√ សមត្ថកិច្ចចម្រុះរកឃើញភ្លុកដំរី ឆ្អឹងខ្លា ស្រកាពង្រូលជិត២តោនក្នុងក្រុមហ៊ុនអយស្ម័យយានរ៉ូយ៉ាល់

រាជធានីភ្នំពេញ៖  សមត្ថកិច្ចចម្រុះរកឃើញ ភ្លុកដំរី ឆ្អឹងខ្លា ស្រកាពង្រូល និងកន្ទុយដំរី ដែលឈ្មួញលាក់ទុកនៅក្នុងប្រហោងឈើហ៊ុប ទម្ងន់ជិត ២តោន ក្នុងក្រុមហ៊ុន អយស្ម័យយានរ៉ូយ៉ាល់ផែស្ងួតភ្នំពេញ នៅថ្ងៃទី២០ ខែធ្នូ ឆ្នាំ២០១៦ម្សិលមិញ ប៉ុន្តែការចុះត្រួតពិនិត្យនោះទើបតែបានបញ្ចប់នៅព្រឹកថ្ងៃទី២១ ខែធ្នូនេះទេ។

ជាលទ្ធផលនៃការចុះត្រួតពិនិត្យនិងបង្ក្រាបរបស់សមត្ថកិច្ចចម្រុះនេះ បានបញ្ជាក់ថា សមត្ថកិច្ចរកឃើញភ្លុកដំរី ៦៤០ដុំ ស្មើនឹង ១៣៦១, ៩ គ.ក ស្រកាពង្រួល ១៣៧, ៦ គ.ក ឆ្អឹងខ្លា ទម្ងន់ ៨២, ៣ គ.ក និង កន្ទុយដំរីជិត៥ គ.ក (៤, ៩ គីឡូក្រាម) សរុបទាំងអស់ទម្ងន់១៥៨៦, ៧ គីឡូក្រាម។

គួររំឭកផងដែរថា សមត្ថកិច្ចគយ បានសហករណ៍កម្លាំងរដ្ឋបាលព្រៃឈើ អង្គការ វ៉ាយ អេត តំណាងស្ថានទូតអាមេរិកកម្លាំងកាំកុងត្រូល អាវុធហត្ថលើផ្ទៃប្រទេស អាជ្ញាធរមូលដ្ឋាន ធ្វើការបង្ក្រាបបាន ភ្លុកដំរី ឆ្អឹងខ្លា ស្រកាពង្រូល និងកន្ទុយដំរី ដែលឈ្មួញបង្កប់នៅក្នុងឈើហ៊ុបបម្រុងនាំទៅកាន់ប្រទេសចិន ប្រមាណ ៣ដុំ កាលពីរសៀលថ្ងៃទី១៧ ខែធ្នូឆ្នាំ២០១៦ នៅក្នុងចំណុច ក្រុមហ៊ុន អយស្ម័យយានរ៉ូយ៉ាល់ផែស្ងួតភ្នំពេញ។

ទីតាំងផែស្ងួតនេះស្ថិតតាមបណ្តោយផ្លូវបេតុង ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។ វត្ថុទាំងនេះ ត្រូវបានជនល្មើស លួចបង្កប់នៅក្នុងឈើហ៊ុប ចំនួន៣ដុំ ដោយឈើហ៊ុប នីមួយៗ ដែលបង្កប់វត្ថុតាងទាំងនេះ មានមុខកាត់ កន្លះម៉ែត្រ បួនជ្រុង និងមានប្រវែងពី ២ ម៉ែត្រ ទៅ៣ម៉ែត្រ៕