ដំរីស្រុកមួយក្បាលចុះប្រេង បានដេញជាន់ម្ចាស់បណ្តាលឲ្យស្លាប់ភ្លាមៗនៅកន្លែងកើតហេតុ

ខេត្តមណ្ឌលគីរី៖  បុរសម្នាក់បានស្លាប់ភ្លាមៗនៅកន្លែងកើតហេតុ ខណៈដែលសត្វដំរីខ្លួនចិញ្ចឹមចុះប្រេង បានដេញជាន់ម្ចាស់បណ្តាលឲ្យស្លាប់ ព្រមទាំងបន្តយាយីដល់អ្នកដ៏ទៃទៀតយ៉ាងកាចសាហាវ ដោយគ្មានអ្នកណាម្នាក់ហ៊ានចូលជួយសង្រ្គោះនោះឡើយ។ ហើយហេតុការណ៍ការបង្កឲ្យមានការភ្ញាក់ផ្អើលនៅវេលាម៉ោង១នឹង០០នាទីរសៀលថ្ងៃទី១៩ខែកញ្ញាឆ្នាំ២០១៦នេះត្រង់ចំណុចក្បែរអូរទេ ស្ថិតនៅក្នុងឃុំស្រែអំពូម ស្រុកពេជ្រាដា ខេត្តមណ្ឌលគិរី នៅជិតផ្លូវទៅកាន់រមណីដ្ឋានទឹកជ្រោះប៊ូស្រា។

ពាក់ព័ន្ធទៅនឹងហេតុការណ៍នេះលោក នួន សារ៉ន អភិបាលស្រុកពេជ្រាដា បានឲ្យដឹងនៅរសៀថ្ងៃនេះថា ម្ចាស់ដំរី ត្រូវបានស្លាប់ដោយសារសត្វដំរីរបស់ខ្លួនចុះប្រេង ដេញវ័ធនិងជល់ម្ចាស់ ធ្លាយពោះវៀនបណ្តាលឲ្យស្លាប់ភ្លាមៗដោយមិនបានជួយសង្រ្គោះទាន់នោះឡើយ។លោកបានឲ្យដឹងថា ម្ចាស់ដំរីដែលស្លាប់ក្នុងហេតុការណ៍នោះឈ្មោះ ម៉ឹប ស្រេង ភេទប្រុស អាយុ៤៥ឆ្នាំជនជាតិព្នង រស់នៅភូមិ ពូលូង សង្កាត់ រមនា ក្រុងសែនមនោរម្យ ខេត្តមណ្ឌលគិរី។

លោកអភិបាលស្រុកបានបន្ត សមត្ថកិច្ចកំពុងធ្វើការយាមកាមយ៉ាងតឹងរ៉ឹងនៅតាមដងផ្លូវទៅកាន់ទឹកជ្រោះប៊ូស្រា ព្រោះខ្លាចសត្វដំរីស្រុកកំពុងចុះប្រេងបង្កគ្រោះថ្នាក់ដល់អ្នកស្រុកនិងបងប្អូនអ្នកធ្វើដំណើរ។

ពាក់ព័ន្ធទៅនឹងសត្វដំរីចុះប្រេងនេះដែរ ឯកឧត្តម ស្វាយ សំអ៊ាង អភិបាលខេត្តមណ្ឌលគិរី កំពុងបញ្ជាកំលាំងសមត្ថកិច្ចឲ្យចុះទៅទីតាំងខាងលើដើម្បីការពារសវត្ថិភាព និងរក្សាសន្តិសុខជូនប្រជាពលរដ្ឋ និងអ្នកទេសចរណ៍ ហើយឯកឧត្តមកំពុងតែស្នើរឲ្យមន្រ្តីជំនាញអភិរក្សសត្វព្រៃនៅក្នុងតំបន់នេះរិះរកតាមវិធីសាស្រ្តផ្សេងៗតាមមធ្យោបាយណាក៍ដោយ ឲ្យចាប់ដំរីមួយក្បាលនេះមកដាក់កន្លែងមានសុវត្ថិភាព ដើម្បីធានាបានសន្តិសុខជូនប្រជាពលរដ្ឋ និងភ្ញៀវទេសចរណ៍៕