√ ហ្វេសប៊ុកភ្ជាប់និស្ស័យ "ស្រលាញ់គ្នាតាមFacebookបាន១ឆ្នាំឈ្លោះគ្នាហើយបែក៣ដង" ចុងក្រោយនៅតែជាគូព្រេង

មនុស្សមិនតិចទេដែលកំពុងតែទាក់ទងគ្នាតាមរយៈបណ្ដាញសង្គមហ្វេសប៊ុក ដោយគោលបំណងនៃការទាក់ទងរបស់អ្នកទាំងអស់នោះខុសៗគ្នា ហើយក៏មានស្វាមីភរិយាមិនតិចនោះទេ ដែលបានភ្ជាប់និស្ស័យជាប្ដីប្រពន្ធនឹងគ្នាតាមរយៈសារឆ្លើយឆ្លងក្នុងប្រព័ន្ធនេះ។

តួយ៉ាងដូចជាប្ដីប្រពន្ធដ៏ស្រស់ស្អាតទាំងគូនេះដែរ ដោយពួកគេបានប្រើរយៈពេលមួយឆ្នាំទាក់ទងគ្នាតាមរយៈហ្វេសប៊ុក រហូតដល់ថ្ងៃរៀបការ។ បង្ហោះសារក្នុងទំព័រហ្វេសប៊ុករបស់ខ្លួន ភូ ម៉ី បានសរសេរថា "ស្រលាញ់គ្នាតាម Facebook ស្គាល់គ្នាបាន១ឆ្នាំ ឈ្លោះគ្នាបែកគ្នាបាន៣ដង រហូតដល់ថ្ងៃចូលរោងការ នឹកស្មានមិនដល់ថាពួកយើងមានថ្ងៃនេះទេ នេះហើយជាគូកម្មរបស់ខ្ញុំ ស្រលាញ់បងណាស់ អូននឹងថែរក្សាគ្រួសារមួយនេះពោរពេញដោយស្នាមញញឹមរហូត"។

បន្ថែមជាមួយក្រុមការងារគេហទំព័រ ខេឃ្យូប ភូ ម៉ី បានឲ្យដឹងថា ការស្គាល់គ្នារយៈពេលមួយឆ្នាំតាមហ្វេសប៊ុក ហើយទម្រាំមកដល់ថ្ងៃចូលរោងការ ក៏វាមិនមែនជារឿងងាយស្រួលប៉ុន្មាននោះដែរ គឺបែកគ្នារហូតដល់៣ដងឯណោះតែដោយសារ ស្វាមីរបស់ខ្លួនចេះតែChat ចុះChat ឡើង ក៏ត្រូវគ្នាវិញហើយក៏សម្រេចដឹកដៃគ្នាចូលរោងការតែម្ដង។

គួបញ្ជាក់ថា ស្វាមីភរិយាតាមរយៈហ្វេសប៊ុកមួយគូនេះ ប្តីមានឈ្មោះ លាក់ សុវង មានមុខរបរជាមេកាំបិត (ចុងភៅ) ប្រពន្ធឈ្មោះ ភូ ម៉ី មុខរបរជារដ្ឋបាលនៅរោងចក្រ ទាំងពីរនាក់រស់នៅស្រុកដំណាក់ចង្អើរ ខេត្តកែប។ ទោះបីជានៅស្រុកជាមួយគ្នាក្តីតែអ្នកទាំងពីរ មិនដែលស្គាល់គ្នាពីមុននោះទេ ដោយសារតែហ្វេសប៊ុកនេះហើយ ទើបអ្នកទាំងពីរអាចដឹកដៃគ្នាចូលរោងការបាន៕