្បីបទបង្ហាញសង្ខេបអំពីស្ថានភាពចុងក្រោយបំផុត គឺទើបបានស្តីបន្ទោសថា ភ្លើងឆេះព្រៃកើតឡើងដោយសារការគ្រប់គ្រងព្រៃឈើមិនបានល្អ។
ការបំពុលដោយផ្សែងចេញពីភ្លើងឆេះព្រៃ បានធ្វើឱ្យទីក្រុងធំបំផុតរបស់រដ្ឋ Oregon គឺទីក្រុង Portland មានគុណភាពខ្យល់អាកាសអាក្រក់បំផុតនៅលើពិភពលោក។ រដ្ឋដែលមានក្រុមពន្លត់អគ្គីភ័យកំពុងប្រយុទ្ធនឹងអគ្គិភ័យព្រៃចំនួន១៦កន្លែង គឺបានធ្វើឱ្យមនុស្ស ៤០ ០០០ នាក់ស្ថិតនៅក្រោមបទបញ្ជាជម្លៀសចេញពីផ្ទះសម្បែង។
ការិយាល័យគ្រប់គ្រងអាសន្នរដ្ឋ Oregon បានរាយការណ៍ថា អគ្គិភ័យបានសម្លាប់មនុស្ស១០នាក់ ហើយព្រមានថា ចំនួនអ្នកស្លាប់ចុងក្រោយអាចមានច្រើន។ កាលពីប៉ុន្មានថ្ងៃថ្មីៗនេះ អភិបាលរដ្ឋ Oregon បានទទូចដល់ម្ចាស់ផ្ទះឱ្យនៅក្រៅតំបន់ភ្លើង ទោះបីមានសេចក្តីរាយការណ៍អំពីករណីឆ្លៀតឱកាសលួចនៅតាមផ្ទះ ក្នុងពេលកំពុងមានគ្រោះមហន្តរាយនេះក្ដី។
ចំណែកនៅរដ្ឋWashington អ្នកពន្លត់អគ្គិភ័យកំពុងព្យាយាមពន្លត់ភ្លើងឆេះព្រៃធំៗចំនួន១៥កន្លែង។ ក្មេងប្រុសអាយុមួយឆ្នាំបានស្លាប់កាលពីដើមសប្តាហ៍នេះ ខណៈដែលក្រុមគ្រួសារ បានព្យាយាមរត់គេចពីអគ្គិភ័យ។ ឪពុកម្តាយរបស់ក្មេងប្រុស១ឆ្នាំនេះ កំពុងស្ថិតក្នុងស្ថានភាពធ្ងន់ធ្ងរនៅឡើយ។
ជាមួយគ្នានេះ រដ្ឋ California មានមនុស្សស្លាប់ហោចណាស់ចំនួន២២នាក់ ចាប់តាំងពីមានអគ្គិភ័យឆេះព្រៃពីថ្ងៃទី១៥សីហាមក។ មនុស្សរាប់ម៉ឺននាក់កំពុងស្ថិតក្រោមការបញ្ជាជម្លៀស ខណៈដែលក្រុមពន្លត់អគ្គិភ័យចំនួន ១៤ ៨០០ នាក់ នៅតែបន្តប្រយុទ្ធនឹងអគ្គិភ័យធំៗចំនួន២៨ នៅក្នុងរដ្ឋនេះ