ប្រទេសថៃ បានប្រកាសរំសាយការជប់លៀងឆ្លងឆ្នាំហើយ ក្រោយពីមានការផ្ទុះករណីឆ្លងមេរោគកូវីដ១៩ខ្លាំងមែនទែននៅប៉ុន្មានថ្ងៃមកនេះ ធ្វើឲ្យរដ្ឋាភិបាល តម្រូវឲ្យប្រជាជនធ្វើការពីផ្ទះសិនផងដែរ ដើម្បីទប់ស្កាត់ការឆ្លងកាន់តែច្រើនបន្ថែមទៀត។
ដោយឡែកសាលាមួយចំនួនក៏ចាប់ផ្ដើមផ្អាក និងបើកឲ្យរៀនតាមអនឡាញផងដែរ។
កាលពីថ្ងៃអាទិត្យម្សិលមិញនេះ ប្រទេសថៃបានបញ្ជាក់ថា មានករណីឆ្លងវីរុសកូរ៉ូណាថ្មីចំនួន៥៧៦ករណីដោយក្នុងនោះមានករណីឆ្លងដល់ពលករចំណាកស្រុកចំនួន៥១៦នាក់ដែលជាប់ទាក់ទងនឹងការផ្ទុះឡើងនៅខេត្ត សាមុតសាខន មុនពេលករណីបន្ថែមទៀតត្រូវបានគេរកឃើញនៅខេត្ត នាត់ខនបាត់ថម ។
ករណីថ្មីនេះរួមមានករណីឆ្លងក្នុងសហគមន៍ចំនួន១៩ករណីនៅទីក្រុង បាងកក និងនៅខេត្ត សាមុតសាខន ដែលនៅជាប់នោះប៉ុន្តែឥឡូវខេត្តនេះត្រូវបានបិទហើយ។
យោងតាមសេចក្តីថ្លែងការណ៍របស់មជ្ឈមណ្ឌលរដ្ឋបាលស្ថានការណ៍ជំងឺកូវីដ១៩ (CCSA) បានឲ្យដឹងថា ករណីទាំងអស់គឺទាប់ទងទៅនឹងទីផ្សារបង្គានៅខេត្ត សាមុតសាខន។
