សិល្បៈ ៖ រយៈពេលប្រមាណជាមួយឆ្នាំនេះក្រោយធ្លាក់ពីកម្មវិធី The Voice Cambodia រដូវកាលទីពីរ តារាតារាចម្រៀងកញ្ញា ង៉ែត សូរង្សី បានបង្ហាញក្ដីរំពឹងទុកយ៉ាងមុតមាំថា នឹងបានបង្ហាញបញ្ចេញទឹកដមសំឡេងនៅក្នុងផលិតកម្ម ហង្សមាស ប៉ុន្តែខណៈដែលការរង់ចាំនៅតែមិនឃើញព័ត៌មានខាង ហង្សមាស ទាក់ទងហៅឲ្យទៅច្រៀងកញ្ញាបានប្រាប់ Kqube.net ថា ពេលនេះនាងលែងខ្វល់ពីការច្រៀងនៅក្នុងផលិតកម្មហើយ។
កញ្ញា ង៉ែត សូរង្សី បន្តថា សម្រាប់ព័ត៌មានទាក់ទងជាមួយ ហង្សមាស គឺនៅតែគ្មានដំណឹងដូចសព្វដង តែពេលនេះនាងលែងខ្វល់ហើយ ព្រោះកុងត្រារបស់នាងដែលគេចង់ជើងចោលមួយឆ្នាំ ក៏ជិតផុតហើយដែរ ម្យ៉ាងទៀតពេលនេះហាក់មិនសូវចង់ប្រឡូកអាជីពចម្រៀងនៅតាមផលិតកម្មទៀតទេ ព្រោះនាងក៏មានមុខរបររកស៊ីផ្ទាល់ខ្លួនហើយ ប៉ុន្តែនាងសុំលាក់ជំនួញនេះសិន ព្រោះមិនទាន់ដល់ពេលត្រូវបញ្ចេញ។
តារាចម្រៀងសំឡេងស្រទន់រូបនេះបន្តថា ពេលនេះនាងត្រូវយកពេលមកពង្រឹងការងារផ្ទាល់ខ្លួនមួយរយៈសិន ហើយក្នុងពេលជាមួយគ្នានេះនាងក៏បានបដិសេធការហៅឡើងច្រៀងកម្មវិធីតន្ត្រីច្រើនលើកមកហើយដែរ គឺនៅទទួលតែការច្រៀងបញ្ចូលក្នុងខ្សែភាពយន្តឲ្យតាមស្ថានីយទូរទស្សន៍តែប៉ុណ្ណោះ សូម្បីតែផលិតកម្មមួយចំនួនហៅនាងទៅធ្វើកុងត្រាកាលពីពេលថ្មីៗនេះនាងក៏បានបដិសេធផងដែរ៕
ផ្តល់សិទ្ធិដោយ៖KQUBE
