សង្គម
ក្រោយពីតារាចម្រៀងនិង សម្តែង សូដា នីតា បានប្រកាសទាំងខឹ-ងស-ម្បារទាមទារបំណុល ប្រមាណជា ជិត ៥ម៉ឺនដុល្លារកាលពីពេលថ្មីៗនោះតារាសម្តែង សឿ សុធារ៉ា ប្រញាប់ចេញមុខ សុំទោស សូដា នីតា ដោយបញ្ជាក់ថាការនិយាយរបស់នាងកន្លងមកជាការភ័ន្តច្រឡំប៉ុណ្ណោះ ។ គេមិនទាន់ដឹងថាតើ សូដា នីតា នឹងអភ័យទោសឱ្យ សឿ សុធារ៉ា ឬយ៉ាងណាឡើយ ។
គេចាំបានថាក្រោយពីម្តាយ សឿ សុធារ៉ា បានទទួលមរណភាព សូដា នីតា ក៏បានប្រកាស លើកលែងបំណុលដែល សឿ សុធារ៉ា បានជំពាក់រឿងលេងតុងទីននូវចំនួនទឹកប្រាក់ជិត ៥ម៉ឺនដុល្លារកាលពីអំឡុងខែកក្កដា ឆ្នាំ ២០២១ ។ មិនតែប៉ុណ្ណោះ សូដា នីតា ថែមទាំងបាន ចូលបុណ្យ៧ថ្ងៃដល់ម្តាយរបស់ សឿ សុធារ៉ា នូវទឹកប្រាក់ចំនួន ៥០ ដុល្លារទៀតផង ។ ទឹកចិត្តដ៏ប្រពៃរបស់ សូដា នីតា ចំពោះការលើកលែងមិនយកបំណុលរបស់ សឿ សុធារ៉ា បានធ្វើឱ្យ មហាជនជាច្រើនលាន់មាត់សរសើរនឹងរំភើបជំនួស សឿ សុធារ៉ា ផងដែរ ។
ប៉ុន្តែអ្វីដែលចាប់អារម្មណ៍ស្ងប់ស្ងាត់មិនបានប៉ុន្មានផង សឿ សុធារ៉ា ក៏បានចេញមុខឡាយ វីដេអូសុំឱ្យ សូដា នីតា ទៅអុជធូបសុំខមាទោស ម្តាយរបស់នាងហើយថែមទាំងនិយាយថានាងសុំមិននិយាយរឿងការលើកលែងបំណុលទឹកប្រាក់ជិត ៥ម៉ឺនដុល្លាររបស់ សូដា នីតា ឡើយ ព្រោះមានតែនាង និងសូដា នីតា ប៉ុណ្ណោះដែលដឹង ។
ទ្រាំមិនបាននឹងការលើកឡើងរបស់ សឿ សុធារ៉ា សូដា នីតា ក៏បានប្រកាសជំហឱ្យ សឿ សុធារ៉ា សុំទោសនាងនឹងបកស្រាយរឿងនេះបើមិនដូច្នោះនាងនឹងទាមទារបំណុលវិញហើយថែមទាំងប្តឹងទារជំងឺចិត្តពី សឿ សុធារ៉ា ថែមទៀត ។
អ្វីដែលចាប់អារម្មណ៍កាលពីប៉ុន្មានម៉ោងមុននេះ សឿ សុធារ៉ា បានចេញវីដេអូសុំទោសដល់ សូដា នីតា ចំពោះពាក្យសម្តីរបស់នាង ថានាងសុំទោសចំពោះការភ័ន្តច្រឡំនាពេលកន្លងមកហើយនាងក៏សូមអរគុណដល់ទឹកចិត្ត សូដា នីតា ដែលបានលើកលែងបំណុលចំពោះរូបនាងហើយសង្ឃឹមថា សូដា នីតា មិនប្រកាន់ខឹងចំពោះនាង ព្រោះសព្វថ្ងៃនាងមិនត្រឹម ធ្លាក់ខ្លួនក្រីក្រទេសូម្បីតែម្តាយក៏បានទទួលមរណភាពដែរ ។
សម្រាប់នាងមិនចង់មានរឿងវែងឆ្ងាយ អ្វីទេព្រោះបើឈ្លោះគ្នា ក៏ឈ្លោះមិនឈ្នះគេដែរ ។ជាមួយនឹងការលើកឡើងរបស់ សឿ សុធារ៉ា ក្នុងវីដេអូនេះពិតជាមានសភាពគួរឱ្យអាណិតជាខ្លាំង តែយ៉ាងណាគេមិនទាន់ឃើញ សូដា នីតា មានប្រតិកម្មអ្វីជាបន្តចំពោះការសុំទោសរបស់ សឿ សុធារ៉ា ឡើយ៕
