សង្គម
អាម៉ាប៉ាប៉ាញ៉ូស
ក្រសួងពាណិជ្ជកម្មបានចេញប្រកាសនៅថ្ងៃទី៣កញ្ញានេះថា ដោយផ្អែកលើលទ្ធផលវិភាគសំណាកគំរូម្សៅទឹកដោះគោម៉ាក Nutrilatt ដែលខ្វះជាតិដែកខ្វះតិច មានកម្រិតទាបខ្លាំងពីលក្ខខណ្ឌតម្រូវអប្បរមា ដែលកំណត់ដោយស្តង់ដាកូដាចអន្តរជាតិ និងដើម្បីទប់ស្តាត់ផលប៉ះពាល់ដល់សុខភាពទារក និងកុមារកម្ពុជា ពីការបំបៅទឹកដោះគោម៉ាកនេះ ក្រសួង តម្រូវអោយក្រុមហ៊ុន Nutrilatt Master LM Co.,Ltd បញ្ឈប់ជាបន្ទាន់ការនាំចូល និងចែកចាយនូវផលិតផលរបស់ខ្លួន រហូតដល់មានការជូនដំណឹងឡើងវិញ។
ក្រសួងក៏តម្រូវប្រមូលត្រឡប់មកវិញនូវផលិតផលម្សៅទឹកដោះគោម៉ាក Nutrilatt ពីទីផ្សារកម្ពុជា និងប្រគល់ជូន អគ្គនាយកដ្ឋាន ក.ប.ប ដើម្បីបន្តនីតិវិធី និងតម្រូវអោយម្ចាស់ផ្សារទំនើប ឱសថស្ថាន និងហាងលក់ទំនិញនានាទូទាំងប្រទេស ផ្អាកជាបន្ទាន់ការដាក់តាំងលក់នូវផលិតផលម្សៅទឹកដោះគោសម្រាប់ចឹញ្ចឹមទារក និងកុមារ ម៉ាក Nutrilatt ទាំងអស់។
ក្រសួងពាណិជ្ជកម្ម អំពាវនាវដល់មាតាបិតា បញ្ឈប់ជាបន្ទាន់នូវការបំបៅកូនដោយទឹកដោះគោម៉ាក់ Nutrilatt និងអញ្ចើញមកដាក់ពាក្យបណ្តឹង ដោយភ្ចាប់ជាមួយឯកសារពាក់ព័ន្ធ នៅនាយកដ្ឋាក ក.ប.ប។
ជាមួយគ្នានេះដែរ ក្រសួងពាណិជ្ជកម្ម កំពុងបន្តចាត់វិធានការអោយមានប្រសិទ្ធភាពខ្ពស់លើផលិតផលនេះ ដើម្បីចូលរួមលើកកម្ពស់បំផុសសា្មរតីដល់មាតា បិតា និងអាណាព្យាបាលគ្រប់រូបលើការអនុវត្តបំបៅកូនដោយទឹកដោះម្តាយ ស្របតាមសារលិខិត របស់ សម្តេច ហ៊ុន សែន ថ្លែងក្នុងទិវាជាតិអាហារូបត្ថម្ភលើកទី៦ កាលពីថ្ងៃទី៦ ខែវិច្ឆិកាក្រោមប្រធានបទ«ការបំបៅកូនដោយទឹកដោះម្តាយ គឺជាជម្រើសដ៏ល្អប្រសើរសម្រាប់អភិវឌ្ឍមូលធនមនុស្ស និងសេដ្ឋកិច្ចជាតិ»៕