សង្គម
អាម៉ាប៉ាប៉ាញ៉ូសនៅយប់ថ្ងៃទី១៣ ខែកញ្ញានេះ កងយោធាមួកខៀវកម្ពុជាចំនួន១៣៩ នាក់ ក្នុងនោះនារីចំនួន១១នាក់ បានធ្វើដំណើរត្រឡប់មកដល់កម្ពុជាវិញ ក្រោយបញ្ចប់បេសកកម្មរក្សាសន្តិភាពក្រោមឆត្រអង្គការសហប្រជាជាតិនៅសាធារណរដ្ឋម៉ាលីរយៈពេលមួយឆ្នាំ។
កម្មវិធីទទួលស្វាគមន៍ការវិលត្រឡប់របស់កងកម្លាំងយោធាមួកខៀវទាំងនេះ ត្រូវបានធ្វើឡើងនៅព្រលានយន្តហោះអន្តរជាតិភ្នំពេញ។
ឧត្តមសេនីយ៍ឯក អោក សៀង អគ្គនាយករងមជ្ឈមណ្ឌលជាតិរក្សាសន្តិភាព និងជាអនុប្រធានគណៈកម្មការការងារកូវីដ-១៩ នៃមជ្ឈមណ្ឌលជាតិរក្សាសន្តិភាព បានថ្លែងថា កងយោធាមួកខៀវកម្ពុជាទាំងនេះ ត្រូវបញ្ជូនទៅធ្វើចត្តាឡីស័កនៅវិទ្យាស្ថានហ្វឹកហ្វឺនកងកម្លាំងរក្សាសន្តិភាព បណ្តុះបណ្តាលបោសសំអាតមីន និងកាកសំណល់សង្គ្រាមនៅស្រុកឧដុង្គចំនួន៤៥នាក់ និងនៅសាលាហ្វឹកហ្វឺនកងកម្លាំងពហុសាន៍ ស្ថិតក្នុងស្រុកភ្នំស្រួច ខេត្តកំពង់ស្ពឺ ចំនួន៩៤នាក់។
កាលពីថ្ងៃទី១១កញ្ញា កងកម្លាំងរក្សាសន្តិភាពកម្ពុជាចំនួន២កង មានកងអនុសេនាធំវិស្វកម្មព្រលានយន្តហោះ និងកងអនុសេនាធំកងម្ទេចគ្រាប់មានចំនួនសរុប២១៨នាក់ ក្នុងនោះមាននារី១៨នាក់ បានចេញដំណើរទៅបំពេញបេសកកម្មអង្គការសហប្រជាជាតិនៅសាធារណរដ្ឋម៉ាលី ដើម្បីប្តូរវេនឱ្យកងកម្លាំងទាំង១៣៩នាក់នេះត្រឡប់មកកម្ពុជាវិញ។
កម្ពុជាមានកងកម្លាំងរក្សាសន្តិភាពសរុបជាង៦រយនាក់ កំពុងបំពេញបេសកកម្មរក្សាសន្តិភាពអង្គការសហប្រជាជាតិ នៅតាមបណ្តាប្រទេសចំនួន៤ រួមមានប្រទេសម៉ាលី ប្រទេសស៊ូដង់ខាងត្បូង ប្រទេសអាហ្វ្រិកកណ្ដាល និងប្រទេសលីបង់ជាដើម ខណៈស្ថានភាពវិបត្តិជំងឺកូវីដ១៩ នៅតាមបណ្តាប្រទេសទាំង៤នោះ កំពុងតែរីករាលដាលនៅឡើយ។
កាលពីខែកញ្ញា សម្តេច ហ៊ុន សែន នាយករដ្ឋមន្ត្រីកម្ពុជា ធ្លាប់បានស្នើទៅអង្គការសហប្រជាជាតិ ដើម្បីសុំពន្យារពេលក្នុងការផ្លាស់ប្តូរកងទ័ពមួកខៀវនៅក្រៅប្រទេស ប៉ុន្តែក្រោយមក សម្ដេចបានសម្រេចជាថ្មីលុបចោលការសុំពន្យាពេលនោះវិញ បន្ទាប់ពីកម្ពុជាបានទទួលពេលវេលាផ្លាស់ប្តូរច្បាស់លាស់ ដែលធ្វើឱ្យងាយស្រួលក្នុងការ រៀបចំធ្វើចត្តាឡីស័កចំពោះកងកម្លាំងត្រូវវិលត្រឡប់មកប្រទេសវិញ។
សម្តេចតេជោ ហ៊ុន សែន បញ្ជាក់ថា កងទ័ពមួកខៀវកម្ពុជា ដែលនឹងត្រូវផ្លាស់ប្តូរត្រឡប់មកកម្ពុជាវិញនោះ រួម មាន មកពីប្រទេសម៉ាលី នៅខែកញ្ញានេះ មកពីស៊ូដង់ខាងត្បូងនៅខែតុលា មកពីអាហ្រ្វិកកណ្តាលនៅខែវិច្ឆកា និងត្រឡប់ពីលីបង់នៅខែមករា ឆ្នាំ២០២១។
ការស្ទាក់ស្ទើរមិនចង់ផ្លាស់ប្ដូរកងកម្លាំងរក្សាសន្ដិភាពនៅក្រៅប្រទេសនិងក្នុងប្រទេសនេះ គឺបន្ទាប់ពីមានកងទ័ពមួកខៀវ៨០នាក់ វិលត្រឡប់ពីប្រទេសម៉ាលីមកដល់កម្ពុជាកាលពីថ្ងៃទី១០កក្កដាកន្លងទៅ គឺមានចំនួន៩នាក់ត្រូវបានធ្វើតេស្ដឆ្លងជំងឺកូវីដ១៩ជាបន្តបន្ទាប់ ហើយករណីអ្នកឆ្លងទី៩ គឺធ្វើតេស្ដវិជ្ជមានបន្ទាប់អនុញ្ញាតឱ្យវិលត្រឡប់ទៅផ្ទះបានប៉ុន្មានថ្ងៃ។
កាលពីខែឧសភា អង្គការសហប្រជាជាតិក៏បានរាយការណ៍ថា កងទ័ពមួកខៀវកម្ពុជាចំនួន ១០នាក់ ដែលស្ថិតក្នុងបេសកកម្មរក្សាសន្ដិភាពនៅប្រទេសម៉ាលីបានឆ្លងជំងឺកូវីដ ១៩ ហើយក្នុងនោះមានម្នាក់បានស្លាប់បាត់បង់ជីវិត៕