សិល្បៈ
ថ្ងៃទី២៨ ខែមករា ឆ្នាំ២០២៣ នេះ គឺនៅសល់តែ៩៧ថ្ងៃទៀតប៉ុន្នោះ នឹងឈានដល់ព្រឹត្តិការណ៍ស៊ីហ្គេមលើកទី៣២ (32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ។
ក្នុងឱកាសមួយនេះ មហាជនជាច្រើនបានចាប់អារម្មណ៍ទៅនឹងការលើកឡើងសំណូមពរ ចង់ឱ្យកំពូលតារាចម្រៀងរ៉េប២រូប ជួបគ្នា បកស្រាយបទចម្រៀងមួយបទរួមគ្នាសម្រាប់ការប្រកួត Sea Games 2023 នេះ ។ តាមរយៈទំព័រហ្វេបុកលោក នី ឬទ្ធី បានលើកឡើងឱ្យដឹងថា៖
«ប្រសិនបើ គណៈកម្មាធិការជាតិរៀបចំការប្រកួតកីឡាស៊ីហ្គេម (CAMSOC) បើកទទួលយកការស្នើសុំមតិយោបល់ផ្សេងៗពីមហាជន សម្រាប់ព្រឹត្តិការណ៍ដ៏អស្ចារ្យរបស់កម្ពុជា ខ្ញុំនឹងធ្វើការសំណូមពររឿងមួយនេះ ខ្ញុំចង់ស្នើសុំឱ្យ Vannda ជាមួយ G-Devith ចេញចម្រៀងរួមគ្នាមួយបទសម្រាប់ការប្រកួតកីឡា Sea Games 2023 របស់កម្ពុជាក្នុងនាមជាម្ចាស់ផ្ទះ។
ហើយខ្ញុំជឿជាក់ថាព្រឹត្តិការណ៍ដ៏អស្ចារ្យរបស់កម្ពុជាមួយនេះនឹងទទួលបានការគាំទ្រ និងចាប់អារម្មណ៍កាន់តែខ្លាំងពីសំណាក់ស្រទាប់យុវវ័យថែមទៀត យ៉ាងណានេះគ្រាន់តែជាគំនិតតូចមួយរបស់ខ្ញុំដើម្បីជួយជម្រុញព្រឹត្តិការណ៍ Sea Games 2023 ឱ្យកាន់តែខ្ទរខ្ទាយកាន់តែធំទៅមុខតែប៉ុណ្ណោះ ខុសត្រូវ គួរពុំគួរ សូមអធ្យាស្រ័យផង!»។
បន្ទាប់ពីឃើញការលើកឡើងបែបនេះ មានមហាជនអ្នកគាំទ្រតារាចម្រៀង២រូបនេះជាច្រើន បានបញ្ចេញមតិ ខ្លះយល់ស្រប ខ្លះហាក់មិនយល់ស្រប និងខ្លះទៀតមានការបញ្ចេញមតិលេងសើចជាច្រើនផងដែរ តែចំពោះលោកអ្នកវិញយល់យ៉ាងណាដែរ បើសិនជាតារាចម្រៀងរ៉េបពីររូបនេះប៉ះគ្នា?
