Sponsor

សិល្បៈ ៖ បន្ទាប់​ពី​សម្ដេច​តេជោ ​ហ៊ុន សែន នាយករដ្ឋមន្ត្រី​​បាន​​សន្យា​ទិញ​សម្ភារ​ប្រគំតន្ត្រី​ជន​ពិការ​ ដោយ​  លោក​បាន​សម្រេច​ផ្ដល់​ទីតាំង​រមណីយដ្ឋាន​វត្តភ្នំ​សម្រាប់​ក្រុម​ពិការ​មាន​ឱកាស​សម្ដែង​សិល្បៈ​ ព្រម​ទាំង​ជួយ​ទំនុកបម្រុង​ឧបករណ៍​តន្ត្រី​អោយ​បាន​ល្អ​សមរម្យ​ ដើម្បី​សុំ​ឲ្យ​ជន​ពិការ​កុំ​ទៅ​សម្ដែង​នៅ​តាម​ដង​ផ្លូវ​ ឬ​នៅ​ក្នុង​ទីផ្សារ​តូច​ចង្អៀត​ ដែល​អាច​បង្ក​បញ្ហា​សណ្ដាប់ធ្នាប់​ និង​គ្រោះថ្នាក់​ចរាចរណ៍​ផ្សេង​ៗ ​កាល​ពី​ព្រឹកមិញ​រួច​មក​ ក៏​មាន​អ្នក​សិល្បៈ​ជា​ច្រើន​បាន​សម្ដែង​ការ​គាំទ្រ​ ​។ ខាង​ក្រោម​នេះ​គឺ​ជា​មតិ​តារា​ចម្រៀង​ល្បី​ៗ​ តើ​ពួក​គេ​និយាយ​អ្វី​ខ្លះ​ជុំ​វិញ​ប្រធាន​បទ​ខាង​លើ​នេះ​ ?

លោក ​សុះ ម៉ាច ​ប្រធាន​សមាគម​សិល្បករ​ខ្មែរ​បាន​ប្រាប់​ថា​ "ខ្ញុំ​សូម​គាំទ្រ​ពេញ​ទំហឹង​  និង​សូម​អរគុណ​ជា​ខ្លាំង​ចំពោះ​ការ​គិត​គួរ​​របស់​សម្ដេច​តេជោ ​ជួយ​ដល់​ជន​ពិការ​ ដូច​លោកអ្នក​ឃើញ​ហើយ​សព្វ​ថ្ងៃ​ហ្នឹង​ជន​ពិការ​គាត់​ខំ​ច្រៀង​តាម​ស្តុប​ ហាល​ក្ដៅ​ភ្លៀង​ខ្យល់​ ដើម្បី​រក​ថវិកា​ចិញ្ចឹម​ជីវិត​ ម្ល៉ោះ​ហើយ​ទើប​សម្ដេច​លោក​ជួយ​ផ្ដល់​ឧបករណ៍​ដ៏​សមស្រប​សម្រាប់​ពួក​គាត់​ប្រគំ​តាម​ក្រុម​របស់​ពួក​គាត់​ជា​រឿង​ល្អ​ណាស់​  ហើយ​ការ​ផ្ដល់​ទីតាំង​ គឺ​ជា​ការ​ផ្ដល់​កិត្តិយស ​និង​ក្ដី​អាណិត​អាសូរ​ដ៏​ធំធេង​ សម្រាប់​ឲ្យ​ពួក​គាត់​យក​ទេពកោសល្យ​ និង​ជំនាញ ​ដែល​ខ្លួន​មាន​មក​បង្ហាញ​សាធារណៈ​ជន​ ដើម្បី​ទទួល​បាន​នូវ​ការ​ផ្ដល់​ជា​ថវិកា​ពី​ជន​រួម​ជាតិ​ ក៏​ដូច​ជា​ភ្ញៀវ​បរទេស​ផង​ដែរ​"។

កំពូល​តារា​ចម្រៀង​​របស់​ផលិតកម្ម​ សាន់ដេ ​លោក​ ខេមរៈ សេរីមន្ត​ បាន​ប្រាប់​ថា ​"ខ្ញុំ​គាំទ្រណាស់​នូវ​ការ​អាណិត​ស្រឡាញ់​របស់​សម្ដេច​ ព្រោះ​អី​ជន​ពិការ​គាត់​អត់​មាន​វិធី​ផ្សេង​ ព្រោះ​គាត់​បាត់​បង់​សមត្ថភាព​ផ្សេង​ហើយ ​ ដូច្នេះ​ហើយ​ពួក​គាត់​គួរ​តែ​ទទួល​បាន​ផល​ប្រយោជន៍​ពី​សមត្ថភាព​របស់​ពួកគាត់​ដែល​មាន​ ហើយ​ខ្ញុំ​ក៏​គាំទ្រ​ការ​ធ្វើ​កម្មវិធី​ជន​ពិការ​ឲ្យ​បាន​ច្រើន​ សម្រាប់​ឲ្យ​ពួក​គាត់​មាន​ថវិកា​ជួយ​ទ្រទ្រង់​ខ្លួន​គាត់​"។

តារា​ចម្រៀង​ប្រចាំ​ផលិតកម្ម​ ថោន ​ខេម ​ក៏​បាន​បង្ហាញ​នូវ​ការ​យល់​ឃើញ​ថា​ "សម្រាប់​ខ្ញុំ​យល់​ថា ​គឺ​ជា​រឿង​ល្អ​ ដែល​សម្ដេច​លោក​មាន​ការ​គិតគូរ​ខ្ពស់​សម្រាប់​ជន​ពិការ​  ហើយ​ការ​រៀបចំ​នេះ​ គឺ​ល្អ​សម្រាប់​ប្រទេស​យើង ​គឺ​មាន​ន័យ​ថា ​ពេល​ភ្ញៀវ​ទេសចរ​គេ​ចូល​មក​ក៏​មិន​ឃើញ​ពួកគាត់​ច្រៀង​នៅ​តាម​ចិញ្ចើម​ថ្នល់​ មួយ​ទៀត​ជា​រឿង​ល្អ​ដែល​ក្រុម​តន្ត្រី​ជន​ពិការ​គាត់​មាន​កន្លែង​ច្រៀង​ត្រឹម​ត្រូវ​ និង​អាច​រក​ថវិកា​ចិញ្ចឹម​ជីវិត​បាន​ស្រួល​ជាង​មុន​"។

តារា​ចម្រៀង​របស់​ផលិតកម្ម​ M ​លោក ​សន វិជ្ជបុត្រ​ ដែល​ជា​អ្នក​សិល្បៈ​ម្នាក់​ទើប​ចុះ​ជួយ​ក្រុម​តន្ត្រី​ជន​ពិការ​ភ្នែក​បាន​លើក​ឡើង​ដែរ​ថា ​"ព័ត៌មាន​សម្ដេច​តេជោ ​ហ៊ុន សែន​ ​បាន​ចុះ​ជួយ​ជន​ពិការ​ ឲ្យ​មាន​ទីតាំង​សម្ដែង​ ក៏​ដូច​ជា​ជួយ​ឧបត្ថម្ភ​ឧបករណ៍​ថ្មី​ៗ​សម្រាប់​ពួកគាត់​ច្រៀង​។ ​

ក្នុង​នាម​រូប​ខ្ញុំ​ជា​អ្នក​សិល្បៈ​មួយ​រូប​សូម​អរគុណ​ដល់​សម្ដេច​យ៉ាង​ជ្រាលជ្រៅ​ ដែល​បាន​ជួយ​រៀបចំ​ឲ្យ​ជន​ពិការ​មាន​កន្លែង​អាច​រក​ថវិកា​ចិញ្ចឹម​ជីវិត​ ព្រោះ​ថ្មី​ៗ​នេះ​ក្រុម​តន្ត្រី​ជន​ពិការ​បាន​ប្រាប់​ខ្ញុំ​ថា​ ពួក​គាត់​រក​មួយ​ថ្ងៃ​រស់​បាន​មួយ​ថ្ងៃ​ និយាយ​រួម​ទៅ​ខ្ញុំ​គ្រាន់​តែ​បាន​ឮ​សម្ដេច​ប្រកាស​ភ្លាម​ គឺ​រំភើប​ជំនួស​ពួកគាត់​តែម្ដង"​។

​ដោយឡែក​តារា​ចម្រៀង​ មាស សុខសោភា ​ត្រូវ​បាន​ប្រុស​លោក ​មាស សុខរតនៈ​ ពាំនាំ​ពាក្យ​សម្ដី​ដែរ​ថា ​"ចំពោះ​ការ​រៀបចំ​របស់​សម្ដេច​តេជោ ​ហ៊ុន សែន​ នាយករដ្ឋមន្ត្រី​ព្រះរាជាណាចក្រ​កម្ពុជា​ឲ្យ​ជន​ពិការ​មាន​កន្លែង​សម្ដែង​ទេពកោសល្យ​របស់​ពួក​គាត់​ ព្រម​ទាំង​មាន​សម្ភារ​ទំនើប​ៗ​ សម្រាប់​ពួក​គាត់​ច្រៀង​ប្រកប​របរ​ចិញ្ចឹម​ជីវិត​នេះ​ គឺ​ល្អ​ប្រសើរ​ណាស់​ ហើយ​លោក​ជឿ​ថា​ការ​ទំនុកបម្រុង​នេះ​ជន​ពិការ​ទាំង​អស់​ពិត​ជា​មាន​ចិត្ត​សប្បាយរីករាយ​ ហើយ​លោក​ និង​ប្អូន​ស្រី​ មាស ​សុខសោភា ​សូម​គាំទ្រ​ពេញទំហឹង​សម្រាប់​ការ​ចុះ​ជួយ​ដល់​ជន​ពិការ​ពី​ប្រមុខ​រដ្ឋាភិបាល​"៕ 

ផ្ដល់សិទ្ធិដោយ៖KQUBE

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor