កាលពីពេលថ្មីៗនេះមានព្រឹត្តិការណ៍ដ៏ក្ដៅមួយបានកើតឡើងនៅទីក្រុង Ankara ប្រទេសទួរគី ដោយ លោក Andrei Karlov ជាឯកអគ្គរដ្ឋទូតរបស់រុស្ស៊ីនៅប្រទេសទួរគី ត្រូវបានប៉ូលិសបាញ់សម្លាប់ភ្លាមៗនៅនឹងកន្លែង ខណៈពេលដែលមានការតវ៉ាមួយជាប់ពាក់ព័ន្ធជាមួយប្រទេសរុស្ស៊ីនៅទីក្រុងអាឡេប៉ូប្រទេសស៊ីរី នេះបើយោងតាមសារព័ត៌មាន BBC បានចុះផ្សាយ។
ប្រធានាធិបតីប្រទេសស៊ីរី លោក Bashar al-Assad បានឲ្យដឹងពីការវាយប្រហារថា ឧប្បត្តិហេតុនេះបានកើតឡើងក្រោយពេលទួរគីធ្វើការតវ៉ាមួយស្ដីអំពី រុស្ស៊ីគាំទ្រ និងទំនុកបម្រុងទៅដល់ប្រទេសស៊ីរី ដោយឃាតករត្រូវបានគេកំណត់អត្តសញ្ញាណថា ជាសមាជិកប៉ូលិសកុបកម្មនៅទីក្រុង Ankara មួយរូបឈ្មោះ Mevlut Mert Aydintas អាយុ ២២ឆ្នាំទៀតផង។
លោក Recep Tayyip Erdogan ប្រធានាធិបតីប្រទេសទួរគីបានប្រាប់ទៅលោក Vladimir Putin តាមទូរស័ព្ទ និងតាមរយៈខ្សែវីដេអូមួយថា តំណាងប្រទេសទាំងពីរបានចាត់ទុកឃាតកម្មនេះថា ជាការបង្កហេតុរករឿងគ្នាមួយ ដែលធ្វើឲ្យរុស្ស៊ីមានកំហឹងក្នុងចិត្តយ៉ាង និងនាំឲ្យទំនាក់ទំនងរវាងប្រទេសទាំងពីរកាន់តែឃ្លាតឆ្ងាយ។
Dmitry Peskov អ្នកនាំពាក្យរបស់លោក Putin បានឲ្យដឹងថា ក្រុមអ្នកស៊ើបអង្កេតរុស្ស៊ី រួមទាំងក្រុមប្រឹក្សាសន្តិសុខអង្គការសហប្រជាជាតិ នឹងធ្វើដំណើរទៅកាន់ប្រទេសទួរគី ដើម្បីធ្វើការដោះស្រាយ និងតាមដានលើរឿងក្ដីនេះ ដោយរកឲ្យឃើញនូវមេខ្លោងដែលបញ្ជាពីក្រោយខ្នងពិតប្រាកដផងដែរ។
លោក Mark Lowen អ្នករាយការណ៍របស់ BBC ប្រចាំនៅទួរគីបានឲ្យដឹងថា មុនពេលកើតហេតុគណៈរដ្ឋមន្ត្រីការបរទេសទាំងបីប្រទេសគឺ រុស្ស៊ី ទួរគី និងអ៊ីរ៉ង់ត្រៀមនឹងធ្វើកិច្ចប្រជុំដ៏ធំមួយនៅទីក្រុង Moscow ថ្ងៃអង្គារ ទី២០នេះ។
ទស្សនាវីដេអូ៖
ផ្តល់សិទ្ធិដោយ៖KQUBE
