សិល្បៈ ៖ រយៈពេលប្រមាណជាកន្លះឆ្នាំមកនេះតារាចម្រៀង និងជាម្ចាស់ពាន The Voice Cambodia រដូវកាលទីពីរ ថែល ថៃ បានចេញបទចម្រៀងមានចំនួន៥បទនៅលើទីផ្សារមកហើយ។ ដោយឡែកនៅពេលនេះបទថ្មីរបស់លោក "ពុកម៉ែចាស់ហើយ" ក៏ត្រូវបានក្រុមហ៊ុន ហង្សមាស ចេញជា Audio ខ្លីផ្សព្វផ្សាយ ដែលមានការគាំទ្រខ្លាំងពីសំណាក់ទស្សនិកជន ដោយក្នុងរយៈពេល១៥ម៉ោង មានអ្នកចូលស្ដាប់ជាង៣ម៉ឺននាក់ និងអ្នក Shares មានចំនួនជិត២ពាន់ដង។
ការបង្ហាញបទចម្រៀងអប់រំថ្មីនេះប្រសិនបើកូនប្រុសស្រីដែលមិនបានមើលថែឪពុកម្ដាយ ពេលបានស្ដាប់បទថ្មី ថែល ថៃ រួចហើយនឹងមានវិប្បដិសារីជាមិនខាន។តារាចម្រៀងលោក ថែលថែ បានប្រាប់ Kqube.net នៅមុននេះបន្តិចថា បទចម្រៀង Original Song "ពុកម៉ែចាស់ហើយ" របស់លោកមួយបទនេះលោកមានសង្ឃឹមថា នឹងទទួលបានការគាំទ្រខ្លាំងពីសំណាក់ទស្សនិកជន ព្រោះបទនេះមានអត្ថន័យល្អ គឺចង់បង្ហាញការអប់រំដល់កូនៗគ្រប់រូបគួរមើលថែឪពុកម្ដាយ ព្រោះពួកគាត់ចាស់ហើយ មិនត្រូវចាំដល់ពេលលោកផុតជីវិតបានយំសោកស្ដាយ និងធ្វើបុណ្យឧទ្ទិសកុសលជូនគាត់នោះទេ ពោលគឺកូនៗគ្រប់រូបគួរមើលថែគាត់ ដូចពាក្យចាស់អប់រំថា ធ្វើបុណ្យទាន់ខែភ្លឺ។
ជាមួយគ្នានេះដែរលោក តាន់ ចន្ថា អ្នកយកព័ត៌មាន Kqube.net ក៏បានសុំឲ្យលោក ថែល ថៃ បញ្ជាក់ប្រាប់ពេលវេលាចេញ Full Audio និង MV នៅពេលណាផងដែរ ប៉ុន្តែតារារូបនេះប្រាប់ថា លោកមិនទាន់បានដឹងព័ត៌មានច្បាស់ទេ ព្រោះខាងក្រុមហ៊ុនមិនទាន់បានកំណត់ច្បាស់។តែលោកបានប្រាប់ថាបទ Original Song "ពុកម៉ែចាស់ហើយ" និពន្ធទំនុកច្រៀងដោយលោក លី ស៊ីនហួន និងពន្ធបទភ្លេងដោយលោក ចក់ ៕
ផ្ដល់សិទ្ធិដោយ៖ KQUBE
