header ads

ភ្នំពេញ ៖ ​រដ្ឋមន្ត្រី​ក្រសួងកសិកម្ម បាន​បង្ហាញ​នូវ​មហិច្ឆតា ​ធ្វើ​ឲ្យ​ប្រជាកសិករ​ខ្មែរ ​អាច​ទទួល​បាន​ចំណូល​ ជា​មធ្យម​មួយ​ម៉ឺនដុល្លារ ​ក្នុង​មួយឆ្នាំ ​តាមរយៈ​ការ​ដាំដុះ​បន្លែ​សុវត្ថិភាព ​ដំណាំ​សក្ដានុពល និង​ការ​ធ្វើ​កសិកម្ម​តាម​បែប​ទំនើប​។

ដើម្បី​ជំរុញ និង​លើកទឹកចិត្ត​ដល់​ប្រជាកសិករ ក្នុងការ​បង្កើន​ដាំ​ដុះ​បន្លែ​សុវត្ថិភាព ​ឯកឧត្តម វេ​ង សាខុន ​រដ្ឋមន្ត្រី​ក្រសួង​កសិកម្ម ​រុក្ខាប្រមាញ់ ​និង​នេសាទ ​កាលពីថ្ងៃទី​២៩ ខែមករា ​ម្សិលមិញ បាន​ចុះ​ពិនិត្យ​ការ​ដាំ​បន្លែ​សុវត្ថិភាព ​ដែលមាន​សក្ដានុពល ដូចជា​ ស្ពៃក្ដោប ​ដំឡូងបារាំង ​ការ៉ុត ​ស្ពៃ បូកគោ និង​ខ្ទឹមបារាំង ​។​ល​។ អញ្ជើញ​ជួប​សំណេះសំណាល​ជាមួយ​កសិករ ​នៅក្នុង​ក្រុង ​សែន​មនោ​រម្យ ខេត្តមណ្ឌលគិរី ​ដើម្បី​ជំរុញ​មន្ត្រី​ជំនាញ​ ឱ្យ​ខិតខំ​បណ្ដុះបណ្ដាល​កសិករ​អំពី​បច្ចេកទេស​ដាំ​ដុះ​ឱ្យ​បាន​ល្អ​ជាង មុន ដែល​នឹង​អាច​រក​ចំណូល​បាន​ប្រសើរ​ជាង​មុន​ផងដែរ​។

ឯកឧត្តម បាន​បញ្ជាក់ថា កាលពីមុន ប្រទេស​កម្ពុជា បាន​នាំចូល​បន្លែ​ផ្លែឈើ​ ត្រី សាច់ ពី​ប្រទេសជិតខាង​ ប្រមាណ​ជា​៨០​ភាគរយ ​សម្រាប់​ផ្គត់ផ្គង់​ទីផ្សារ​ក្នុងស្រុក​ តែ​ពេលនេះ ក្រសួងកសិកម្ម ​បាន​នឹង​កំពុង​យកចិត្តទុកដាក់​គិត គូរ​ជំរុញ​ឱ្យ​ប្រជាកសិករ​ដាំ​ដំណាំ​បន្លែ ​តាម​ស្តង់ដារ ​ដែល​នឹង​ផ្ដល់​ទិន្នផល​ខ្ពស់ ​និង​មានតម្លៃ​សមរម្យ ដើម្បី​កាត់បន្ថយ​ការ នាំចូល​បន្លែ ផ្លែឈើ ត្រី សាច់​។

ឯកឧត្តម​ បាន​បន្ថែមថា ​តាមរយៈ​មន្ត្រី​កសិកម្ម​ខេត្ត ប្រជាកសិករ ត្រូវ​បាន​ចង​ជា​បណ្ដុំ​អាជីវកម្ម ទៅតាម​ប្រភេទ​នីមួយៗ ​ដើម្បី​ងាយស្រួល​ក្នុង​ការ​ផ្ដល់​បច្ចេកទេស ​ពូជ និង​ងាយស្រួល​ក្នុង​ការរក​ទីផ្សារ​។ ឯកឧត្តម ​បាន​លើកទឹកចិត្ត​ឲ្យ ប្រជាកសិករ ​ងាក​មក​ការ​បង្កើន​ការ​ដាំដុះ​បន្លែ​សុវត្ថិភាព និង​ដំណាំ​អាទិភាព ជំនួស​ការ​ដាំ​ដំណាំ​តាម​គ្នា ​ឬ​ធ្វើ​កសិកម្ម​តាម​ បែប​ប្រពៃណី ។

ឯកឧត្ដម បាន​បញ្ជាក់ថា ការធ្វើ​កសិកម្ម​បែប​ទំនើប ​ទាមទារ​ឲ្យ​ប្រជាកសិករ ត្រូវ​មាន​ផែនការ​ច្បាស់លាស់ មាន កញ្ចប់​ថវិកាបម្រុង សម្រាប់​រៀបចំ​ប្រព័ន្ធ​ស្រោចស្រព ​ក៏ដូចជា​ផ្ទះ​សំណាញ់ ​។​ល​។ តែ​ផល​ ដែល​នឹង​ទទួល​បាន​ពី​ការ ធ្វើ​កសិកម្ម​បែប​ទំនើប​នេះ ​គួរ​ជាទី​គាប់ចិត្ត​។

លោក សុង ឃាង ប្រធាន​មន្ទីរ​កសិកម្ម ខេត្ត​មណ្ឌល​គិរី បានឱ្យដឹងថា ​បច្ចុប្បន្ន ផ្ទៃដី​ដាំ​ដុះ​បន្លែ ​ក្នុង​ខេត្ត​នេះ មាន ​ចំនួន​ជាង​៦០០​ហិកតា ​ដែល​អាច​ផលិត​បន្លែ​ស្ពៃក្ដោប ​ស្ពៃបូកគោ​ ការ៉ុត ឆៃថាវ និង​សណ្ដែកបារាំង បាន​រាប់​សិប​តោន​ដែរ ក្នុង​មួយ​រដូវ​កាល​៕

ប្រភព BTV News

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post