សង្គម
អាម៉ាប៉ាប៉ាញ៉ូស
បន្ទាយមានជ័យ៖ មានការតវ៉ាមួយ ដែលមានមន្ត្រីយោធាជិត២០នាក់ តំណាងឲ្យជាង១០០នាក់ សុំឲ្យភរិយាលោកផ្កាយ២ ដែលធ្វើជាមេតុងទីន ហើយបានវេចលុយជិត៣០ម៉ឺនដុល្លារ រត់បាត់នោះ ត្រូវតែចេញមុខដោះស្រាយ ព្រោះការគេចមុខនេះវាស្មើនឹងបទឆបោក ។
ការតវ៉ាខាងលើនេះត្រូវបានធ្វើឡើងនៅមុខផ្ទះលោកផ្កាយ២ កាលពីថ្ងៃទី៤ កញ្ញា ឆ្នាំ២០២០ ស្ថិតនៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ។
បើតាមលោក ប៉ែន ចន្ទី ភេទប្រុស អាយុ៥៥ឆ្នាំ ជាមន្ត្រីយោធា បានប្រាប់ថា សមាជិកតុងទីនដែលមកតវ៉ាជិត២០នាក់នេះ គឺតំណាងឲ្សសមាជិកផ្សេងទៀតដែលសរុបជាង១០០នាក់ បានចាញ់បោកមេតុងទីនដែលវេចលុយរត់បាត់នេះ ដែលមានលោកស្រីភរិយា លោកផ្កាយ២ ជាមេតុងទីននេះមានឈ្មោះ សុក ឃឿន ហៅពៅ អាយុ៣៦ឆ្នាំ ជាមេតុងទីនខណៈដែលរត់បាត់ជាង២ខែមកហើយទើបដឹង។
ក្រោយដឹងដំណឹងនេះភ្លាម ក៏ផ្អើលនាំគ្នាធ្វើការតវ៉ាសុំឲ្យមេតុងទីនឈ្មោះ ចែពៅ ចូលខ្លួនមកដោះស្រាយជាមួយសមាជិកតុងទីន ដែលភាគច្រើនជាគ្រួសារមន្ត្រីយោធាកងពលតូចថ្មើរជើងលេខ៥១ នៅស្រុកព្រះនេត្រព្រះ បានចាញ់បោកច្រើនឆ្នាំមកហើយ ទើបចុងក្រោយមេតុងទីនវេចលុយជិត៣០ម៉ឺនដុល្លាររត់ចេញពីផ្ទះបិទទ្វារចោល ។
តំណាងសមាជិកបានបញ្ជាក់ថា មូលហេតុដែលពួកគាត់ហ៊ានលេងតុងទីនជាមួយអ្នកស្រី សុក ឃឿន ហៅចែពៅ នេះព្រោះគិតថាប្តីរបស់គាត់មានឋានន្តរស័ក្តិជាឧត្តមសេនីយ៍ទោមួយរូបមានតួនាទីអាចជឿជាក់ និងទុកចិត្ត តែផ្ទុយទៅវិញត្រូវបានបោកប្រាស់រត់ចោលស្រុកបែបនេះទៅវិញ ។
យ៉ាងណាក្រុមអ្នកតវ៉ាបានជួបលោកឧត្តមសេនីយ៍ទោជាប្តីបានឆ្លើយតបវិញថា លោកមិនបានដឹងទេ សំខាន់ត្រូវរកប្រពន្ធគាត់ឲ្យឃើញហើយដោះស្រាយគ្នាទៅ ។
សមាជិកតុងទីនបានបន្ថែមថាថាបើសិនជាចែពៅមិនចេញមុខដោះស្រាយទេ នឹងពឹងច្បាប់ឱ្យជួយចាត់ការហើយ ៕